1 Yɛ ɛ́ mam Pɔl, mot-lwoma ɛ Yezu Klisto tɔ ɛkwosak ɛ Zɛɛb, bis nɛ Timote mɔn-nyɛɛg’ena ɛ kwyal mɛkana mak.

Bis eeswos bot ɛ zɛɛga mendjaala di pɛ kyee ghaada Koolɛt ɛ, nɛ bot ɛ kyee dik Akayi djas di eduwal Zɛɛb ɔ. 2 Beta náá, Zɛɛb Sɛɛg’enaka nɛ Ghɛŋ Yezu Klisto djɛ bin enɛm nɛ embɛɛ, nɛ egwyem bɛ.

3 Djhooduwalka Zɛɛb, Sɛɛg ɛ Ghɛŋ’enaka Yezu Klisto. Nyɛ ɛ́ Sɛɛg’enaka mot di nɛ ghoŋ nɛ bot ɔ. Nyɛ ɛ́ Zɛɛb mot di edjɛ bot mɛghaaz sok membi mɛ etɛp djas ɔ. 4 Nyɛ nɛ djɛ mena mɛghaaz tɔ membi mɛ mezuk djas, etɛɛ náá, mena needjɛka pe bɛdhiiti bot ɛ di tɔ mezuk ɔ mɛghaaz. Yɛ bɛ náá, mena ɛ́ nɛ mɛghaaz mɛ ɛsa deenek ɔɔ, yɛ ɛ́, etɛɛ náá, Zɛɛb ɛ nanyɛl ɛdjɛ bis mɛghaaz mɛ tak sok. 5 Dáa mena di ezukeka ɛbuɛpe tyee wat nɛ dáa Klisto nazuk ɛ, deenek, Klisto ɛ́ waadjɛka mena mɛghaaz mɛ. 6 Yɛ bɛ náá, bis ɛ́ tɔ mezuk ɔɔ, yɛ ɛ́, etɛɛ náá, bi neebela mɛghaaz nɛ tsik. Yɛ bɛ náá, bis eebela mɛghaaz ɔɔ, yɛ ɛ́, etɛɛ náá, bi neebela mɛghaaz. Mɛghaaz mɛ tak ɛ́ waadjɛ bin ghwyil ɛmaad membi mɛ mezuk mɛ bi di ebee ɛ. 7 É di’enek, bis ɛ́ nɛ boo ɛbwaalel nɛ nen. Etɛɛ náá, bis nɛ gu náá, dáa bi di ezuk mbi mezuk mɛ wat nɛ nes ɛ, bi ɛ́ waabela mbi mɛghaaz mɛ zedjɛaa bis ɛ.

8 Bɔn-nyɛɛg, bis kwyɛl ɛ́ náá, bi gu mbi mezuk mɛ bis nabee tɔ eghaada kyee dik Azi ɛ. Yɛ ɛ́ penek ɛ bis naboma nɛ mezuk dhaa nyel. Yɛ ɛ́ tsɛɛtsɛ náá, bis nabɛ ɛ́ ààkabɛ nɛ ɛbwaalel náá, bis ɛ́ waatsak. 9 Deenek, bis nabɛ ɛ́ nɛ egeka náá, bis moo ɛ́ tɔ feŋ ɛsyee. Ye nasael deenek ɛ́, etɛɛ náá, bis needi ààwa ɛbwaalel kɔ mɛnyel mes met. Tin, ye goka ɛ́, bis wa ɛbwaalel ɛ les nɛ Zɛɛb, mot di gomal bot ɔ. 10 Yɛ ɛ́ nyɛy ɛ napɛk bis tɔ mbi yenek ɛsyee, nyɛ ɛ́ kwaabaazopɛk bis. Nɛ tsɛɛtsɛ, bis ɛ́ nɛ ɛbwaalel nɛ nɛ náá, nyɛ waabaapɛk bis. 11 Tin, biyɔ pe, bi nɛ kwyee bis é sok bi di edjaala Zɛɛb étɛp’es ɛ. Étɛp tak ɛ, bɛtɛ nɛ bot di ebulal bhɔɔ nɛ Zɛɛb kɔ ɛsu ɛ mɛpɛka mɛ nyɛ napɛk bis tɔ ɛsyee, nɛ dáa nyɛ di eyala nɛ mendjaala mɔɔ étɛp’es ɛ.

