1 Ihani Yeesu haya huma mu dyee buga, haya wena u issi kya Bayudeya mugela wa bubidi wa luyi lwa Yolodani. Na bigandu bya bandu habya mukumba gungi kakaa na uganda mabusu gayi hekilu ba luula byeebya byebwa nangi muuta masu goso.

2 Ihani Bafalisayo bamu haba sheena hangondu waayi haba muyujya koo mutega: «Buta bwiitu bulu sagula mundu usama mwajyayi?» 3 Yeesu haya ba lunga: «Musa gubu misigila bilagu bini?» 4 Haba boya: «Musa gubu tu sawiila tii, wa munumi wa sinyi ishoshwa kyoo mu sama mwajyaayi na ujyanga».

5 Yeesu haya ba lunga: «Musa gubu mi sinyina banyu biibi manee ga matima yiinu goo mini. 6 Haboobwa ishu twa gahalu'a u sombelu hanha Kabejya heebu bumba bwinandu, Kabejya gubu bumba wa munumi na wa mwazi.* 7 Ukidila biibi wa munumi wa samanga shaayi na najyaayi, na wa namatanga udi mwajyaayi. 8 Na ebu babidi ba yananga bubidi gu gumu.* Na ebu ndabo yaana babidi lungi, haboobwa ndabadi mubidi gugumu. 9 U biibi, mundu nangi yumu ndi hambululanga baba Kabejya bebu namanya hamonga».

10 Mitongi ya Yeesu hababu shweela mu kyee yendi lungi, haba mu yuujya Yeesu gaaga mahuya. 11 Na Yeesu haya ba sawila: «Ishu mundu wajyanga mwajyayi na utundula yungi woota masenga manee wasama mwajyaayi wa mabusu. 12 Na ishu wa mwaazi wa bagala udi munumi waayi na utundu'a na munumi yungi na eyu woota masenga manee wasama munumi waayi wa mabusu».

13 Lusu lumu, bandu haba visha baana ba balengi udi Yeesu tii, waba fiyugudi. Habobwa dingisi yayi haya banyajya baaba bandu. 14 Yeesu bwebu mona biibi, haya wata iizi na haya boya: «Musami baana ba vueye kwanidi mimi. Musami uba zimbila manee Butangala bwa Kabejya* bwa bandu balu fwandana nabu. 15 Nidi muu mi sawiila unindu: Yoowa gooso sha tambulanga Mahuya ga Butangala bwa Kabejya* bidi mwana wa mulenge, kokoko ndo shweela monga.» 16 Ihani Yeesu haya yambidila baaba baana na uba hibiila mabo'o gaayi, yumu na yumu, na haya ba fiyugula.*

17 Mukye'a ihindi ibwa nangi Yeesu ayinanga mu zila, mundu yumu haya vueya mulubilu, haya hona na uvunga manyu mabusu gaayi na haya muyujya: «Mulangidijyi mulegela naati bini kwa uboya tii, na yaani na buumi bwa milumbu na milumbu»?

18 Yeesu haya mulunga: «Ngyayi kyawa ni taŋanina mundu mulegela? Nda udi mundu mulegela, ha Kabejya ye, halaa. 19 Guluyu'a byebya Buta byabulu boya uta: ‹Nangu yaana mundu wa uhega bandu. Nanguta masenga. Nangu yiba. Nangu mu sawila mundu majyindi. Nangu teela mundu nangi yuma bubi. Yaana mundu gulu tiina shaayi na najyaayi.›»* 20 Yoowa mundu haya mu lunga: «Mulangidijyi, byebya byooso bilu boya mahuya golulu, nilu gata usomba bugenda bwaami.»

21 Yeesu haya mulola na meesu goo muvula na haya mu sawila: «Kwa kuhina indu kiimuye, kyoo shidi nakyu: Inanga, tanga bindu byobe byooso mugulu uba ga bwiidi tuuku yeye mona. Ishu woota biibi wa yananga na mona u lububi. Ihani uni kumbi».

22 Haboobwa yuugu mundu hebu telegejya gaaga mahuya, haya vunga lwebu na haya wene na iizi kya butu, manee gubwa nangi na mona ya butu. 23 Yeesu haya lola mitakibwa yayi babu mu nyungalala, na haya ba sawiila: «Mbinyumini mundu didi na mona ushwela mu Butangala bwa Kabejya!» 24 Mitakibwa yayi haya hanunu'a unindu na gaaga mahuya. Ihani Yeesu haya ba sawiila lungi: «Baana baami, koo shweela mu Butangala bwa Kabejya* nguumini! 25 Byumini lungi ngamiya* ushweela mu hundu dya mutubula, haboobwa nguumini unindu mundu yidi na mona ushwela mu Butangala bwa Kabejya.»

26 Badingisi haba keka unindu habasiki kwiyujyujyena: «Itu mbiibi, inani wa shwelanga mu Butangala bwa Kabejya?» 27 Yeesu bya balola na kubasaudila: «Kwa mundu kalunga kumo diidi ndadiki samunika, ila kwa Kabejya ndabeebyo, kumona kwa Kabejya bindu byooso bikisamunika».

