Atos 7

Sitivini Waliiminina Kunembo lye Nkuta Mpati ya Majuda

1 Mpoonyina Mupaizi Mupati wakabuzya Sitivini kuteeti, "Zyanconzyo zyebalimukukutamizya na?"

2 ✝ 7:2 Matalikilo 12:1. Mpoonyina Sitivini wakataba kuteeti, "Nobazyalwama amatata, amundimvwe! Leza wesu wobulemu wakalibonya kuli sikale wesu Abbulahamu. Muciindi eeco Abbulahamu wacilikukala mucilalaanda ca Mesopotamiya katana kulongela kutaindi lya Halani. 3 Mpoonyina Leza wakamwaambila kuteeti, ‘Siya babbululu bako enyika yokulinywe, wiinke kunyika eeyo njendiyookutondezya.’ 4 ✝7:4 Matalikilo 11:31; 12:4. Mpoonyina Abbulahamu wakazwa kucisi cabana Kaludiya okuyokala mu Halani. Kuzwaawo baisi nibakafwa, Leza wakamugwisya okumutola munyika eeyi njemukede mwateni. 5 ✝7:5 Matalikilo 12:7; 13:15; 15:18; 17:8. Kono aleeyo nako Leza taakwe naakamupa cibaka muleeyi nyika neciceya. Kono wakamusyomezye kuteeti inyika eeyi iyooba yakwe abolunyungu lwakwe bayooza kuzwa nguwe, nekuba kuteeti taakwe naajesi omwana. 6 ✝7:6 Matalikilo 15:13-14.Ape Leza wakamwaambila kuteeti, ‘Bolunyungu lwako bayookala mucisi cabamwi oomo mobayoodyamininwa mubuzike kwemyaaka iili myaanda yone. 7 ✝7:7 Kulonga 3:12. Kono ndiyoopa cisubulo kucisi eeco cebayoobelekela mbuli bazike, mpoonyina kumamanino bayoozwa mwateni okuzoondikomba omuno mucibaka.’ 8 ✝7:8 Matalikilo 17:10-14; 21:2-4; 25:26; 29:31—35:18. Amane Leza wakapa Abbulahamu cizuminano cali ecitondezyo cokupalulwa. Kumane, Abbulahamu wakazyala Isaka okumupalula kajesi mazuba aali lusele. Awe Isaka wakacita mboonyina namu kumwanaakwe Jakobo. Awe Jakobo wakacita mboonyina namu kubana bakwe bali kumi abobile, matata besu.

9 ✝ 7:9 Matalikilo 37:11; 37:28; 39:2, 21. "Iino bana ba Jakobo bakauzya Josefa muzyalwanyina mubuzike kaambo komunyono mpoonyina wakatolwa ku Ijipiti. Kono Leza wakali anguwe. 10 ✝7:10 Matalikilo 41:39-41. Wakamuvuna kumugwisya mumapenzaakwe oonse okumupa busongo cokuteeti naakainka kunembo lya Falawo, mwami woku Ijipiti, mwami wakabotelwa awe. Mpoonyina mwami wakamusala kuba mweendelezi we Ijipiti owengʼanda yo mwami yoonse. 11 ✝7:11 Matalikilo 42:1-2. Imwi nako kwakanjila nzala mucisi ca Ijipiti coonse eca Kenani, eeyi nzala yakeeta mapenzi loko cokuteeti basikale besu bakakubula kokujana cilyo. 12 Iino Jakobo naakamvwa kuteeti kuli cilyo ku Ijipiti, wakatuma bana bakwe basikale besu muciindi cokusaanguna kuteeti bakaakuule kwateni cilyo. 13 ✝7:13 Matalikilo 45:1; 45:16. Bazyalwanyina ba Josefa nibakainka ku Ijipiti nako yabili, Josefa wakalizibya kulimbabo mpoonyina mukwasyi wa Josefa wakazibwa kuli Falawo. 14 ✝7:14 Matalikilo 45:9-10, 17-18; 46:27. Mpoonyina Josefa wakalaizya kuteeti Jakobo, isi aze ku Ijipiti omukwasyi wakwe woonse. Antoomwi balikusika kumakumi aali ciloba a osanwe. 15 ✝7:15 Matalikilo 46:1-7; 49:33. Mpoonyina Jakobo wakainka ku Ijipiti, kwaakakufwida antoomwi abasikale besu. 16 ✝7:16 Matalikilo 23:3-16; 33:19; 50:7-13; Joshwa 24:32. Mpoonyina mafuwa aabo akapilusigwa kubali kukala ku Shekemu okuzikwa mucuumbwe cakaulide Abbulahamu amali kubana ba Hamo mu Shekemu.

