1 É di’enek, bot aakake tin dáa? Ye goka ɛ́ bot gyee tɔ mesyem etɛɛ náá enɛm nɛ embɛɛ e Zɛɛb neebu dhaa tyɛ? 2 Yɛ aanàkwaasael deenek! Menabɛlka bot ɛ nazegwyɛ é ze mesyem ɔ, haaa étɛp yé mena di baakwyɛlka ɛsik tɔ tsik mesyem? 3 Bi ààgu náá, é ghɛŋ mena naduwaka Zɛɛb ɛ, menabɛlka djas nabɛ ɛ́, mena mooka mot ngɔt nɛ Yezu Klisto? Ye kwyɛl ɛlɛɛ ɛ́ náá, mena naazegwyɛka sama nɛ nɛ. 4 Dum nɛ ɛduwa Zɛɛb’enek, mena naagwyɛ, delaa sama nɛ Klisto, etɛɛ náá, tyee wat nɛ dáa duma Sɛɛg nasa náá, Klisto gom pak myoŋ ɛ, yɛ ɛ́ deenek ɛ́ menabɛlka pe aabaakɛ tɔ tsik na bes.

5 Tin, yɛ bɛ náá, mena nadika ɛ́ mot ngɔt nɛ nɛ tɔ kɔkɔ mbi ɛsyee ɛ lɛ ɔɔ, mena aabaadika ɛ́ mot ngɔt nɛ nɛ tɔ mbi ɛgom ɛ lɛ pak myoŋ. 6 Bot goka ɛ́ nɛ ɛgu ɛnyɔɛpe náá, mena tokapɛ mbi bot ɛ mena nadika kpaambel ɔ. Mena naazegwyɛka, mbema é mɛlaaba sama nɛ Klisto. Etɛɛ náá, tsik epuud mena nadika nɛ yɛ ɛ́ neegwyɛ, tin, mena needi ààbaadika ekwom e mesyem. 7 Etɛɛ náá, mot nagwyɛ sama nɛ Klisto ɔ, nyɛ moo ɛ́ nyɛ eezedjɛaa di epiki, nyɛ naazepɛkaa tɔ mesyem. 8 Yɛ bɛ náá, mena eezegwyɛka sama nɛ Klisto ɔɔ, tin, mena ɛ́ nɛ ghwyil ɛdi nɛ ɛbwaalel náá, menaka pe ɛ́ nɛ tsik sama nɛ nɛ. 9 Mena nɛ guka ɛnyɔɛpe náá, Klisto naazegomelaa pak myoŋ, nyɛ tok nɛ ghwyil ɛbaagwyɛ. Tin, ɛsyee tokapɛ nɛ ghwyil kɔ lɛ. 10 Klisto nagwyɛ ɛ́ ngwyɛa sok wat, étɛp ɛsaab ghwyil mɛbwala mɛ mesyem mɛ bot ɛ bɔs. Tin, nenak yak, nyɛ moo ɛ́ nɛ tsik kɔ ɛsu ɛ Zɛɛb. 11 Yɛ ɛ́ tyee wat nɛ biyɔ, beeka náá, sok bhwoob mesyem, bi ɛ́ dáa bot ɛ zegwyɛ ɔ. É di’enek, guka náá, bi ɛ́ nɛ tsik ɛ étɛp Zɛɛb, kɔ ɛsu ɛ ɛgwakel ɛ len nɛ Yezu Klisto.

12 Sa mesyem ààbela ghwyil kɔ mɛnyel men di náá, yɛ waaboogwyɛ ɛ́, sa bi ààlooba nɛ egwyes e epuud bin. 13 Sa bi ààbaawa ekyes é mɛnyel men tɔ mesyem, etɛɛ náá, yɛ ɛzɛkɛwa bin tɔ ɛbiyo. Tin, djɛka Zɛɛb mɛnyel men djɛa wat, dáa bot ɛ zegom pak myoŋ étɛp ɛbula tɔ tsik ɛ. Bi goka ɛ́ nɛ ɛdjɛ mɛnyel men djas tɔ mɛsa mɛ, étɛp ɛsa mɛsa mɛ epiki. 14 É di’enek, mesyem aanàbaadi nɛ ghwyil kɔ len, etɛɛ náá, bi tokapɛ si bhel etsi, bi moo ɛ́ tɔ enɛm nɛ embɛɛ e Zɛɛb.

15 Yɛ ɛ́ yé? Yɛ ɛ́ náá, mena ɛ́ nɛ ghwyil saka mesyem, etɛɛ náá, mena tokapɛ si bhel etsi, mena mooka ɛ́ tɔ enɛm nɛ embɛɛ Zɛɛb é? Yɛ aanàkwaasael deenek! 16 Bi nɛ gu ɛnyɔɛpe náá, bi ɛ djɛ mɛnyel men nɛ bot náá, bɛ kɔk kɔ len ɔɔ, bi aakadi ɛ́ ekwom e bot ɛ bi di elooba nɛ nɔɔ yenek. Yɛ bɛ náá, syem ɛ di ekɔk kɔ len ɔɔ, yɛ waadul bin tɔ ɛsyee. Yɛ kabɛ náá, Zɛɛb ɛ di kɔk kɔ len ɔɔ, nyɛ waadjɛ bin tsik yii epiki. 17 Djhoobulalka bhɔɔ nɛ Zɛɛb etɛɛ náá, biyɔ bot ɛ nadi kpaambel ekwom e mesyem ɔ, bi moo mos ɛ́ elooba nɛ lyem wat nɛ mɛlyo mɛ nadjɛaa bin ɛ. 18 Bi tokapɛ bɛkwom ɛ mesyem, bi moo ɛ́ bot ɛ di esa mɛsa mɛ di náá, yɛ ɛ́ yii epiki ɛ. 19 Mɛ kalii wak ɛ́ dáa bot djas di elii ɛ, etɛɛ náá, bi ààdyeebanyɔ ɛmɛt mɛsuk mɛ etɛp. É ghɛŋ sok, bi nabɛ ɛ́ bi naawa elyem bin dɔkɔ tɔ ekwom e mɛsa mɛ edhuud nɛ yii ɛzɛm di edis ɛgwakel pak bi nɛ bɛ Zɛɛb ɛ. Yɛ ɛ́ dáa mos, bi goka ɛ́ nɛ ɛwa elyem bin djas dɔkɔ tɔ ekwom e mɛsa mɛ epiki, étɛp bi needi tɔ tsik na dɛɛ.

20 É ghɛŋ bi nadi ekwom e mesyem ɛ, ɛsa mɛsa mɛ epiki nabɛ ɛ́ ààdi egwyák bin. 21 Tin, bi nakabela yé, é sok bi nadi esesa esa di edjɛ bin sen mos’aak? Esa binek dul bot ɛ́ tɔ ɛsyee! 22 Nenak yak, bi moo ɛ́ pɛka si bhel mesyem, bi moo ɛ́ tɔ mɛsa mɛ Zɛɛb. Tin, sa bi bela ɛ́, yɛ ɛ́ tsik na dɛɛ, étɛp ɛbela tsik na kɔm-kɔm bhii tak. 23 Etɛɛ náá, efute e mesyem, yɛ ɛ́ ɛsyee. Tin, ɛkɛɛ yii toto Zɛɛb di edjɛ ɛ, yɛ ɛ́ tsik na kɔm-kɔm tɔ ɛgwakel nɛ Yezu Klisto Ghɛŋ’enaka.