Marcos 16

Kubuka kwa Jesu

1 Niyakainda Nsabata Maliya Magadalena o Salome o Maliya banyina Jemusi bakaula mafuta anunkilila kuteeti bakananike mubili wa Jesu. 2 Mujunzoonza loko lye Nsunda, nilyakaandula zuba *16:2 Muci Giliki: Mbuzuba bokusaanguna munsunda. bakanyamuka kuya kucuumbwe. 3,4 Kabacili munzila balikuyoobubuzyana kuteeti, "Ngwani utikatukunkulisizye bbwe kuzwa amulyango wecuumbwe?" Balikubuzyanya namu kaambo bbwe lyali pati loko. Mpoonyina bakalanga okubona kuteeti lyalikunkulisidwe kale. 5 Bakanjila mucuumbwe okujana musyimani*16:5 Muli Mateyo 28:2 omuli Luuka 24:4 lipandulula kuteeti ooyu muntu wali mungelo wakatumwa o Leza. Ooyu mungelo walikulibonya mbuli musyimani, Maako caakamupandulula namu. walikukede kululyo, wazweete jansi lituba buu! Mpoonyina bakayoowa okukomokwa loko.

6 We wakateeti, "Mutayoowi! Ndilizi mulangoola Jesu woku Nazaleta wakakankaminwa. Tawo kuno, wabusigwa. Amubone, aawa pubali kumubikide. 7 ✝16:7 Mateyo 26:32; Maako 14:28. Iino kamuya mukaambile Pita abasikwiiya bamwi kuteeti, ulikunembo lyenu uyoobuya ku Galileya, komutikamubonene mboonyina mbuli mbwakamwaambila."

8 Bakazwa kucuumbwe kabayoobuzuza oku kabatuntuma okuyoowa. Kaambo kobuyoofu taakwe ngubakaambila zili zyoonse.*16:8 Tulizi kuzwa kuli Mateyo 28:9-10 kuteeti Jesu wakadunukila banakazi aaba mukaindi kaniini. Mweendi wakacita namu kuteegwa batayoowi kwaambila basikwiiya mulumbe wo mungelo. Tulizi ape kuzwa muli Luka 24:9-11 kuteeti banakazi bakaambila basikwiiya ba Jesu mulumbe womungelo nibakazwa kucuumbwe, kono taakwe nibakabasyoma.

Mamanino amwi a Maako

Jesu wadunukila Maliya Magadalena

9 Mujunzoonza mu Nsondo naakabusigwa kuzwa kubafu Jesu wakasaanguna kudunukila Maliya Magadalena, ngwalinoonga watanda madimona aali ciloba mulinguwe.*16:9 Nikuba kuteeti malembo eciindi loko obile muci Giliki taajesi tumpango 9-20, malembo manji asyomwa alitujesi kale. Bunji bwaba sicikolo ce Bbaibbele bayeeya kuteeti tumpango ootu twakalembwa aumwi kutali Maako, kono tucibalwa kuteeti tulaabumboni bupati kuli zyakacitika kuzwa Jesu naakabuka kuzwa kubafu. Kulikukozyanya muli Maako 16:9-20 amuli Mateyo 28:9-10, 16-20, Luka 24:13-49, Joni 20:10-23, amu Misebezi ya Baapositola 1:6-8. 10 Maliya Magadalena wakainka kuyaambila beenzinyina ba Jesu balikuuside kabalila. 11 Kono nibakamumvwa kaamba kuteeti wamubona Jesu muumi, taakwe nibakamusyoma.

Jesu wadunukila basikwiiya bobile

12 Kuzwaawo Jesu wakadunukila basikwiiya bobile kabayoobuzwa mutaindi kuya mumiinzi, kono walikulibonya bumbi cokuteeti taakwe nibakamuziba. 13 Bakapiluka okuyoambila bamwi kono taakwe wakabasyoma.

Jesu Wadunukila Bali Kumi Awomwi

14 Kumamanino Jesu wakadunukila basikwiiya bali kumi awomwi kabalya. Wakabapatookela kaambo kokubula lusyomo okuyuma mitwe kaambo taakwe nibakabasyoma aabo bakamubona kabukide kuzwa kubafu. 15 ✝16:15 Misebezi 1:8. Mpoonyina wakabaambila kuteeti, "Kamuya mukakambooke makani mubotu kubantu boonse, nyika yoonse. 16 Kufumbwa utaakasyome okubbabbatizigwa uyofutulwa, ape kufumbwa uutakasyomi uyoopegwa mulandu. 17 Basyomi bayoopegwa nguzu zyokucita maleele, bayotanda madimona muzina lyangu, bayoamboola misyobo njebatazi, 18 bayoobweza nzoka okunywa zijaya kono taziyobajayi, bayoobika maanza aabo abaciswa mpoonyina bayoopona."

Mwami Jesu watolwa kujulu

19 ✝ 16:19 Misebezi 1:9-11. Mwami Jesu naakamanisya kwaamboola abo, wakatolwa kujulu okuyookala kubbazu lyobulemu lyolulyo lwa Leza. 20 Mpoonyina basikwiiya bakainka okuyookambooka koonse-koonse, ape Mwami wakabeleka abo okutondezya kuteeti zibalikukambooka zyanconzyo kwiinda mumaleele alikucitika.

Mamanino amwi eciindi

9 Banakazi bakainka kuyoopandulwida Pita abenzinyina mubufwiifwi zyoonse zibakaambilwa. 10 Kuzwaawo kwiinda muli basikwiiya, Jesu wakatuma mulumbe uusalala wolufutuko uutamani nyika yoonse.*16:10 Amwi malembo obusanduluzi bweciindi bulijesi aaya mamanino mafwiifwi kukumana kwa makani kuyungizizya kukumana kwa malamfu (9-20).