1 योशिय्याह राज़े यहूदा प्रदेश ते यरूशलेम नगरेरे सारे बुज़ुर्ग एप्पु कां कुजेइतां अकोट्ठे किये। 2 तैखन राज़े, यहूदा प्रदेशेरे सारे लोकन ते यरूशलेम नगरेरे सारे रानेबाले ते याजक ते नेबन बल्के निक्‍के बड्डे सारे प्रजारे लोक साथी नेइतां यहोवारे भवने मां जेव। तैस ज़ै करारेरी किताब यहोवारे भवने मां मैल्होरी थी, तैसेरी सब गल्‍लां पेढ़तां शुनेई। 3 तैखन राज़े खम्भे कां खड़े भोइतां यहोवा कां इस उमीदरो करार कियो: कि अवं यहोवा पत्ती-पत्ती च़लेलो, ते अपने सारे मन ते सारे प्राणे सेइं तैसेरो हुक्म, ते हदायतां ते विधि हमेशा मन्तो रेइलो, ते इस करारेरी सैरी गल्‍लां ज़ैना इस किताबी मां लिखोरिन पूरी केरेलो; ते सब लोक करारे मां शामल भोए।

4 तैखन राज़े महायाजक हिल्किय्याह ते होरो याजक ज़ेसेरो दर्जो तैस करां घट थियो ते सेन्तरन हुक्म दित्तो कि ज़ेत्रां भांडां बाल देबते ते अशेरा देबी ते अम्बरेरे सारे तारां केरे लेई बनोरेन, तैना सब यहोवारे भवने मरां केढतां आनां। तैखन तैनी यरूशलेम नगरे मरां बेइर किद्रोनेरे वैदी मां फुकतां तैन केरि मांज़न बेतेल नगरे मां पुज़ाई। 5 ज़ैना पुजारी यहूदारे राज़ेईं यहूदारे नगरां केरे मूरती केरि उच्‍चे ठैरन मां ते यरूशलेम नगरेरे आसे पासेरे ठैरन मां धूप बालनेरे लेई ठहरावरी थी, तैना ते ज़ै बाल ते दिहाड़ो चाँदनी, राशिचक्र ते अम्बरेरे सारे तारां केरे लेई धूप बालते थिये, तैना भी राज़े हटाए। 6 तै अशेरा देबरी मूरती यहोवारे भवने मरां केढतां यरूशलेम नगरेरे बेइर किद्रोन वैदी मां नेइतां तैट्ठी फुक्‍की छ़डी, ते पीहतां तैसेरो चूरो बनाव। तैखन तै चूरो आम मैन्हु केरे कब्रन पुड़ शारो। 7 फिरी तैनी अशेरा देबरे मन्दरां केरे पुरुषगामी लोकां केरे कमरे, ज़ैड़ी कौन्शां अशेरा देबरे लेई पड़दे बुनती थी, तैना योशिय्याह राज़े बिछ़ोड़ाए। 8 तैनी यहूदारे सारे नगरन मरां याजक कुजेइतां गेबा नगरे करां बेर्शेबा नगरे तगर तैना मूरती पुज़ारी उच्‍ची ठारां ज़ैड़ी तैन याजकेईं गुग्गल बालेरो थियो, अशुद्ध कियूं; ते ज़ै ठार नगरेरे यहोशू नंव्वेरे हाकिमेरे फाटके पुड़ थी, ते नगरेरे फाटकेरे अन्तर गाने बालां केरे बांए पासे थी, तैना भी तैनी बिछ़ोड़ी छ़ेडी। 9 फिरी भी उच्‍चे ठारां केरे याजक यरूशलेम नगरे मां यहोवारी वेदी कां न थिये एज्जी बटते, पन तैना अखमीरी रोट्टी बाकी याजकन सेइं साथी खाते थिये। 10 फिरी योशिय्याह राज़े तोपेत जगाह ज़ै हिन्नोम खानदानेरे लोकां केरे वैदी मां थी, अशुद्ध की, ताके कोई अपने मट्ठे या कुइये मोलेक* देबतेरे लेई अग्गी मां बलि केरतां न च़ाढ़े। 11 ज़ैना घोड़े यहूदारे राज़ेईं दिहाड़े जो अर्पण कियोरे थिये, यहोवारे भवनेरे दारे पुड़ नतन्मेलेक नंव्वेरे खोजेरे बेइरीं भवने मां रखोरे थिये, तैना तैनी दूर किये, ते दिहाड़ो देबतेरे रथ अग्गी मां फुक्‍के। 12 ज़ैना वेदी यहूदारे राज़ेईं आहाज राज़ेरे छती पुड़ बनेवरी थी, ते ज़ैना वेदी मनश्शे यहोवारे भवनेरे दूईये अंगन मां बनेवरी थी, तैना राज़े डोलतां पीहतां तैन केरो चूरो बनाव ते किद्रोन वैदी मांजो शारो। 13 ज़ैना उच्‍ची ठारां इस्राएलेरे राज़े सुलैमाने यरूशलेमेरे पूरबेरे पासे ते विकारी नंव्वेरे पहाड़ेरे दक्षिणेरे पासे, अश्तोरेत नंव्वेरे सीदोनी लोकां केरि भिट्टी देबी, ते कमोश नंव्वेरे मोआबी लोकां केरो देबतो, ते मिल्कोम नंव्वेरे अम्मोनी केरे देबतां केरे लेई बनेवरे थिये, तैना योशिय्याह राज़े अशुद्ध केरि दित्ते। 14 तैनी देबतां केरि घोड़ां केरि मूरती ट्लोड़ी ते अशेरा देबरी मूरती केट्टी, ते तैन केरे ठैरी मैन्हु केरि हेड्डी भेरि।