28 Haŋo Petelo bya musaudila ti: «Lola bangu! Baashu tuvasama byooso kwaku kujyanga beebe!» 29 Yeesu bya yaka: «Ngimusaudila bya kwinikindu, mundu wooso yi sama kyende kyaye, na bakwaye, na misaadi yaye, nazyaye, na shaye, baana baaye, ao makunda maaye kukidila zina dyaami na kukidila mauya maami malweela, 30 yowa uebwa mala mia muhuune musenge wa leelo: uebwa byende, ba kwaaye, misaadi, banaazye, baana na makunda, nembebya usubanga, na kindi kivanga kyamisha yooso uebwa bya kebee mwezyo wamisha yooso. 31 Haŋo babule badi bakumbala biyakana bamongo, na bandu babule badi leelo bamongo biyakana babusu».

32 Mukindi kyene Yesu na badingisi baye beene mulwendo lwa kuyena ku Yelusalemu, Yeesu we yena kumbala ya badingisi baye. Na baa badingisi baaye be hanunuka. Na baa bandu beemujyanganga be yudibwa na moyo. Yeesu bya buula mitonge baye kumi na babidi hongondo, na bya bajyongodela lungi kukidila mama mimu kidila. 33 Bya basaudila: «Muteejye bangu! Twabanda ku Yelusalemu. Kokwa, mimi Mwana wa Mundu nitudibwa mubiboko bya bamupelo na byaba langidijyi ba buta. Ibo binguhaana mubiboko bya bandu basidi Bayaudi kwa kuboya ti namote, 34 Naibo binguseanga, na bingufidila mata, na bingunywika mijeledi na kunguyaa. Na kisha masu ma satu nifukuka».

35 Haŋo Yakobo na Yohane, baana ba Zebedayo: ha baava kudi Yeesu na kumusaudila ti: «Mulangidishi, tukihazya ututele kindu kyooso kya tukuazya.» 36 Naiye Yeesu byaa bayuuzya: «Mukivula namuteele kaayi?» 37 Haba musaudila ti: «Haŋa iyakana beebe mubutangala bwobe bwa mbunda, utwabile mbambi yakuyakana hangondo yoobe, yumo kukiboko kyobe kyamwozyo mulume, na yungi kukiboko kyobe kyamwazyo mukazi.» 38 Ni Yeesu bya basaudila: «Ndamukiyuka kekya kyamukihajya. Musamunana kukubila mubungu* wakusuba wambikubila miimi? Ao musamuna kuyabikibwa mu meema kwa kusuba kwambiyabikibwa miimi?» 39 Haba muyaka ti: «Tusamuna.» Haŋo Yeesu bya basaudila: «Kwa kwinikindu, mukubila mubungu wa kusuba wambikubila miimi, na muyabikibwa mu meema kwa kusuba bebya byambiyabikibwa miimi. 40 Nembebya kubaa biyakana kukiboko kyaami kya mwazyo mulume ao kukiboko kya mwazyo mukazi, ndabikingulola miimi. Maamo mabua ngwabaaba bee bikidibwa tonaa na Kabejya.»

41 Haŋa baa badingisi bangi kumi habe teejya mama mauya, haba somba kukwata kiizi mwazyo wa Yakobo na Yohane. 42 Haŋo Yeesu bya bataana ibo booso nakubazyongodela: «Mukiyuka ti baba baki monebwa bushwa bakulu bamuune mumusenge baba talukila kwa kibandibandi, na baa badi mu tuuna bamonesha bukolo bwaabo. 43 Nee mbebya ndayi yakana beebya kwa mudi banyu, sindanyi, itu yumo hamukidi hinu ukivula kuyakana mukulu, uki bambana kuyakana muvubi wiinu. 44 Na itu yumo hamukidi hiinu ukivula kuyakana wa kumbala ukibambana kuyakana muvubi wa booso. 45 Kumona mimi Mwaana wa Mundu sivava kwaku boya ti bandu bangu vubile, ila vava kwa kuboya ti navubile na kuhaana mwejyo waami wayakane tudilo dyabandu babule».

46 Haŋo, Yeesu na badingisi baye haba kazya ku Yeliko, Yeesu he nyomokangeye wowa mukola ukata na badingisi baye na kiandu kikata kya bandu, mundu yumo mukufu wetaanibwa Balitimayo mwaana wa Timayo, wene buyakane hasi hangondo ha zila ukihajya bamu nyanguzye. 47 Haŋa heva teejyeye ti ni Yeesu wa Nazaleti wene mukukila, bya somba kuyaba kwa muuya wahaulu mukuyakula ti: «Yeesu mwana wa Daudi ungumonene lusa!» 48 Bandu babule haba muhanunukila kwa kuboya ti wayakane nyaa, haŋo iye bya bazya muuya kukila busu na kuyakula ti: «Mwaana wa Daudi, ungufile lusa»!

49 Kukidila bebya Yeesu bya tukama na kuyakula: «Mumutaane.» Haŋo haba taana yowa mukufu na kumusaudila ti: «Ukwate tima! Taluka, ukikutaana.» 50 Haŋa hetezyeeye beebyo bya vundumuka byakasa ngubu yaaye, bya taluka na kuyena kudi Yeesu.

51 Yeesu bya muyuzya: «Ukivula na kutele kaayi?» Yowa mukufu bya muyaka ti: «Mulangidijyi, ngivula kumona lungi.» 52 Haŋo Yeesu bya mujyongodela: «Yenanga butabuke bwoobe bwakufuula.» Hakeaŋa, yowa mukufu byamona lungi, bya zyanga Yeesu.