12 Gwakeka sa bis di egoka nɛ ɛghɛɛ nyel nɛ yɛ ɛ. Eziisa bis ɛpelyaal bis popoopwon náá, bis eekɛ ɛnyɔɛpe tɔ epiki sama nɛ bot djas, daŋ-daŋ ɛ́ nɛ biyɔ. Tin, yɛ ɛ́ Zɛɛb ɛ djɛ bis ghwyil ɛsa etɛp binek djas. Yɛ bɛ náá, bis naakɛ deenek ɔɔ, ye nabɛ ɛ́ ààbɛ nɛ etsoŋ e bot ɛ bɔs. Tin, bis nakɛ ɛ́ nɛ ghwyil ɛ Zɛɛb. 13 Tin, tɔ bɛmɛkana mɛ, bis di ekwyal bin ɛ, bis kwyal ɛ́ sa di náá bi ɛ́ nɛ ghwyil ɛlaa nɛ ɛtiibal ɛ. Deenek, mɛ ɛ́ nɛ ɛbwaalel náá, bi ɛ́ nɛ ghwyil ɛtiibal etɛp djas bis di elii ɛ. 14 Yɛ koodi náá, nenak bi ààpatiibal etɛp djas di kwyala tɔ bɛmɛkana mes ɛ, bis kwyɛl ɛ́ náá, bi tiibal yɛ. Deenek, dwoo ɛzyɛ ɛ Ghɛŋ’enaka Yezu, bi ɛ́ waadiig bet kɔ ɛsu ɛ les, dáa bisɔ pe, bis ɛ́ waadiig bet kɔ ɛsu ɛ len.

15 Mɛ nadi ɛ́ nɛ ɛbwaalel kɔ ɛsu ɛ tak, yɛ ɛ́ étɛp tak ɛ mɛ nagek ɛzyɛ sok pɛ yebɔ, etɛɛ bi neebela enɛm nɛ embɛɛ bela esok ebá. 16 Deenek, mɛ nadi ekwyɛl náá, mɛ dhaa pɛ daa len, da mɛ ɛ́ goola tɔ́ pɛ kyee dik Masedwan. É mɛbhula, mɛ ɛ́ baadhaa pɛ daa len etɛɛ náá, bi neekwyee mɛ nɛ ɛgoola mɛndjoŋ mam pɛ kyee dik Yude. 17 Dáa mɛ nagek deenek ɛ́, mɛ nakagek ɛ́, ààsiiza? Egeka ee mɛ nadi egek ɛ, ye nakabɛ ɛ́, tyee wat nɛ dáa bot ɛ bɔs’ak di egek ɛ, mɛ ke «iyooo» ɔɔ, da yɛ ɛ́ di «hooo».

18 Zɛɛb ɛ́ tyaases’am, sa mɛ di elɛɛ bin ɛ, ye tok náá, mɛ myaal «iyooo» ɔɔ, da yɛ ɛ́ di «hooo». 19 Etɛɛ náá, Yezu Klisto Mɔn ɛ Zɛɛb, yii mam nɛ Silas zɛnɔɔ Timote zegoola bin ɛ, nabɛ ɛ́ ààbɛ mot di emyaal «iyooo», da yɛ ɛ́ di «hooo» ɔ. Tin, tɔ lɛ, ye nazodi ɛ́ ɛmyaal «iyooo». 20 Tin, Yezu ɛ́ di «iyooo» kɔ etɛp djas Zɛɛb nakɛk ɛ. Yɛ ɛ́, etɛɛ náá, kɔ ɛsu ɛ Yezu Klisto ɛ bis di emyaal «Amɛn», étɛp ɛdjɛ duma nɛ Zɛɛb. 21 Deenek, yɛ ɛ́ Zɛɛb nyɛ ɛmet ɛ di edjɛ bisɔ nɛ biyɔ mɛghaaz mɛ ɛdi tɔ tsik sama nɛ Klisto. Yɛ ɛ́ Zɛɛb nyɛy nyɛ ɛmet ɛ sɛ́ɛ bis, étɛp bis needi bot ɛ mɛsa mɛ. 22 Deenek, nyɛ eezewa bis ndem nɛ din ɛ lɛ. Nyɛ eebaawa tɔ ebhum lyem bis Sisim na Dɛɛ, étɛp ɛlyaal náá, nyɛ waadjɛ bis esa ee nyɛ nakɛk bis ɛ.

23 Tin, mɛ eenɔɔ Zɛɛb dáa tyaases’am, mɛ kɔɔ ɔɔ, nyɛ ɛ́ gó mɛ. Yɛ ɛ́ étɛp ɛkaab náá, mɛ ɛzɛkɛbaazamal bin ɛ mɛ myaal náá, mɛ aanàkabaazyɛ pɛ ghaada Koolɛt. 24 Deenek, bis ààsaa náá, bi myaal sa bis di elɛɛ bin ɛ nɛ bhel. Etɛɛ náá, bi ɛ́ ghiŋ tɔ ɛdum ɛ koŋ nɛ Zɛɛb. Bis saŋ ɛ́ náá, mena saka mɛsa é di wat étɛp bi needi tɔ mɛmyaala.