1 Gheekwyekwyɛlelka pak’en dáa bɛkɛl nɛ bɛdhem. 2 Sa mot ààdjisa ɛdjɛ bɛdjoŋ ɛ di ezyɛ pɛ daa len ɔ edi. Etɛɛ náá, é ɛsa deenek, bɛdhiiti bot naadjɛ efofop nazyɛ mɛdjoŋ pɛ daa lɔɔ edi, bɔɔ ààgu náá, bɛ nabɛ ɛ́ efofop. 3 Taalaka nɛ bot ɛ di tɔ membok ɔ, ɛkɛɛ biyɔ pe é membok bi nɛ bɛnɔɔ. Taalaka nɛ bot ɛ di tɔ mɛtiiga ɔ, etɛɛ náá, biyɔ pe ɛ́ bot nɛ mɛnyel nɛ epuud, di nɛ ghwyil tiigaa dáa bɔɔ ɛ.

4 Ye goka ɛ́ náá, bot djas duwal ɛba, tin ye baagoka ɛ́ náá, moma nɛ motom kɛ tɔ esosoob tɔ ɛba. Etɛɛ náá Zɛɛb ɛ waapɛ́ɛ bot ɛ mɛzɔ nɛ bot ɛ membyam.

5 Yɛ ààgoka náá, gwyes epata djɛɛd bin. Ye goka ɛ́ náá, bi myaala nɛ esa bi di nɛ yɛ ɛ, etɛɛ náá, Zɛɛb nyɛy ɛmet ke ɛ́ náá: «Ààbɛ, mɛ aanàkwaabet wɔ, mɛ aanàkwaapek wɔ✝.» 6 É tɛp tak ɛ di náá, mena ɛ́ nɛ ghwyil ɛke nɛ ɛbwaalel djas náá:

«Ghɛŋ ɛ mot di ekwyee mɛ ɔ,

mɛ tok nɛ ghwyil ɛ di nɛ bwoo.

Mot aakosa mɛ yé✝?»

7 Taalaka nɛ bot ɛ nadi edjɛɛd bin ɔ, bot ɛ nagoola bin Mɛkpa ɛ Zɛɛb ɔ. Deenek, taalaka nɛ dáa bɛ nadi ekɛ ɛ, nɛ dáa bɛ nagwyɛ ɛ. Bi goka ɛ́ nɛ ɛbaŋa mbi ɛdum ɛ koŋ ɛ lɔɔ nɛ Zɛɛb bɛ nadi nɛ yɛ ɛ. 8 Yezu Klisto ɛ́ tyee wat koko, mos, kɔm-kɔm sii nɛ kɔm.

9 Sa bi ààbet náá, mɛlyo mbɛs yii bot ɛ sis sa náá, bi wo ze. Ye nyɔ ɛ́ náá, enɛm nɛ embɛɛ e Zɛɛb djɛ mena mɛghaaz, ààkabɛ náá, ye di etsi e bot zesa dum nɛ edee mena di edɛka ɛ. Bot ɛ di edu mbi yenek etsi ɔ, bɛ aanàkobela vaŋ sonok.

