1 Yene muku shaala masu ma bidi kwa kuboya ti kiandu kya kuselela kya Pasaka na kekya kya mikati yisidi yi hae mabambane. Bakulu ba Bamupelo na balangidishi ba buta be keba zila yaku kwata Yeesu kwa bubango na kumuyaa. 2 Haŋo be boya ti: «Nda tuta diidi kumo lufuku lwa kiandu kikata, ngasi bandu bata luvundu.»

3 Mu kekya kindi Yeesu wene ku Bethania, mu kyende kya Simoni weene na kivu, henangiye kumeza mu kudya bidyazi, yumo mwamukazi bya shwela na mulangi wa maani mavumba ya naldo yitobe ya muulu waulu. Bya dibela na ku hukudila Yeesu ma maani kumushu waye. 4 Haŋa hemona ba bamo bandu benange haŋa haba zinguka, na kukwisauyjena ti: «Kwa kayi kuzizimisha malashi maama? 5 Kumona maa malasi mandi udishibwa mu dinadi mia yisatu* kwaku haana ku tuuku!» Haba muozwela kwabule yowa mwamukazi.

6 Haŋo Yeesu bya basaudila: «Musame yowa mwamukazi bangu. Kwakayi mwamushuvya? Wangundela kindu kilweela. 7 Kumona tuuku mudinato kila lusu na kindi kyooso kya muvula kuba nyangujya mubanyangujya; ila miimi ndamwa kuyakana naami masu mooso. 8 Yuu mwamukazi waata keekya kiva samuneye; wa hukudila lukoba lwami maani ma vumba kukidila kubiika tonaa maziko maami. 9 Kwa kwinindu ngimusaudila ti ko kwooso kusaudibwa mauya ma Kabejya, mu musenge, diidi huya dyata yuhu mwamukazi di saudibwa kwa kumuhejya.»

10 Haŋo Yuda Iskaliota, yumo mu mitonge kumi na yibidi ba Yeesu, bya yena kubakulu ba Bamupelo* ti watuule Yeesu kwa badi. 11 Bamupelo bakulu* habe teejya wowa musau haba seelela, haba mubadijya kumwabila falanga. Haŋo Yuda bya yakana mukukeba zila yaku tula Yeesu.

12 Lusu lwa kwanza lwa mikati yisidi yihae, mu masu mabe shijyanga mwana wa mukoko wa Pasaka mitonge ba Yeesu haba muyuujya ti: «Nguni kwa ukivula tuku lungakanyine bua dya kudiila Pasaka?»*

13 Haŋo Yeesu bya yiisha mitonge baye bamo babidi na kuba saudila: «Mweene kumukola; kokwa mu kumaana na mwamulume yumo uva kushwala kaujyi ka meema muye kumulonda. 14 Mukasaudile mwini wa kekya kyende kishweleye: ‹Mulangidishi uki boya, kidi kuni kyumba kya baini kyambidila Pasaka* kukumo na mitonge yaami.› 15 Naiye mwini kindu uba monesha kyumba kikata kya haulu ha kyende, kiva bikibwa tonaa; moomwa muka lungakanyine mwakale.»

16 Baba mitonge haba yena kumukola, na kuka banga bindu byoso byake be biva basaudila Yeesu, na haba lungakanya bidyazi bya Pasaka. 17 Haye bambana kyoolwa, Yeesu byava na baa mitonge baye kumi na babidi. 18 Ha benange mukudya, Yeesu bya basaudila: «Ngimusaudila bya kwinikindu, yumo hamukidi hiinu, ukidya kukumo nami ungu tuula.» 19 Haŋo mitonge baye haba somba kuozwa, haba muyuujya yumo kwa yumo ti: «Itu jyaami?» 20 Yeesu byaba yaka: «Njyumo hamukidi hiinu banyu kumi na babidi, njyowa yi tabika kiboko kukumo nami mu bakudi. 21 Kumona Mwaana wa Mundu wayena byaye bebya byaye sinyibwa kukidila iye mubusinye bwa Kabejya. Ila kusuba kwa yowa yituula Mwaana wa Mundu! Yandi yakana bilweela yowa mundu ndandi butuka»!

22 Haŋa habe dyanga bidyazi, Yeesu bya buula mukati bya hajya kwa kuboya ti Kabejya wau fiyudile, bya ubela na kuabila mitonge yaye na kuboya: «Mu buule mudye luulu ni lukoba lwami.» 23 Bya buula byakeebe mubungu wa divai bya boya abee! Kudi Kabejya, bya baabila. Ibo booso habanywa. 24 Yeesu bya basaudila: «Wuuwu ni muloa waami wa kilemba kya Kabejya, na uki hukuka kukidila bandu babule. 25 Kwa kwinikindu ngimusaudila ti, shakukubila lungi divai dya mizabibu, mupaka lolwa lusu lwa mbikubila yeya yiya mu bukolo bwa Kabejya.»* 26 Ha beewa kuyimba lusimo, haba hezela na kuyena ku kituulu kya Mizeituni.

