Atos 3

Pita Waponya Mwaalumi Cihole

1 Bumwi buzuba Pita o Joni bakainka kulabba lye Ngʼanda ya Leza musikati anako yawoola yatatu yokukomba. 2 Iino kumanjililo eelabba lye Ngʼanda ya Leza aalikwiitwa kuteeti, "Manjililo Mabotu," kwali mwaalumi wali cihole kuzwa kubwana walikutolwaanga fateni buzuba obuzuba kuteegwa akaakukumbilile kubantu balikunjila mulabba lye Ngʼanda ya Leza. 3 Naakabona Pita o Joni kabayanda kunjila mulabba lye Ngʼanda ya Leza, wakabakumbila mali. 4 Bo bakamulangisisya, mpoonyina Pita wakamwaambila kuteeti, "Tulange!" 5 Wakabalanga, kayeeya kuteeti mweendi balamupa kwateni cimwi cintu. 6 Kono Pita wakateeti, "Mali tandikwe, kono ndilakupa cendijesi. Muzina lya Jesu Kilisitu woku Nazaleta, nyamuka weende!" 7 Mpoonyina wakamujata kujanza lyakwe lyokululyo okumugwasya kunyamuka. Mpoonya-mpoonya maulu engongoozi zyakwe zyakabeenguzu. 8 Kuzwaawo wakasotoka okwiima okutalika kweendeenda. Kumane wakanjilaabo mulabba lye Ngʼanda ya Leza kayoobweenda okusotooka okukalumbaizya Leza. 9 Bantu boonse bakamubona kayoobweenda okuyoobulumbaizya Leza. 10 Nibakamuziba kuteeti ngonguwe sikukumbilila walikujanikaanga Amanjililo Mabotu, boonse bakakomokwa loko alizyakamucitikila.