Chiyubunuzyo 19

Sikweenzya Wambongolo Ituba

11 Eelyo ndakabona ijulu kalijulidwe, mpawo laanga, imbongolo ituba! Ooyo sikuyeenzya utegwa Usyomeka aKasimpe, alimwi mubululami ulabeteka akulwana nkondo zyakwe. 12 Meso aakwe ali mbuli ibangabanga lyamulilo, kumutwe wakwe kulimisini myiingi, alimwi ujisi izina litazibwi naba umwi kunze kwakwe alikke. 13 Usamide mudabba uchunchidwe mubulowa, alimwi izina ndyayitwa alyo litegwa, "Ndijwi LyaLeza." 14 Alimwi basilumamba bakujulu, bakasamide mudabba muteteete, utuba bu, bakamutobela ambongolo zituba. 15 Kuzwa kumulomo wakwe ugwisya panga libosya eelyo ndyajazya manyika, alimwi uyoobeendelezya amufunko walubulo, uyoolyata chikandilo chamasansa mubukali bwaLeza Singuzu Zyoonse. 16 Amudabba wakwe aachibelo chakwe uli azina lilembedwe kuti, Mwami wabami alimwi Mweendelezi wabeendelezi.

17 Eelyo ndakabona mungelo kayimvwi muzuba, mpawo wakayita ajwi pati kubayuni boonse aabo bawuluka mumulengalenga kati, "Muze, mubunganine kupobwe pati lyaLeza, 18 kuti mulye nyama yabaami, anyama yabapati bankondo, anyama yabantu bapati, anyama yambongolo ayabeenzyi bazyo, anyama yabantu boonse, boonse baangunukide abazike, boonse baniini abapati."

19 Eelyo ndakabona chinyama, abaami bamunyika, amakamu makamu abasinkondo babo kababungene kuti bachite nkondo atala ayooyo sikuyeenzya abasilumamba bakwe. 20 Alimwi chinyama chakajatwa, mpawo anchicho amusinsimi mubeji ooyo wakabeleka zitondezyo kunembo lyacho. (Bakeenena aabo bakali batambula impa yachinyama abaabo bakali kukomba chikozyanisyo chacho.) Aaba babili bakawalwa kabali bawumbulu mubbila lyamulilo eelyo lyuumpa amulilo utegwa wasalufa. 21 Alimwi bamwi boonse bakajeegwa apanga lyayooyo sikuyeenzya mbongolo, ipanga eelyo lyakali kuzwa mumulomo wakwe, mpawo abayuni boonse bakalya bakakkuta mibili yabo.