27 Yeesu bya saudila mitonge yaye ti: «Banyu booso mungusama, kumona businye bwa Kabejya bukiboya ti:

‹Nituta mudindikijyi,

Na mikoko yimwangalala*›.

28 Ila haŋa hambi fukuka, niba tondokela ku Galilaya.» 29 Petelo bya muzyongodela ti: «Nee yayakana ti bangi booso bikusama, miimi shakukusama.» 30 Haŋo Yeesu bya mujyongodela: «Ngikujyongodela bya kwinikindu ti: leelo buune bufuku busu bwa muko kuyakula mala kabidi, ungutuna mala kasatu.» 31 Haŋo Petelo bya fikidijya zizii: «Nee yaajya kumota noobe, nee mbebya shakukusama nee lumo.» Na baba badingisi booso haba yakula byakebee.

32 Habobwa Yeesu na ndingisi yaayi habafi'a ubuga dimu dibutaŋanibwa Getisemani. Haya ba sawiila: «Muyaani haŋa haasi tega naweena kuhaajya.» 33 Yeesu haya bugula Petelo, na Yakobo na Yohane haya weena hamonga nabu. Hayasuba munda mwa tima na haya mona mooyo. 34 Habobwa haya ba sawiila: «Tima dyaami dya suba na unoŋe'a, dyafi'a nena na umota. Muyaani haŋa? Ndamu tandabala mutulo».

35 Haŋa? Heebu basiga na haya weena mabusu hashoo, haya vunga manyu gayi haasi haya haajya Kabejya binu: Ishu mbilegela mabusu ga meesu goobe, mukinu ihindi, usuba kuu'u kwanikidi uula. 36 Heekilu boya lungi: «Abba, Taata, beebe gulusa muna 'uta bindu byooso. Uni bagashidi lubaya luulu loosuba. Haboobwa nanguta byeebwa byandi muuvula miimi, haboobwa tanga byeebya beebe byoolu vula.»

37 Ihani haya galusha udi ndingisi* yaayi yisatu, na haya baheta mu bwaata bwa tulu. Ihani haya mu sawiila Petelo: «Simoni, wa laala? Ndubu samuna u yaana nangulala nangi ihindi kiimu yega? 38 Mulodi na muhaajyi, mwafi'a kuu shelumu'a mu bubi. Tima didi na butangala haboobwa mubidi ngu lebedi».

39 Yeesu haya weena lungi ku haajya, haya haajya lungi byeebya byeebu haajya mabusu. 40 Ihani haya galu'a lungi udi ndingisi* yaayi na haya ba heta gungi mutulu, manee tulu tubu ba neemena u meesu. Ebu ndaba bumona huuya dyoo mulunga.

41 Yeesu hebu galu'a lwa busatu udi ndingisi* yaayi kwa badi, haya basawiila ti: «Mwayoya na mwatandabala gungi mutulo? Byoohwa! Ihindi kya miimi usuba kya fi'a. Miimi Mwaana wa Mundu boohwa uni tuula mu minyu ya bandu badi na bubi. 42 Mutalu'i, twee nangi! Mulodi! Yoowa gooni tuula wanenema kwa ndidi»!

43 Hanga haŋa, kubyee Yeesu ndi kyeehwa usagula, yumu munda mwa ndingisi* yaayi wabalu teena Yuda, waheta. Gubu vueya na igandu kya bandu babwa nangi na biyoma na tuti. Babu humina udi baaba balu tebemena lubunga. Balangijyi ba Sambu* na banunu ba Bayuda*. 44 Yuda, gubwa nangi waba gabila soso haya ba sawiila: «Yoowa wanda mu yambidilanga, i eyu. Mumu waati, na mwenangi nayu mumu lodi bilegela.» 45 Haŋa Yuda hebufi'a neena na Yeesu, haya sheena na haya mu sawiila: «Mulangidijyi!» Haya mu yaambidila. 46 Na baaba bandu haba muhulwiila Yeesu na haba muziti'a. 47 Ihani yumu dingisi* wa Yeesu haya fufula lweete mu hala, na utemba osho dya muvubi wa ngana ya Lubunga*.

48 Yeesu haya mu sawiila: «Miimi nidi mundu guluyiba, kwa uboya ti, muni vuidi na uniwaata na biyoma na tuti? 49 Masu gooso, nibwa nangi hamonga miimi muumi luula munda mwa lubunga* haboobwa nda mubu niwaata. Habobwa byafi'a biibi, koo, ubaya ti, byeebya bibu sinyibwa mu Mahuuya ga Kabejya kwa ndi miimi bya kumaŋani».