17 ✝ 7:17 Kulonga 1:7-8. "Iino nako niyakaswena yokuteeti Leza azuzikizye zyaakasyomezyezye Abbulahamu, bantu besu bakavula loko mu Ijipiti. 18 Nikwakainda nako kwakazoolela mwami umwi watakezi zya Josefa. 19 ✝7:19 Kulonga 1:10-11; 1:22. Ooyu mwami waloolunya kubantu besu okubadyaaminina loko kubasungilizya kuteeti kabasowa twana tuvwanda kuteegwa tufwe. 20 ✝7:20 Kulonga 2:2. Muuciindi eeci Mozesi naakazyalwa, walimwana mubotu mumeensaa Leza. Mozesi wakalelwa mungʼanda yabaisi kwa myeezi yotatwe. 21 ✝7:21 Kulonga 2:3-10. Mpoonyina nibakamusowa, mwanaa Falawo musimbi wakamubweza okumupanga kuba mwana wakwe okumukomezya mbuli mwana wakwe. 22 Mpoonyina Mozesi wakaisigwa mubusongo boonse bwabana Ijipiti, ape wakaba mupati muzyaambo omuzicito.

23 ✝ 7:23 Kulonga 2:11-15. "Bumwi buzuba Mozesi naalaa myaaka iili makumi one, wakayeeya kuyoopotela babbululu bakwe bana Izilaili. 24 Naakabona muna Ijipiti kapenzya muna Izilaili, Mozesi wakainka kuyookwabilila muna Izilaili okupilusizya muna Ijipiti mukumujaya. 25 Mozesi walikuyeeya kuteeti bantu bakwe balaziba kuteeti Leza wakamutuma kweeta lwaanguluko kulimbabo, kono taakwe nibakaziba. 26 Buzuba bwakacilila, Mozesi wakabona baalumi bobile bana Izilaili kabalwana, mpoonyina wakasoleka kubavuna kabaambila kuteeti, ‘Nobaalumi, niinzi nemulwana kakuli muzyalwaamwi?’ 27 Mpoonyina sikucisa mweenzinyina wakatonta Mozesi okumubuzya kuteeti, ‘Ngwani wakakubika kuba mweendelezi omwaatuzi akati kesu? 28 Ino uyanda kundijaya mboonyina mbuwakajaya uulya muna Ijipiti jilo na?’ 29 ✝7:29 Kulonga 18:3-4. Mpoonyina Mozesi naakamvwa namu, wakacija okuyookala mucisi ca Midiya, mwaakali muzwakule. Ooko wakaakuzyala bana basyimani bobile.

30 ✝ 7:30 Kulonga 3:1-10. "Iino nikwakainda myaaka iili makumi one, mungelo wa Leza wakalibonya kuli Mozesi muciteyo calikuyaka mulilo munkanda ambali ecilundu ca Sinayi. 31 Iino Mozesi naakacibona eeci, wakakomokwa okuswena afwiifwi kuteegwa abonesesye. Mpoonyina wakamvwa jwi lya Mwami kaliteeti, 32 ‘Ndime Leza wabasikale benu, Leza wa Abbulahamu, Isaka o Jakobo.’ Mpoonyina Mozesi wakatuntuma okuyoowa loko ape taakwe naakasola kulanga kwateni. 33 Kuzwaawo, Mwami wakaambila Mozesi kuteeti, ‘Tubula manyantela aako kaambo aawo anyika poimwvi kulasalala. 34 Nconzyo ndakubona kupenzegwa kwabantu bangu balimu Ijipiti okutongela kwabo ndakumvwa. Ceciceeco cindaselukila kuteeti ndibanunune. Iino koza! Ndikutume ku Ijipiti.’

35 ✝ 7:35 Kulonga 2:14. "Ngweenya ooyu Mozesi ngonguwe ngubakakakide bana Izilaili kabateeti, ‘Ngwani wakakubika kuba mweendelezi omwaatuzi akati kesu?’ Ngonguwe ngweenyina Leza ngwaakatuma kuteeti abe musololi o mufutuli wabo kwiindila mujanza lyo Mungelo ooyo wakalibonya muciteyo ciyaka. 36 ✝7:36 Kulonga 7:3; 14:21; Myeelwe 14:33.Wakabagwisya mu Ijipiti kacita zikomosya ezitondezyo zyamaleele mu Ijipiti Aalwizi Lusalala omunkanda kwe myaaka iili makumi one. 37 ✝7:37 Detilonomo 18:15, 18. Ngonguwe ngoonyinooyu Mozesi wakaambila bana Izilaili kuteeti, ‘Leza uyoosala akati kenu musinsimi mboonyina mbwaakandisala mebo.’ 38 ✝7:38 Kulonga 19:1—20:17; Detilonomo 5:1-33. Mozesi ooyu ngonguwaape walaakati ke mbungano yabana ba Izilaili antoomwi abasikale besu munkanda aalya mungelo nakaamboolaawe Acilundu ca Sinayi. Aalya wakatambula majwi apa buumi kuteegwa azootupe ngawo.