10 Bɛghaa-Zɛɛb di esa mɛsa tɔ pɛt ɛbhɛŋ ɛ Zɛɛb ɔ, bɛ tok nɛ ghwyil ɛdɛ esa di ekaa kɔ mesa-ebuwa bina ɛ. 11 Boo ghaa-Zɛɛb dyeebatɔ́ pɛ tɔ Di na Dɛɛ ɛ nɛ ghiya bɛtit. Etɛɛ náá, nyɛ neeka yɛ buwa étɛp ɛpelak ɛ mesyem. Tin, epuud e bɛtit binek kawyisaa nɛ yɛ tɔ ghaada ɛ, kɛdikaa pɛ kel. 12 Dum nɛ tɛp tak ɛ, Yezu nadi ààgwyɛ tɔ ghaada, etɛɛ náá, nyɛ neegwyii bot nɛ ghiya yɛ met. 13 Djhoowyiska tɔ ghaada, kɛboma nɛ nɛ pɛ kel, etɛɛ náá, mena neekɛbomaka nɛ mbi mɛduka mɛ nyɛ nadukaa ɛ. 14 Etɛɛ náá, kɔ ɛko ɛ bɔs wak, mena tokeka nɛ ghaada di nɛ ghwyil ɛdi kɔm-kɔm sii nɛ kɔm ɛ. Mena saaka wak ɛ, ghaada di ezyɛ yenek. 15 Kɔ ɛsu ɛ Yezu, djhoogheekeka Zɛɛb ebuwa e mɛkpa mɛ di edjɛ nyɛ duu ɛ mɛlu djas, yɛ ɛ́ mɛdjeeb mɛ di elyaal náá, nyɛy ɛ́ Ghɛŋ ɛ. 16 Sa bi ààdjisa ɛsesa enɛm esa, nɛ ɛkwyekwyeel pak’en. Yenek ɛ́ ebuwa e Zɛɛb di emyaala nɛ yɛ ɛ.

17 Loobaka nɛ bɛdjɛɛdel bin, gwakeka bɛ. Etɛɛ náá, bɛ ɛpebaal bin mɛlu djas. Guka náá, bɛ waabookɛtaŋal é mis ɛ Zɛɛb kɔ ɛsu ɛ len. Tin, bi goka ɛ́ nɛ ɛsa náá, bɛ sa mɛsa mɔɔ ɛnyɔɛpe nɛ boo mɛmyaala, ààkabɛ náá, bɛ sa yɛ nɛ mɛnwyaad. Etɛɛ náá, bɛ sa yɛ nɛ mɛnwyaad ɔɔ, yɛ aanàkwaanyɔ nɛ nen.

18 Djaalaka étɛp’es! Bis ɛpegu tɔ elyem bis náá, elyem bis ɛ́ sɛŋ. Deenek, sa di nɛ nis ɛ, yɛ ɛ́ náá, mɛwala djas, bis ɛ́ tɔ ɛsɛɛga ɛdi nɛ embɛɛ mɛfulu. 19 Sa mɛ di ewaab nɛ nen daŋ-daŋ ɛ́ náá, djaalaka nɛ Zɛɛb náá, nyɛ sa náá, mɛ lel ɛbula pɛ daa len.

20 Zɛɛb ɛ́ ɛsuk ɛ egwyem, nyɛ naagomal Ghɛŋ’enaka Yezu pak myoŋ. Yezu moo mos ɛ́, boo djɛɛdel ebhata kɔ ɛsu ɛ ghiya yɛ, ghiya di ewa mena tɔ ɛbhɛŋ na kɔm-kɔm sii nɛ kɔm ɛ. 21 Beta náá, Zɛɛb tak wat djɛ bin ghwyil ɛsesa enɛm esa, étɛp bi neesa ɛkwosak ɛ lɛ. Tin, Zɛɛb sa nɛ nen sa lyem’ɛ di ekwyɛl ɛ, é ze ɛ Yezu Klisto, mot di egoka nɛ ɛdjɛaa duu kɔm-kɔm sii nɛ kɔm ɛ! Amɛn.

22 Bɔn-nyɛɛg bam, mɛ waab nɛ nen ɛ́ náá: Gwakeka nɛ lyem wat mɛkpa mɛ di edjɛ mɛghaaz ɛ. Bela náá, mɛkana mɛ mɛ kwyal bin ɛ́, yɛ ààdyeebadjaa. 23 Mɛ kwyɛl ɛ́ bi gu náá, mɔn-nyɛɛg’ena Timote naazewyis tɔ membok. Nyɛ lel ɛkum wak ɔɔ, mɛ waazyɛ zɛbee bin, bis nɛ nɛ.

24 Swoska bɛdjɛɛdel bin djas, nɛ bot ɛ zedum koŋ nɛ Zɛɛb ɔ djas. Bɔn-nyɛɛg’enaka bot ɛ kyee dik Itali eeswos bin.

25 Beta náá, enɛm nɛ embɛɛ e Zɛɛb di nɛ biyɔ djas.