15 फिरी बेतेल नगरे मां ज़ै वेदी थी, ते ज़ै उच्‍ची जगाह नबातेरे मट्ठे यारोबामे बनेवरी थी, ज़ैनी इस्राएली लोकन करां पाप करेवरो थियो, तै वेदी ते तैसेरी उच्‍ची जगाह भी तैनी बिछ़ोड़ी छ़डी, ते उच्‍ची जगाह फुकतां चूरो बनाई ते अशेरा देबरी मूरती फुक्‍की छ़डी। 16 तैखन योशिय्याह राज़े फिरतां तैड़ी पहाड़ेरी कब्रां लेही, ते लोकन भेज़तां तैन कब्रन मरां हेड्डी केढी, वेदी पुड़ फुकतां तै अशुद्ध की। इन यहोवारे तैस वचनेरे मुताबिक भोवं, ज़ैन परमेशरेरे तैनी नेबे कुजेइतां ज़ोवरू थियूं ज़ैनी इना गल्‍लां केरि चर्चा कियोरी थी। 17 तैखन योशिय्याह राज़े पुछ़ू, "ज़ै खम्भो मीं लेइहोते, तै कुने?" तैखन नगरेरे लोकेईं तैस सेइं ज़ोवं, "तै परमेशरे तैस भक्त मैन्हेरी कब्रे, ज़ैनी यहूदारां एइतां एस कम्मेरी चर्चा ज़ोरे सेइं कियोरी थी, ज़ैन तीं बेतेल नगरेरे वेदी सेइं कियूं।" 18 तैखन तैनी ज़ोवं, "तैस छ़ेडी देथ; तैसेरी हेड्डी कोई न हटाए।" तैखन तैनेईं तैसेरी हेड्डी तैस नेबेरी हेड्डन सेइं साथी राने दित्ती, ज़ै सामरिया नगरे मरां एवरो थियो। 19 फिरी उच्‍ची ठारां केरे भवन सामरियारे नगरन मां थिये, ज़ैना इस्राएलेरे राज़ेईं बनेइतां यहोवारो क्रोध भड़कावरो थियो, तैना सभे योशिय्याहे बिछ़ोड़ी छ़डे; ते ज़ेन्च़रे-ज़ेन्च़रे तैनी बेतेल नगरे मां कियोरू थियूं, तेन्च़रे-तेन्च़रे तैनी भी कियूं। 20 तैना उच्‍ची ठारां केरे ज़ेत्रे याजक तैड़ी थिये तैना सब तैनी वेदी पुड़ बलि किये ते तैन पुड़ मैन्हु केरि हेड्डी फुकतां यरूशलेम नगरे जो वापस जेव।

21 योशिय्याह राज़े सैरी लोकन जो हुक्म दित्तो, "इस करारेरी किताबी मां ज़ैन किछ लिखेरूए, तैसेरे मुताबिक अपने परमेशर यहोवारे लेई फ़सह तिहार मनाथ।" 22 एरू तिहार न त न्यायी लोकां केरे वक्ते मां मनाव जेवरू थियूं ज़ैना इस्राएली लोकां केरो न्याय केरते थिये, ते न इस्राएल ते यहूदारे राज़ां केरे दिहाड़न मां मनाव जेवरू थियूं। 23 पन योशिय्याह राज़ेरे हुकूमतरे अठारोवं साले मां यहोवारे लेई यरूशलेम नगरे मां फ़सह तिहार मनावं जेवं। 24 फिरी जैदू टूनो केरनेबाले, भूत-सिद्ध केरनेबाले, कुल देबते, मूरती ते ज़ेत्री भिट्टी चीज़ां यहूदा ते यरूशलेम नगरे मां ज़ैड़ी कोन्च लेइहोए, तैना सब योशिय्याह इस इरादे सेइं नाश किये, कि कानूनेरी ज़ैना गल्‍लां तैस किताबी मां लिखोरी थी ज़ैना हिल्किय्याह महायाजके यहोवारे भवने मां मैल्होरी थी, तैन तै पूरी केरे। 25 तैसेरो ज़ेरो न त तैस करां पेइले कोई एरहो राज़ो भोव ते न तैसेरां बाद एरहो कोई राज़ो अव, ज़ै मूसेरे पूरे कानूनेरे मुताबिक अपने पूरे मने ते पूरी जान ते पूरे ताकती सेइं यहोवारे पासे फिरोरो भोए।

