1 Eelyo umwi wabaangelo balimusanu ababili aabo ibakalijisi indido zilimusanu azibili, wakasika kulindime mpawo wati, "Kuza, alimwi ndikakutondeezye chisubulo nchayoopegwa simamambe mupati ooyu, ooyo ukkede atala ameenda mayiingi, 2 Nguwe ngubakachita awe bumaambi abaami baanyika, abantu boonse bakkala munyika bakakolwa awayini wabumambi bwakwe."

3 Lino munguzu zyaMuuya wakanditola kunkanda, eelyo ndakabona mwanakazi, ulikkede achinyama chisalala chizwide mazina akusampawula, alimwi chakalijisi mitwe iilimusanu ayibili ameja alikkumi. 4 Mwanakazi ooyo wakalisamide zyakusama zyadowalowa azisalala pilibili, alubo wakali lisakatide angolide amabwe mayandisi angale, alimwi muluboko lwakwe wakalijisi chinywido changolide chizwide zisesemyo amatombe amamambe aakwe, 5 Alimwi ankumu yakwe akalilembedwe izina lilamakani alansinswa, yaamba kuti, "Bbabbiloni mupati ngubanyina abasimamambi azisesemyo zyanyika." 6 Alimwi ndakabona kuti mwanakazi ooyo ulikoledwe abulowa bwabasalali abulowa bwabaabo ibakajayigwa nkaambo kaJesu.

Eelyo nindakamubona ndakagamba akugamba kupati. 7 Mpawo mungelo wakati kulindime, "Nkaamboonzi nuwagamba? Ime ndiyookupandulwida insiiswa yamwanakazi ooyu ayachinyama nchimunyampwide chijisi mitwe iilimusanu ayibili ameja alikkumi. 8 Eecho chinyama nchuwakabona chakaliko, pesi lino tachichiko, alimwi chaamba kuzwa mumulindi utagoli akwiinka kuya kukunyonyoonwa, alimwi bantu bakkala munyika bayoogamba, nkukuti aabo batana kulembwa mazina mubbuku lyabuumi kuzwa kumatalikilo anyika. Bayoogamba bakubona chinyama mbuchakaliko, alimwi lino tachichiko, nekubaboobo chaamba kubola lwachibili."

9 "Eechi chiyanda busongo akumvwisisya, mitwe ilimusanu ayibili ntutulundu tulimusanu atubili ooko mwanakazi mpakkede. 10 Alimwi nkubali bami lubo balimusanu ababili. Balimusanu tabachiwo pe, umwi mpachili lino, umwi tana sika, Lino asika ooyo, uleelede ayeendelezye kwakayiindi kaniini. 11 Chinyama chakaliwo, pesi lino tachiwo pe, ngumwami wachisanu abatatu. Pesi nguumwi wabaabo wabalimusanu ababili, alimwi uya kukuyonyonyoonwa.

12 Alimwi meja alikkumi nguwakabona mbami balikkumi, aabo batana kutambula bwami, pesi aabo bayoyeendelezya mbuli bami kwahola limwi, aamwi achinyama. 13 Aaba bajisi muzeezo uumwi. Boonse bayoopa chinyama inguzu zyabo abwendelezi bwabo. 14 Alimwi bayoolwana aMwana wambelele, pesi Mwana wambelele uyoobazunda, abaabo bayitidwe, abasale, abasyomekede, nkaambo nguunguwe Mwami wabami, Nguumweendelezi wabeendelezi."

15 Alimwi mungelo wakati kulindime, "Meenda nguwakabona nkwakkala ooyu mwanakazi simamambe mbibantu amakamu, amanyika amilaka. 16 Meja alikkumi ngwakabona, achinyama, bayoomunyonyoona simamambi, bakamusiye kalichintanda, bayoolya mubili wakwe akumuumpa amulilo, 17 nkaambo Leza wakachibikka mumyoyo yabo muzeezo wakulomya kuyanda kwakwe, akuzumina chamoyo umwi kupa chinyama bwami bwabo, mane majwi aLeza akazuzikizigwe.

18 Lino mwanakazi nguwakabona nguuchisi chipati ujisi bweendelezi kubaami boonse banyika."