1 तेबे तुसे आपणे पाईया खे मेरे लोक ओर आपणियां बईणी खे दयावान बोलणा।

2 मेरे बच्चेयो, आपणी माया रे खलाफ मेरिया तरफा ते दोष लगाओ। से एबे मेरी लाड़ी नि रई, ओर ना एबे आऊँ तेसा रा लाड़ा ए। तेसा खे बोलो कि से वेश्या बणी कि नि रओ। ओर आपणे शरीरो खे दखाणे वाल़े टाल्ले खोली दे। 3 जे से एड़ा करना बन्द नि करोगी, तो मां से नांगी करी देणी जेड़ी से जम्मणे रे दिने थी। मां से रेगिस्तानो जेड़ी बणाई देणी। से सुकी जमीना जेड़ी ऊई जाणी, ओर मां से त्यायी काई देणी। 4 मां तेसा रे बच्चेया पाँदे बी कोई दया नि करनी, कऊँकि सेयो व्यभिचारो रे बच्चे ए। 5 तिना रिये माये वेश्या जेड़े काम करी राखे, तिने मेरा परोसा तोड़ी राखेया, ओर तिने बऊत ई शर्मा वाल़े काम करी राखे। तिने बोलेया, "आसा आपणे देवतेया गे नठी जाणा जो आसा ते प्यार करोए। सेयो ई ए जो आसा खे खाणा पाणी देओए ओर ऊना ओर रेशमो रे टाल्ले ओर जैतूनो रा तेल ओर पीणे खे शराब देओए।" 6 तो ये एड़ा ऊणा मानो आऊँ तेसा री बाटा दे कांडेया वाल़े बाड़ लगाई लगी रा। ओर तिना रे चऊँ कनारे दवाल खड़ी करने लगी रा ताकि तेसा खे बाट नि मिलो की केई जाणा। 7 तेसा खे आपणे प्यार करने वाल़ेया पीछे चलदे ऊए बी सेयो नि मिलणे ओर से तिना टोल़ो गी बी, तेबे पनि मिलणे। तेबे तेसा बोलणा, "एबे मां आपणे पईलके लाड़े गे फेर वापस चली जाणा, तेस बखते मेरी जिंदगी आजो ते बऊत अच्छी थी।"

8 तेसा खे पता नि था कि आऊँ ई से माणूं ए जिने तेसा खे से सब कुछ दित्तेया जेते री तेसा खे जरूरत थी। मैं तेसा खे नज्ज, नया शराब ओर जैतूनो रा तेल दित्तेया। मैं ई तेसा रा सूईना चाँदी बी बढ़ाया पर तेसे तिना रा इस्तेमाल मेरे बजाए बाल देवतेया री पूजा करने खे कित्तेया। 9 पर एबे मां पक्केया दा नज्ज ओर नवां शराब तिना ते लई लणा, जो आऊँ हर फसला रे मौसमो दे उदारता ते देया करुँ था। मां ऊन ओर रेशमो रे टाल्ले बी वापस लई लणे जो आऊँ तिना रे नांगे शरीरो खे टखणे खे देऊँ था। 10 एबे मां तेसा रे दोस्ता सामणे तेसा रा व्याभिचार सामणे ल्याऊणा, ओर कोई बी तेसा खे मेरे आथो ते बचाई नि सकणा, 11 मां तेसा रे सारे त्योआर बन्द कराई देणे जिना खे मनाणे खे मैं पईले बोलेया था। एबे हर साल, हर मीन्ने नवें चाँदो ओर अफ़्ते रे रामो रे दिनो रे त्योआर बन्द करी देणे। मां सेयो सब तार्मिक त्योआर खत्म करी देणे। 12 मां तेसा रे अंगूरा रे बगीचे ओर दाऊगल़े रे डाल़ नाश करी देणे, जिना रे बारे दे से बोलो थी तेसा रे प्यार करने वाल़ेया तेसा खे तेसा री सेवा करने खे देई राखे ए। मां तेसा रे अंगूरा रे बगीचे ओर फला रे बगीचे बण बणाई देणे, बणो रे जानवरा सेयो नाश करी देणे। 13 सेयो दिन जेबे से बाल देवतेया खे तूप बाल़ो थी ओर बाल़ू ओर आर पईनी की आपणे प्यार करने वाल़ेया पीछे जाओ थी ओर माखे पूली जाओ थी, तिना दिना री सजा मां तेसा खे देणी, यहोवे री येई बाणी ए।

14 पर सुणो! एक दिन मां तेसा साथे खरिया गल्ला करनिया। मां से बणो दे लई जाणी। मां तेसा खे बोलणा कि आऊँ तेसा ते बऊत प्यार करूँआ। 15 तेती मां तेसा खे अंगूरा रे बगीचे देणे जो तेसा गे पईले थे। ओर आकोरो री तराई एक एड़िया जगा दे बदली देणी जेती उम्मीद ए। से तेती मां साथे खुश रणी, जेड़ी से जवानिया दे खुश थी। येई से बखत था जेबे से मिस्रो ते बारे आई थी। 16 ओर यहोवे री ये बाणी ए कि तेस बखते तां माखे लाड़ा बोलणा, तां फेर कदी बी माखे "बाल देवता मेरा स्वामी" नि बोलणा।

17 मां तिना खे बालो रा नाओ लणे नि देणा। ओर ना तिना फेर बालो रा नाओं लणा। 18 तेबे मां तेस दिने इस्राएल देशो रिया तरफा ते बणो रे जानवर, सर्गो रे पंछी ओर जमीना दे लूरने वाल़े जीव-जन्तुआ साथे वाचा बानणी। मां तरतिया पाँदा ते लड़ाईया रे अथियार, धनुष ओर तलवार तोड़ी देणे। मां तुसा खे बिना फिकरो री नींज देणी। 19 मां सदा खे तूँ आपणी लाड़ी बनाणे री प्रतिज्ञा करनी ओर ये प्रतिज्ञा तर्म, न्याय, करूणा ओर दया साथे करनी। 20 ये सच्चाईया साथे करी जाणी ओर तां यहोवा जाणी लणा। 21 तेस बखते मां तेसरी गल्ला रा ज्वाब देणा, यहोवे री ये बाणी ए। मां सर्गो खे आज्ञा देणी कि से तरतिया पाँदे बर्खा करो, 22 ओर तरतिया नज्ज, नया शराब ओर ताजे तेलो री सुणी की तिना खे ज्वाब देणा ओर तिना यिज्रेलो खे ज्वाब देणा। 23 मां आपणे लोक देशो दे बसाणे ओर सेयो तागतबर बनाणे। मां लोरूहामा पाँदे दया करनी जिना खे लोअम्मी बोलेया जाओआ, ओर जो लोक मेरे नि ए, बोलेया जाओआ, मां तिना खे बोलणा, "तुसे मेरे लोक ए" ओर तिना ज्वाब देणा ओ मेरे परमेशर।