Neemias 8

Ezra Ɔka Mmara Ɔte Kaɖe

1 Ɔwi wɔ i maturi ka masi i ma simagɛ̃ ame ku ma Hebrise kuwa kɔdzɛva, Etanim ame ne, maturi ɔɖuɖu ɔba maasakanya lɛ ɔturi ɔwɛ̃ i ɔgbami wɔ i Ndu Kayogodɔ̃ katɔ̃. Maɣere Ezra, ratsɛrɛse sɔ ɔɖi Bosate Mmara mɛ ɔtã Israel mabi ɔkigu i Mose iso Ɔko ɔbɔ.

2 Ne ɔso sɔrɛdze Ezra, ɔsu Mmara ɔko ɔbɔ iturikuri nɛ losakanya anɔmi ame ku kuwa kɔdzɛva, iyi ɖeakatɔ̃ iso. Iturikuri ɔɖe marɛrɛ̃ i marɔ̃go gu mma loɔmɔ maawo ara karɔ̃ ɔnɔ. 3 Ezra ɔka Mmara teteree ɔtã ma i ɔgbami wɔ i Ndu Kayogodɔ̃ katɔ̃, ita i kaya isɛ iabo kakɔme ame i marɛrɛ̃, marɔ̃go gu mamama ma loawo ara karɔ̃ ɔnɔ anɔmi ame. Ne maturi ɔɖuɖu ɔkã Mmara Ɔko ika atsue kukaakɔ.

4 Ezra, ratsɛrɛse ɔya i kakɔlɛkɔ̃ bɛbɛɛbɛa ga mabara ala kukolo matã iyi iso. Matitia, Sema, Anaya, Uria, Xilkia gu Maaseya ɔya i ɔ̃ kuɖearɔ̃ iso, ne Pedaya, Misael, Malkiya, Xasum, Xasbadana, Zekaria gu Mesulam ana ɔya i ɔ̃ kubena iso ne.

5 Ezra ɔbusi ɔko. Maturi ɔɖuɖu to manya wũ alasɔ ɔya i ngbegɔ lokɔlɛ iɖo ma ɔɖuɖu. Gɔ ɔbusi ɔko ne maturi ɔɖuɖu ɔta maya. 6 Ezra ɔle Bosate, Ɣaa siare, ne maturi ɔɖuɖu ɔkɔlɛ nrɔɔ̃ kato mafɔ kanya sɔ, "Si iba ngbɔ! Si iba ngbɔ!" Kere ne makɔlɛ anɔ mafu i karɔ̃ masumu Bosate ne.

7 Gɔ ame maturi ɔɖuɖu ɔya i ma nsɛkɔ̃ i mmɔ ne, Yesua Bani, Serebia, Yamin, Akub, Sabetai, Xodia, Maaseya, Kelita, Azaria, Yozabad, Xanan gu Pelaya, mma ɔɖuɖu nɖe ma Levise, ɔbuai i maturi iso sɔ si manɔ mmara karɔ̃. 8 Maka Ɣaa Mmara i Ɔko ame, matã ikpa fiɛ ka maledza karɔ̃ iɖi kukaakɔ, si maturi aawo nnɛ mato maka karɔ̃ ɔnɔ kukaakɔ.

9 Kere ne Nexemia karɔ̃ nyɔisose, sɔrɛdze Ezra gu ratsɛrɛse gu ma Levise ma lote maturi ara ɔɣere kaɖe ɔɖuɖu sɔ, "Ikpɛnɛ nɛgbe se sekelee itã, Bosate, mi Ɣaa. Midaamararã so ɣee midaabiɛ kaku." Alasɔ maturi ɔɖuɖu ɔbiɛ kaku gɔ mato makã mmara atɔ̃me atsue.

10 Ne Nexemia ɔɣere ma sɔ, "Mikɛlɛ, si misɛ miaɖe araɖea sɛɛ si minɛ wain nyɛkɛã, si mitã mma nna kuira maaɖe. Ikpɛnɛ nɛgbe se sekelee itã bo Sate. Midaamararã so, alasɔ isoɣɔ ina i Bosate iso nɖe mi ɔle."

11 Ma Levise ɔɣɔra maturi ɔɖuɖu situ maɣɛ sɔ, "Milokanana, alasɔ ikpɛnɛ nɛgbe se sekelee, midamararã so."

12 Kere ne, maturi ɔɖuɖu ɔrui fiɛ makɛlɛ masɛ maaɖe ara manɛ ara, masese maturi mama aɖera fiɛ maɖe iyi mana isoɣɔ gbaã. Ala maɔnɔ ara wa maɣere ma karɔ̃ kukaakɔ.

Kukpakɛ Ame Iyiɖea

13 Iyi nyɔare i kuwa ame ne, ayomaturi makpakpa ɔɖuɖu gu masɔrɛdze gu ma Levise ɔsakanya i Ezra ratsɛrɛse kɔrɛ sɔ maakigu wũ i mmara atɔ̃me ame. 14 Masɛ maanya sɔ matsɛrɛ masɛ i Bosate Mmara mɛ ɔtã kaɖe iki i Mose iso sɔ, ikote sɔ Israel mabi aarui masɛ maawe i kukpakɛ ame ku iyiɖea ɔwi i kuwa kɔdzɛva ame, 15 si mapɛ itɔ̃me nɛgbe imomo i Yerusalem ɔmagɛ̃siare gu ma simagɛ̃ mama ame sɔ, "Mibɔrɛ mikɛlɛ kabemi karɔ̃ iso. Misɛ miatu nnɔĩ adzirikpai gu aputudziri akpai gu anya akpai gu sikɛ gu adziri mama akpai. Si misɛ miabara kukpakɛ gɔ ame miawe, lɛ kumɛgɔ matsɛrɛ masɛ i mmara ame awe."

16 Ne ɔso maturi ɔbɔrɛ makɛlɛ masɛ maatu adzirikpai mabɔ. Masu wã mabara kukpakɛ i ma mɔmɔ ayo asã iso, i ma anyamɔ, gu i Ɣaa iyo kasarɛkɔ̃ i Ndu Kayogodɔ̃ ɔgbami iso gu i Efrayim Kayogodɔ̃ kɔrɛ ɔgbami iso. 17 Ne ɔso ikuri ɔɖuɖu nɛ lose i kafɔrɔ̃ iso maba ɔpɛ kukpakɛ, ne masɛ maawe i kɔ̃ ame. Ita i Yosua, Nun ɔbibirɛrɛĩ ɔwi isɛ iabo iyi nɛmɔ iso ne, Israel mabi iiɖe iyi lɛgbe manya. Ne mana isoɣɔ gbaã.

18 Ita i iyi ɖeakatɔ̃ iso isɛ iabo iyi tsɔra iso ne, Ezra ɔka ara i Ɣaa Mmara Ɔko ame ku ikpɛnɛ biara. Maɖe iyiɖea ayi akɔdzɛ, iyi fafaranava iso ne, mabara iturikuri isarɛ, i asɛra kanya awe.