Atos 1

Cisyomezyo co Muuya Uusalala

1 ✝ 1:1 Luka 1:1-4. Ooyandwa Tiyofilasi,

Mubbuku lyangu lyokusaanguna ndakalemba azintu zyoonse Jesu zyaakatalikila kucita okwiisya, 2 mane kusikila buzuba mbwaakatolwa kujulu. Kono katana kutolwa kujulu, wakapa malailile kwiinda munguzu zyo Muuya Uusalala kubaalumi mbaakasala kuba baapositola bakwe. 3 Kwamazuba aali makumi one kuzwaciindi naakafwa, wakalibonya kweziindi zinji kubaapositola ape wakabatondezya munzila zisiyene-siyene kuteeti nconzyo muumi. Bakamubona ape wakaamboolaabo zyo Bwami bwa Leza. 4 ✝1:4 Luka 24:49. Iino nibakabungana antoomwi, wakabapa aaya malailila okuteeti, "Mutazwi mu Jelusalemu, kono mulindile cipego co Muuya Uusalala cindakamwaambila, eeco caakasyomezya Tata. 5 ✝1:5 Mateyo 3:11; Maako 1:8; Luka 3:16; Joni 1:33. Mbuli mbomuzi, Joni walikubbabbatizya amaanzi, kono kwainda mazuba maniini feela, muzoobbabbatizigwa o Muuya Uusalala."

Jesu Watolwa Kujulu

6 Mpoonyina baapositola nibabungene antoomwi o Jesu bakamubuzya kuteeti, "Mwami! Ino nako yako yokubukulusya Bwami*1:6 Kwiindila mubusinsimi bomu Cizuminano Ceciindi, bana Izilaili balikuyeeyela Mesiya kutalika bwami bomunyika mpoonyina we kali mwami wateni, mboonyina mbuli bulelo bwa mwami weciindi Deveti. Kono obubusinsimi bwalikwaamba azooza lwabili Jesu. kuli Izilaili yasika na?"

7 Mpoonyina Jesu wakabataba kuteeti, "Tamuzumizidwe kuziba ziindi Tata zyabikide kwiindila munguzu zyakwe. 8 ✝1:8 Mateyo 28:19; Maako 16:15; Luka 24:47-48. Kono Muuya Uusalala waakuza alindinywe, muzootambula nguzu zyokuba bakamboni bangu mu Jelusalemu, mu Judiya yoonse ape omu Samaliya mane kumamanino enyika." 9 ✝1:9 Maako 16:19; Luka 24:50-51. Naakamana kwaamba namu, kabamulangilide wakatolwa mujulu mpoonyina joba lyakamuvumba mane waleka kulibonya.

10 Kabacidongomwene kujulu naalikwiinka, mpoonyinaawo kwakalibonya baalumi*1:10 Aaba "baalumi" balibangelo. Iino aaba bangelo kubagama balikuboneka mbuli baalumi. bobile bazweete zizwato zituba kabaimvwi kumbali lyabo 11 okwaamba kuteeti, "Nobaalumi bomu Galileya! Ino niinzi nemwiimvwaawa kamulangide kujulu? Ooyu Jesu watolwa kujulu kuzwa kulindinywe uyoopiluka mboonyina mbumwamubona kaya kujulu."

Wakatola Cibaka ca Judasi

12 Mpoonyina baapositola bakapiluka ku Jelusalemu kuzwa ku Cilundu ca Oliva kasinzo kafwiifwi.*1:12 Mucigiliki, "musinzo womunsabata." Wali musinzo milawo ya Majuda nguyali kuzumizya bantu kweenda mu Nsabata, buzuba bwe Cijuda bokupumuna. 13 ✝1:13 Mateyo 10:2-4; Maako 3:16-19; Luka 6:14-16. Nibakasika mu taindi, bakanjila mungʼanda yomujulu oomo mubali kukala. Baliwo ngu Pita, Joni, Jemusi o Andulu, Filipo o Tomasi, Batolomeyo o Mateyo, Jemusi mwanaa Alufeyasi, Saimoni walikwiitwa kuteeti Sikulwanina Lwaanguluko, o Judasi mwanaa Jemusi. 14 Bakalipa mukukomba antoomwi camoyo omwi abanakazi bamwi, o Maliya banyina Jesu kubikilzya abazyalwanyinaa Jesu.

15 Mumazuba aayo, kwakaba muswangaano wabasyomi balikutandila kusika ku mwaanda amakumi obile. Mpoonyina Pita wakanyamuka okutalika kwaamboola kateeti, 16 "Nobazyalwama, alikweelede kuzuzikizigwa aayo Malembo akaambwa kujatikizya Judasi, ooyo wakasolwedela bantu bakaakujata Jesu. Eeci cakaambwa ciindi loko o Muuya Uusalala kwiindila mu Mwami Deveti. 17 Judasi waluumwi wesu kaambo walisalidwe kuteeti awe ajane cibaka mumusebezi wesu ooyu."

18 ✝ 1:18 Mateyo 27:3-8. Iino Judasi wakaula muunda amali ngaakajana mukucita cibi, oomo mwaakawida ansi cokutozya mutwe, okwaanduka da mpoonyina zyomwida lyakwe zyakawayukilaanze. 19 Bantu boonse bomu Jelusalemu bakalumvwa lufu lwakwe, mane mumusyobo wabo cibaka eeco bakacuuzika kuteeti Akeludama, caamba kuteeti, "Muunda we Gazi."

20 ✝ 1:20 Intembauzyo 69:25; 109:8. Pita wakazwidaanembo kateeti, "Eeci caakalemba Deveti mubbuku lye Ntembauzyo kuteeti,

‘Ngʼanda yakwe libe tongo,

kutakabi muntu naanga omwi uyookala mwateni.’

Ape cililembedwe kuteeti,

‘Amuleke muntu umbi acibweze cibaka cakwe comusebezi.’

21,22 ✝ 1:21-22 Mateyo 3:16; Maako 1:9; Luka 3:21; Maako 16:19; Luka 24:51. "Iino kokuteeti atusale mwaalumi umwi abweze cibaka ca Judasi. Ooyo uutisalwe kali umwi waabo baalumi balikujanika aswibo nako yoonse njaalikupona andiswe Jesu, kuzwa nako njaakabbabbatizigwa kuli Joni mane kusikila buya buzuba mbwaakanyamunwa kuzwa kulindiswe kutolwa kujulu. Ooyu mwaalumi weelede kuba kamboni wokubuka kwa Jesu antoomwi aswibo."

23 Kumane, bakadoma baalumi bobile. Umwi wali Josefa walikwiitwa kuteeti Bbasabbasi ape walikwiitwa kuteeti Jusitasi. Umwi wali Matiyasi. 24 Mpoonyina bakakomba kabateeti, "O Mwami! Uliizi myoyo yabantu boonse, iino tutondezye nguwasala akati kaaba bobile, 25 kuteegwa abweze musebezi o bwaapositola Judasi mbwaakasiya, naakainka kucibaka cimweelede." 26 Bamane, bakabaumina cisolo, eeco cakawida Matiyasi. Mpoonyina wakayungizigwa kubaapositola bali kumi awomwi.