1 Ɲɔɲɔ Lon taminni kɔ, lahadi lon sɔɔma da la jonna, Mariyamu Makidalaka ni a tɔɔma Mariyamu wara kaburu ragbɛ diya. 2 I kɔrɔ duukolo yɛrɛyɛrɛra fanka la, baa Maari la mɛlɛka do bɔra sankolo rɔ, ka na kabakudun bɔ kaburu da la, ka a sii kabakudun wo kan. 3 A ye mɛlɛnmɛlɛnna ikomin sanfɛrɛn. A la duruki gbɛni pepe. 4 Mɔɔ mɛnilu tɛrɛ ye kaburu lakɔrɔsila, woilu silanda mɛlɛka yɛ kojuuya fɔɔ ka be duu ma ka kɛ ikomin mɔɔ saniilu.

5 Mɛlɛka ka a fɔ musoilu yɛ ko: «Ai kana silan. N ka a lɔn ko ai ye Isa le ɲininna, mɛn gbɔngbɔnni tɛrɛ jiri kan. 6 A tɛ yan, baa a ra wuli ikomin a ka a fɔ ɲa mɛn ma. A su lani tɛrɛ yɔrɔ mɛn dɔ, ai ye na wo ragbɛ. 7 Wo kɔ rɔ, ai borimantɔ ye wa a fɔ a la karandenilu yɛ ko a ra wuli ka bɔ saya rɔ. Ko a watɔ ai makɔnɔla Kalile, ai ri a yen ye. A ragbɛ. N nani mɛn fɔ kanma ai yɛ, wo le wo ri.»

8 Musoilu ka ii kaliya ka bɔ kaburu da la ka wa. Ii silanni, kɔni sɛwa ba tɛrɛ ye ii rɔ. Ii borimantɔ wara ka kibaro wo bɛɛ fɔ karandenilu yɛ. 9 Ii watɔla, Isa barara bɔla ii ɲɛfɛ ka ii labɛn. A ka a fɔ ko: «N ye ai fola.» Ii ka ii madon a la, ka a sen mira ka a bato. 10 Isa ka a fɔ ii yɛ ko: «Ai kana silan. Ai ye wa a fɔ n badenmailu yɛ ko ii ye wa Kalile. Ko ii ri n yen ye.»

11 Ka musoilu to sila kan ka wa, kaburu kɔrɔsiba doilu wulira ka wa so kɔndɔ. Ko mɛnilu kɛni, ii wara wo bɛɛ fɔ sarakalasela kuntiilu yɛ. 12 Sarakalasela kuntiilu ni mɔɔbakɔrɔilu wara i ɲɔɔn yen ka kuma wo ma. Ii ban mɛn kɛni kumala, ii ka wodi siyaman di tɛsidiilu ma, 13 ka a fɔ ii yɛ ko: «Ai ye a fɔ mɔɔilu yɛ ko: ‹Ka an to sunɔɔ rɔ su rɔ, Isa la karandenilu nara ka a su ta ka wa a ri.› 14 Ni ko ɲin fɔra mara kunnasiila yɛ, an di kuma a yɛ, ka wo kunko bɔ ai ma.» 15 Tɛsidiilu ka wodi mira. A fɔra ii yɛ ɲa mɛn ma, ii wara wo kɛ. Wo rɔ, tariku wo ye fɔla Judiyailu tɛma hali bi.

16 Awa, karanden tan ni kelen wara Kalile. Isa ka koyinkɛ mɛn ko fɔ ii yɛ, ii wara ye. 17 Ii ka Isa yen ye tuma mɛn na, ii ka a bato, kɔni doilu sikara. 18 Isa ka a madon ii la, ka a fɔ ii yɛ ko: «Se ra di n ma fen bɛɛ kan harijeene rɔ, a ni duukolo kan. 19 Wo le rɔ, ai ye wa mɔɔilu kɛ n na karandenilu ri siyailu bɛɛ tɛma. Ai ye ii sun ji rɔ Fa Alla tɔɔ ni Dencɛ tɔɔ ni Nii Sɛniman tɔɔ rɔ. 20 N ka jamarili fen fen di ai ma, ai ye ii karan woilu la, sa ii ri woilu labato. Ai ɲa lɔ! N ye ai dafɛ tuma bɛɛ, fɔɔ ka wa se dunuɲa laban ma.»