2 Vakolindo 6

4 Pambele lyake, tung’ang’wa kwiwonesa kuva ndakyene nefwe ndi vandumindumi va Nguluvi kwa kuhuvilila utatala na magudo na utumama. 5 Tukatovilwe, tukawopilwe mukiwopo na tukayovelechwe kwa vanu na tukagitile kasi ngajila kutulula na kwikala ngajila kuliya. 6 Kangi tukayiwonesa kuva nefwe ndi ndumindumi va Nguluvi kwa kukala kwa kumkelesa Nguluvi, kwa numbula nofu na luchelo na kwa luhuvililo na usanzi, kwakulongochwa na Muhe va Nguluvi na kwa lukelo va undakyene, 7 na kwa unanzi va undakyene vetukuulanducha na kugita gala gye gya kumkelesa Nguluvi. Undakyene ndi kyalukilo yeitumila kutovanila na kwidima. 8 Tuginywa na kubedwa, tuligwa na kunjumwa. Tuwoneka kuva vadesi ila tulonga undakyene, 9 ngita vanu setuchelanike, ila kuno tuchelanika na vanu vonda, ngita vanu vefafuwe ila tugehe wumi. Tukatovilwe ila setukafuwe. 10 Tukivecha ngita vanu vevagehe na uswingwimo ila figono fyonda tukeduka, ngita vanu vahangala ila tukuvagavila umosi vanu volofu, ata ngita tuwoneka tuhela kinu ila tuwoneka tugehe na kila kinu.