Hebreus 8

6 Ma tora, Isusul ari loat unã huzmitipsiri ma aleaptã, ahãntu cãt easti misit a unei pisti-ligãturã ma bun, cã easti nthimiljeat pri ma buni tãxiri.

7 Cã, macã pisti-ligãtura di prota va eara fãrã cusuri, atumtsea nu va s-cãfta loc di un altu. 8 Cã Dumnidzãlu lji vãrgheashti sh-lã dzãtsi:

"Ia, ma yin dzãlili, dzãtsi Domnul,

cãndu va fac cu casa al Israel

sh-cu casa al Iuda unã noauã pisti-ligãturã,

9 nu ca pisti-ligãtura tsi feciu cu pãrintsãlji a lor,

tu dzua cãndu mini lã acãtsai mãna

ti scuteari dit loclu al Eghyptu,

cã elji nu armasirã niminatã la pisti-ligãtura a mea,

sh-ashãtsi mini lji apãrãtsii,

dzãsi Domnul.

10 Aestã easti pisti-ligãtura tsi va fac cu casa al Israel

dupã atseali dzãli, dzãtsi Domnul.

Va bag legili a meali tu mintea a lor

sh-va li scriu tu ininjli a lor.

Va hiu Dumnidzãlu a lor

sh-elji va hibã populu a meu.

11 Sh-vãrã nu va nveatsã aproapili a lui sh-vãrã fratili a lui dzãcãnda: ‘Cunoashti-l Domnul!’,

cã tuts va mi cunoascã, di la njiclu, pãnã la marili a lor.

12 Mini va lã ljeartã nindriptãtsili a lor,

shi trã amãrtiili a lor nu va nji aduc aminti vãrã oarã."

13 Dzãcãnda pisti-ligãtura "noauã", Dumnidzãlu nviclje atsea di prota, sh-atsea cai s-nvicljeadzi sh-ausheashti easti ningã chireari.