1 Alimwi mungelo wachisanu wakalizya mweembo wakwe, mpawo ndakabona inyenyeezi kiiwide anyika kuzwa kujulu, alimwi wakapegwa chijuzyo champako iya kumulindi utagoli. 2 Naakajula mpako iya kumulindi utagoli, mpawo kuzwa kumulindi utagoli kwakazwa busi buli mbuli busi bwamvuto mpati, mpawo izuba amuuwo zyakasizigwa abusi buzwa kumulindi, 3 eelyo kuzwa mubusi kwakazwa chikwiikwi anyika, alimwi chakapegwa inguzu zilimbuli inguzu zyatubanze twanyika. 4 Chakaambilwa kuti chitanyonyooni bwizu pe anyika, nichiba chintu chimwi chisyuuka, nuuba musamu, pesi bantu abalikke aabo batajisi chisinizyo chaLeza ankumu zyabo, 5 chakazumizigwa kubeempya kwamyeezi ilimusanu, pesi peepe kubajaya, mpawo lweempyo lwacho lwakali mbuli lweempyo lwakabanze, nikaluma muntu. 6 Mpawo mumazuba aayo bantu bayooyanduula lufu alimwi tabakalujani pe, bayooyandisya kufwa, pesi lufu luyoobachija.

7 Muchiimo chikwiikwi chakalikozyene ambongolo zibambilwa inkondo, amitwe yazyo yakali mbuli misini yangolide, busyu bwacho bwakali mbuli busyu bwabamuntu, 8 susu lyacho lyakali mbuli masusu abanakazi, amenyo aacho akali mbuli menyo abalavu, 9 chakalijisi chikwabilizyo chilimbuli chachibulo chakaango, alimwi muzuzumo wamababa aacho akali mbuli nkalaki zyambongolo nyiingi zizuzaanina kunkondo. 10 Chakalijisi michila mbuli tubanze, yakali alumoola, alimwi mumichila eeyo chakalijisi inguzu zyakuchisa bantu kwamyeezi iilimusanu. 11 Chilijisi mbuli mwami wacho mungelo wamulindi utagoli, izina lyakwe muchi Hebburu utegwa nguAbbadoni, alimwi muchi Girikki utegwa nguApoliyoni.

12 Ipenzi taanzi lyakayinda, laanga, mapenzi aabili achiza.

13 Eelyo mungelo wachisanu awumwi wakalizya mweembo wakwe, mpawo ndakamvwa ijwi lizwa kumeja aane achipayililo changolide chilikunembo lyaLeza, 14 kalyaambila mungelo wachisanu awumwi iwakalijisi mweembo kaliti, "Wangununa baangelo bane baangidwe mumulonga mupati Yufuretizi." 15 Mpawo baangelo bane bakaangununwa aabo bakabambilidwe kwahola, kwazuba, kwamweezi akwamumwaaka, kukujaya chipanzi chimwi chazipanzi zitatu zyabantu. 16 Mweelwe wabasinkondo bambongolo wakali zyuulu zilimwaanda zyindulwidwe amakumi abili ndakamvwa mweelwe wabo. 17 Alimwi eechi mbumbubo mbundakabona mbongolo muchilengano changu, aabo basikuyeenzya bakalisamide zikwabilizyo zyakaango zyamisyobo isalala, awasikkaka, awamuntondo alimwi mitwe yambongolo yakali mbuli mitwe yabalavu, alimwi kumilomo yazyo kwakazwa mulilo, abusi asalufa. 18 Azeezi zyuumo zitatu, chipanzi chimwi kuzwa kuzipanzi zitatu zyabantu chakajeegwa, amulilo, abusi, asalufa kazizwa kumilomo yazyo mbongolo. 19 Nkaambo inguzu zyambongolo zilimumilomo yazyo amumichila yazyo, michila yazyo ilimbuli bazoka, imbongolo eezyo zyakalikubelesya mitwe eeyo kukupa zilonda kubantu.

20 Bamwi bantu, ibatakwe bakajeegwa azyuumo eezi, tee bakasanduka pe kumilimo yamaanza aabo nikuba kuleka kupiila mizimu amituni yangolide, yansiliva, yamukuba, yabbwe, ayachisamu, zitakonzyi kubona nikuba kumvwa nikuba kweenda, 21 taakwe nibakasanduka pe kubujayi bwabo, nikuba kubulozi bwabo, nikuba kumamambi aabo, nikuba kukubba kwabo.