50 Hangahaŋa ndingisi* yaayi yooso haba mu sama na haba jyonda.

51 Genda yumu gubu sasila ihindi kya ngubu, hekyee nanga amu kumbanga Yeesu. Ebu muvula ti, bamu waati, 52 Ihani haya ba sigila kaa'a ahindi ka ngubu haya jyonda ngela.

53 Baaba bandu haba weena na Yeesu udi ngana ya lubunga,* ba nunu ba Bayuda na ba langidijyi ba Buta* haba ganda* booso mudyee buga. 54 Ihani eyu Petelo, gubu wenanga amu kumbanga Yeesu eyu ula haba shweela mu igala kya yende kya Ngana mwatagadi. Haya yaana na badindijyi ebu muu yota mudilu 55 Baaba Byaalaŋanda na banunu booso ba Bayuda haba kilukeba huuya dyoo mu titiminya Yeesu, koo boya ti, bamuhege. Haboobwa ndababu mona huuya nangi dimu.

56 Bandu ba butu haba mu sawiila Yeesu majyindi koo mu titiminya. Haboobwa byeebya byaba bwanangi muusagula bibu handaŋana nda bibu waata. 57 Ihani bamu mu bwaata bwaabu habatalu'a na usagula bya majyindi udi Yeesu na usagula biibi: 58 «Tubu yitelegejyela bahu baashu banindu eyu mu sagula ti: ‹Na hongolanga luulu* lubunga* lubu vubibwa na bandu, na munda mwa masu ga satu, na vubanga lungi lushibu vubibwa na minyu ya bandu.›» 59 Haboobwa gaaga mahuya gaabu gabu handaŋana.

60 Ihani mupelo mwaata wa lubunga hayatebema mabusu ga bandu booso, na haya mu yuujya Yeesu: «Ndudi muu lunga huuya nangi dimu u gaaga ma huuya gooso bandu byabadi muuku titiminya nagu?» 61 Ihani Yeesu haya gunda nyaa, na ndibu luunga huuya nangi dimu. Yoowa Ngana ya lubunga haya mu yuujya lungi: «Beebe i Masiya,* Mwaana wa Kabejya mu to'ato'a?» 62 Yeesu haya mu luunga: «I miimi!. Na mwani monanga miimi Mwaana wa Mundu naya nanga mugela munumi wa Kabejya didi na butangala booso. Na mwami monanga mu bwaata bwa matimba avueyanga uhumina u lububi.» 63 Yoowa mupelo wa lubunga heebu telegejya biibi, haya handa ngubu yaayi manee ga iizi na haya boya: «Nda too keba bandu lungi boo sagula mahuya gaayi! 64 Mwayi telegejyala banyu ba nindu byeebya byeedi muu kaya Kabejya. Mulu boya bini?» Ebu booso hamonga haba lunga tii, gulu bengeneena umota. 65 Bangi babwa nangi mu bwaata bwaabu haba mufidila Yeesu mata. Haba mu bwiila ngubu u meesu na haba muta bi vungila na umu sawiila: «Tanga asa'u! Utu sawiidi baashu mundu gudi muu ku sosa!» Na baaba baalonga buvuadi haba mu waata Yeesu na umuta makofi.

66 Mukyee'a ihindi, Petelo gubu yaana haasi mu kiambala kya Ngana ya lubunga, musi'a yumu muvubi wa Ngana ya lubunga ayafi'a koo'a ubwa nangi Petelo. 67 Haya mu mona Petelo eyu muu yota mudilu, haya mulola bilegela na haya mu sawiila tii: «Beebi neeyu, gubwa nangi hamonga na Yeesu mundu wa Nazaleti.» 68 Ihani Petelo haya tuna na haya boya: «Shilu yu'a na shidi muu telegejye byoodi muu sagula. Shidi muu yu'a biibi byoodi muusagula.» Ihani haya weena haajya wa kyambala kwii belu. Hanga haŋa muko hawa yoola.

69 Yuugu musi'a. Hebu mu mona lungi, haya boya na haya sawiila bandu babwa nangi hanha: «Yuugu mundu ngyumu mu bwaata bwaabu!» 70 Ihani Petelo haya tuna gungi, baaba bandu babwa nangi hanha na ebu haba mu sawiila Petelo: «Unindu, gudi yumu waabu! Manee gudi mundu wa Galilaya.» 71 Haboobwa Petelo hee kidi mu bwaata muuta muhoho na 'uboya: «Miimi shiluyu'a mundu yuugu wamudi muu nisawiila. Ishu nasagula majyindi Kabejya wani titiminyi.» 72 Ihindi nangulolwa, mu'u hawa yoola lwa bubidi. Ihani Petelo haya geejya mahuuya gabu mu sawiila Yeesu: «Mabusu ga mu'u uyoola lwa bubidi, wayananga wani tuna myunda yisatu.» Petelo haya dila.