26 फिरी भी यहोवारो भड़कोरो क्रोध ठंडो न भोव, ज़ै एस वजाई सेइं यहूदारे लोकन पुड़ भड़कोरो थियो, कि मनश्शे यहोवा क्रोधे पुड़ क्रोध दुवाव। 27 यहोवाए ज़ोवरू थियूं, "ज़ेन्च़रे मीं इस्राएल अपने सामनेरां दूर कियो, तेन्च़रे यहूदा भी दूर केरेलो; ते ई यरूशलेम नगरे, ज़ैन मीं च़ुनू ते ई भवन ज़ेसेरे बारे मां मीं ज़ोवं, कि इस मां मेरे नंव्वेरी तारीफ़ इड़ी भोल्ही, तैसेरे खलाफ अवं हथ खड़ो केरेलो।" 28 योशिय्याहेरां बाकी सब कम्मां ज़ैना तैनी कियां, तैना सब यहूदारे राज़ां केरि किताबी मां लिखोरन। 29 तैसेरे दिहाड़न मां नको राज़ो मिस्रेरो राज़ो अश्शूरेरे राज़ेरी मद्दत केरने फरात दरिया तगर जेव त योशिय्याह राज़ो भी तैसेरो मुकाबलो केरनेरे लेई जेव, ते नको राज़ो च़लते तै मगिद्दो नगरे मां मारो। 30 तैखन तैसेरे अधिकैरेईं तैसेरी लाश एक्‍की रथे पुड़ च़ैढ़तां मगिद्दो मरां नेइतां यरूशलेम नगरे मां पुज़ाई ते तैसेरी कब्री मां रख्खी। तैखन आम लोकेईं योशिय्याहेरू मट्ठू यहोआहाज नेइतां तैसेरू अभिषेक कियूं, ते तैसेरे बाजी केरि जगाई पुड़ राज़ो बनाव।

31 ज़ैखन यहोआहाज राज़ो बनो, तैखन तैसेरी उमर 23 साल थी, ते तैनी ट्लाई महीने यरूशलेम नगरे मां राज़ कियूं; ते तैसेरी अम्मरू नवं हमूतल थियूं, ज़ै लिब्ना नगरे मां रानेबाले यिर्मयाहेरी कुई थी। 32 तैनी भी अपने दादे-पड़दादां केरि ज़ेरि यहोवारे नज़री मां बुराई की। 33 तै नको राज़ो हमात मुल्खेरे रिबला नगरे मां कैदी बनाव, ताके तै यरूशलेम नगरे मां राज़ न केरि सखे, फिरी तैनी मुल्खे पुड़ लगभग 3400 किल्‍लो चाँदी ते लगभग 35 किल्‍लो सोन्नेरो जुर्मानो कियो। 34 तैखन फ़िरौन-नकोए योशिय्याहेरू मट्ठू एलयाकीम तैसेरे बाजी योशिय्याहेरे जगाई पुड़ राज़ो बनाव, ते तैसेरू नवं बेदलतां यहोयाकीम रख्खू; पन यहोआहाज तैनी नेव। ते यहोआहाज मिस्र मुल्खे मां गेइतां तैड़ी मेरि जेव। 35 यहोयाकीमे नको राज़े जो तै चाँदी ते सोन्नू त दित्तू पन मुल्खे पुड़ एल्हेरेलेइ कर लाव कि नको राज़ेरे हुक्मेरे मुताबिक तैस देइ सखे, मतलब मुल्खेरे सारे लोकन करां ज़ेत्रो ज़ैस पुड़ कर लगो तेत्रो लाव, तेत्री चाँदी ते सोन्नू तैस करां नको राज़े जो देनेरे लेई नेव।

36 ज़ैखन यहोयाकीम राज़ केरने लगो, तैखन तैसेरी उमर 25 साल थी, ते तैनी 11 साल यरूशलेम नगरे मां राज़ कियूं, तैसेरी अम्मरू नवं जबीदा थियूं ज़ै रूमा नगरेरे रानेबाले पदायाहेरी कुई थी। 37 तैनी अपने दादे-पड़दादां केरि ज़ेरि यहोवारे नज़री मां बुराई की।