39 "Kono basikale besu taakwe nibalikuyanda kumumvwida Mozesi, mane bakamukaka ape mumyoyo yabo batokomene kupiluka ku Ijipiti. 40 ✝7:40 Kulonga 32:1. Bakateeti kuli Aloni, ‘Tupangile ba leza batitusolwedele kaambo tatuzi zilimukucitika kuli uulya mwaalumi Mozesi, wakatugwisya munyika yoku Ijipiti.’ 41 ✝7:41 Kulonga 32:2-6. Momuciindeeci nibakapanga cibumbwa comunamani okupa zituuzyo kulicico okucita mukiti mukukuteka misebezi yamaanzaabo. 42 ✝7:42 Amosi 5:25-27. Mpoonyina Leza wakabafutatila okubaleka kuteeti kabakomba nyenyeezi zyokujulu mboonyina mbokulemdedwe mu bbuku lya basinsimi kuteeti,

‘Nobana Izilaili! Nconzyo tainsi ndime ngumwali

kupa zituuzyo ezipaizyo nimwali munkanda

kwe myaaka iili makumi one.

43 Ede nditeente ndimwalikukombela Moloki leza wenu ndimwayumwide

ape mwayumwine ecibumbwa ca Lefani leza wenu we nyenyeezi.

Eezi zyali zibumbwa zimwakalibumbila kuteeti kamuzikomba.

Iino ndiyandoomutandila kule kwiindilila Bbabbiloni.’

44 ✝ 7:44 Kulonga 25:9, 40. "Basikale besu bakajesi teente lyecizuminano munkanda. Eeli teente lyakapangwa obupange Leza mbwaakatondezya Mozesi. 45 ✝7:45 Joshwa 3:14-17. Kuzwaawo basikale besu bakalitambula teente kuzwa kumaisi. Mpoonyina Joshuwa naakasololela basikale besu kuyoolwanisya zisi Leza zyakatanda muleeci cibaka, bakaliyumunizya kucibaka cipya eeco. Bakaakukala alyo kusikila nako ya Deveti. 46 ✝7:46 2 Samuele 7:1-16; 1 Makani 17:1-14. Iino Deveti wakajana luzyalo mumeensaa Leza okukumbila kuteeti ayakile Leza wa Jakobo ngʼanda. 47 ✝7:47 1 Bami 6:1-38; 2 Makani 3:1-17. Kono Solomoni nguwakamuyakila.

48 "Nekuba kuteeti Leza Sijulu Wamajulu takali mumaanda akayakwa amaanza aabantu, mboonyina mbuli mbwaamba musinsimi kuteeti,

49 ✝ 7:49 Izaya 66:1-2. ‘Mwami waamba kuteeti, Julu cibbula cangu cobwami,

Nyika cilyatilo cangu.

Ino inga mwandiyakila ngʼanda yomusyobo nzi?

Ino cili cibaka cangu cokupumwida?

50 Ino talili janza lyangu lyakalenga zyoonseneni eezi na?’"

51 ✝ 7:51 Izaya 63:10. Sitivini wakaindilizya okuteeti, "Nobasimitwe miyumu, bajesi myoyo itasyomi amatwi aatamvwi! Mucita zibalikucita basikale benu, nako yoonse mukazya Muuya Uusalala. 52 Nguuli musinsimi ngubatakapenzya basikale benu? Mane basikale benu bakajayaabo bakaambilizya ciindi loko kuza kwa Uululeme, Mesiya, ngumwakaaba okujaya. 53 Mwakatambula Mulawo ooyo wakeetwa kulindinwe abangelo kono mwakakacilwa kuucililizya."

Kupotoolwa kwa Sitivini

54 Benkuta Mpati ya Majuda nibakamvwa namu, bakanyema loko okuluma ntwino kulinguwe. 55 Kono Sitivini kazwide Muuya Uusalala wakadongomwena kujulu okubona bulemu bwa Leza o Jesu kaimvwi kubbazu lyolulyo lwa Leza. 56 Mpoonyina wakateeti, "Amulange! Ndabona julu kalijukide Omwanoo Muntu kaimvwi kubbazu lyolulyo lwa Leza!"

57 Kono bakalisinka matwi okoongolola loko okuvwalookela antoomwi kulinguwe. 58 Mpoonyina bakamukuluntilaanze etaindi okutalika kumupotoola mabwe. Balikumutamizya bakatubula majansaabo okwaabika amaulu omusyimani walikwiitwa kuteeti Saulu. 59 Nibalikumupotoola mabwe Sitivini, wakakomba kateeti, "Mwami Jesu tambula muuya wangu!" 60 Mpoonyina wakafugama okoongolola kateeti, "Mwami utabapi mulandu acibi eeci!" Naakamana kwaamba namu, wakafwa.