1 Lino Mwana wambelele naakajula chisinizyo chachisanu azibili, kwakaba luumuno kujulu chakali chaamba kubachisela chahola. 2 Eelyo ndakabona baangelo balimusanu ababili bakaliimvwi kunembo lyaLeza mpawo bakapegwa myeembo iilimusanu ayibili.

3 Alimwi umwi mungelo wakali antandabiya yangolide, wakaza mpawo wayimikila kuchipayililo. Alimwi wakapegwa tununkilizyo twiingi kuti amvwelenganiye ankombyo zyabasalali boonse kuti azipedekezye kuliLeza, achipayililo changolide chili kunembo lyachuuno chabwami. 4 Busi bwatununkilizyo, ankombyo zyabasalali zyakasuka kuya kujulu kuliLeza kuzwa muluboko lwamungelo. 5 Eelyo mungelo wakabweza chumpilizyo mpawo wachizuzya mulilo kuzwa kuchipayililo alimwi wasowela anyika, mpawo kwakaba kundindima kwandabi, kuvuuma, akumweka kwandabi, akundengenda kwanyika.

6 Eelyo baangelo balimusanu ababili ibakalijisi myeembo iilimusanu aayibili bakalibambila kwiilizya.

7 Mungelo mutaanzi wakalizya mweembo wakwe, mpawo kwakawa chivulamabwe amulilo, uvweleene abulowa, zyakawisigwa anyika. Chipanzi chimwi kuzipanzi zitatu chanyika chakapya, alimwi chipanzi chimwi kuzipanzi zitaatu zyamisamu chakapya, asokwe tete lyoonse lyakapya.

8 Mungelo wachibili wakalizya mweembo wakwe, mpawo chintu chili mbuli chilundu chipati, chiyaka mulilo, chakawaalilwa mulwizi. Alimwi chipanzi chimwi chazipanzi zitatu chalwizi chakaba bulowa, 9 achipanzi chimwi chazipanzi zitatu zyazinyama zipona mulwizi zyakafwa, achipanzi chimwi chazipanzi zitatu chamaato akanyonyoonwa.

10 Mungelo wachitatu wakalizya mweembo wakwe, alimwi inyenyeezi mpati yakawa kuzwa kujulu, kayimweka mbuli chimwinikisyo, alimwi yakawida achipanzi chimwi chazipanzi zitatu zyamilonga amutusensa twameenda. 11 Izina lyanyenyezi litegwa, "Mululwe." chipanzi chimwi chazipanzi zitatu chameenda chakalula, alimwi bantu bayiingi bakafwa nkaambo meenda aayo akali alula.

12 Mungelo wachine wakalizya mweembo wakwe, alimwi chipanzi chimwi kuzipanzi zitatu chazuba chakasizigwa, achipanzi chimwi kuzwa kuzipanzi zitatu chamweezi, achipanzi chimwi kuzwa kuzipanzi zitatu chanyeenyezi, mane chipanzi chimwi kuzipanzi zitatu chamumuni wabo chakasizigwa, chipanzi chimwi kuzwa kuzipanzi zitatu chabuzuba chakakasigwa kukubala, alimwi mbuboobu chipanzi chimwi chazipanzi zitatu chabusiku.

13 Alimwi ndakalanga, mpawo ndakamvwa nsika kiilila ajwi pati, niyakali kuwuluka mumulengalenga kayiti, "Maawe, Maawe, Maawe kuli aabo bakkala anyika, nkaambo kwakulila kwamyeembo eeyo baangelo batatu ibaambi njibakali baamba kulizya!"