Chiyubunuzyo 7

Zyuulu Zilimwaanda Azyuulu Zilimakumi Aane Azyuulu Zine Zyabantu BaIzirayeri

1 Musule lyacheechi ime ndiJoni, ndakabona baangelo bane kabayiimvwi kuzyooko zine zyanyika, kabatabilila myuuwo ine yanyika, kuchitila kuti kutabi luuwo luwunga anyika nikuba kulwizi nikuba kufumbwa kutikiniya kumunsamu. 2 Mpawo ndakabona mungelo uumbi uyabutanta kujulu kuzwa kubuzwezuba, kajisi chisinizyo chaLeza upona. Alimwi wakoongolola ajwi pati kubaangelo bane aabo bakali pedwe nguzu zyakunyonyoona nyika alwizi, 3 wati, "Mutanyonyooni nyika niluba lwizi nikuba misamu, mane tukabikke chisinizyo chabalanda baLeza wesu ankumu zyabo."

4 Alimwi ndakamvwa mweelwe wabaabo babikkidwe zisinizyo balizyuulu zilimwaanda azyuulu zilimakumi aane azyuulu zine, kuzwa kumikowa yoonse yaIzirayeli, 5 zisinizyo zilizyuulu zilikkumi azyuulu zibili kuzwa kumukowa waJuda, zyuulu zilikkumi azyuulu zibili kuzwa kumukowa waRubbeni, zyuulu zilikkumi azyuulu zibili kuzwa kumukowa waGadi, 6 zyuulu zilikkumi azyuulu zibili kuzwa kumukowa waAsa, zyuulu zilikkumi azyuulu zibili kuzwa kumukowa waNafitali, zyuulu zilikkumi azyuulu zibili kuzwa kumukowa waManase, 7 zyuulu zilikkumi azyuulu zibili kumukowa waSimiyoni, zyuulu zilikkumi azyuulu zibili kuzwa kumukowa waLevi, zyuulu zilikkumi azyuulu zibili kuzwa kumukowa waIsakka, 8 zyuulu zilikkumi azyuulu zibili kuzwa kumukowa waZebbuluni, zyuulu zilikkumi azyuulu zibili kuzwa kumukowa waJozefu, zyuulu zilikkumi azyuulu zibili wazisinizyo kuzwa kumukowa waBbenjamini.