1 Masu mashoo kukila, Yeesu bya haluka lungi ku Kafalnaumu, bandu habe teezya mukizi wakuboya ti udi mukyende, 2 Bangi bandu babule habaava na kuyula mukyende nee ngu kibelo ndakweene bua dya kuyakana. Baa bandu booso Yeesu bya yakana muku basaudila Mauya ma Kabejya.

3 Kee kindi bandu bamo banaa haba muvishila Yeesu mundu yumo wenee bulebele bibandu. 4 Kumona ndabe samuna kumushwala tonono na Yeesu kukidila bungi bwa bandu. Haŋo byaba banda haulu hakinduulu kya kyende* byaba tubula dimo bua ku kinduulu mudyakedee bua dyene Yeesu; haba mushajya yowa mundu wene bulebele bibandu mukalaku kaye ke ladilangeye. 5 Yeesu heeva moneeye butabuke bwaabo, ni haya jyongodela yowa mundu wene bulebele bibandu: «Mwaana waami, wa monenebwa lusa bubi bwobe».

6 Bamo balangidishi ba buta,* benange haŋa haba hejya muma tima maabo: 7 «Kwakaayi yu mundu wa jyongola bibi? Wa yakula mauya ma mbingu kwa Kabejya! Ndakudi mundu husamuna kusheejya bubi Kabejya iye alaa!» 8 Akeaŋa Yeesu haya yuka mwiejyo yaabo, haya ba saudila: «Kwakaayi mukiejya beebya muma tima miinu? 9 Mungusaudile ngike kindu kidi kieleela kuyakula kwa yuu mundu yidi bulebele bibandu?: ‹Bubi bwoobe bwasheela.› Au kumusaudila ti: ‹Buuka buula tanda dyoobe na usumuke?› 10 Kwa biibi, ngivula muyuke ti mimi Yeesu ni kiyakananga na butangala bwa ku monena bandu lusa lwa bubi bwaabo muune mu kisi.»

Haŋo Yeesu bya jyongodela yowa mundu vane bu lebele bibandu: 11 «Na kusaudila ti taluka; buula busazu dyobe na weene ku kyende kyobe»!

12 Akeaŋa, bandu booso muku mulola, yowa mundu haya taluka, haya buula busazu bwaye, haya yena byaye.

Bandu booso haba hanunuka. Na ku mu tumbijya Kabejya na kuboya: «Nda twemonanga kumo bidi diidi»!

13 Nyuma ya haŋo, Yeesu haya yena lungi hangondo ya ziba dya Galilaya. Kyandu kyooso kya bandu byaba yeena kudiiye, naiye bya somba kuba langidila.

14 Hava nangiye mukukila, haya mona mundu yumo kitaanibwa Lawi mwaana wa Alfayo. Yowa Lawi* uvane mukuyakana ku biloo ya kuajya mulambu. Yeesu haya mujyongodela: «Ŋjyange!» Hakeaŋa Lawi haya taluka, haya mu jyanga.

15 Nyuma ya bebya, Yeesu haya yena mukudya bidyazi, mukyende kya Lawi. Baku haajya milambu babule na badi na bubi naibo be nange kukumo naye mukudya na Yeesu na ba dingisi* baaye, kumona bandu babule bidi baba be mujyanganga.

16 Haŋa bamo balangidijyi ba buta* benange ba mwajyo wa mafalisayo* habe mumona Yeesu mukudya kukumo na bandu badi na bubi na baaba bakihajya milambu, haaŋo haba yuujya badingisi baaye ti: «Kwa kaayi mulangidishi wiinu ukidya kukumo na baaba bakihajya milambu na baa badi na bubi?» 17 Yeesu hetejyeeye bebya, haya basaudila: «Bandu basidi na lufu ndabaki kebanga mubuki, ba kimukeba baaba badi na lufu. Sivava kutaana bandu badi buludi busu bwa Kabejya, ila baaba badi na bubi».

18 Lumo lusu badingisi* ba Yohane na Mafalisayo* benange mukuajya kwa kusidi kudya bidyazi. Haŋo, bandu habaava yuujya Yeesu, haba muyuujya ti: «Kwakaayi ba dingisi ba Yohane na mafalisayo ba kiajyanga bila kudya bidyazi ila ba dingisi boobe ndaba kita biibi?» 19 Yeesu byaba yaka: «Mukihejya ti, bee taanibwa ku halusi baki bambana kubenga kudya bidyazi na mwini halusi udi nabo kukumo? Ndabeebyo, kindi kyoso kya badi kukumo na mwiini halusi nda baki bambana kubenga kudya bidyazi. 20 Ila kindi kivanga kiyakana mwiini wa halusi nda kuyakana kwakale hamukidi haabo; keekya kindi ni kyabiazya kusidi kudya bidyazi.

21 Mundu nee yumo ndaki shonanga kiba kya ngubu yiya haulu ha ngubu yi kulukulu. Itu waata beebya, kekya kilaka kiya ki handa yeya ngubu yikulukulu na buhandike buyakana bukataadi.

22 Byakebe mundu ndaki hukula divai diya mu taba dya biseba* bi kulukulu. Kumona itu waata beebya, dedya divai diya dihanda yeeya taba ya biseba, kwabiibi, idyo divai dihukuka na beebya bihinga byabiseba bi vundaana. Kwabebya divai diya diki bikibwanga bobo mutaba dya biseba biya»!

23 Lumo lusu lwa Sabato*, Yeesu na badingisi baye benange mukukila hamukidi ha makunda ma ngano. Habeenage mukukila, badingisi* baaye haba somba ku huula tumuka twa ngano. 24 Mafalisayo* kumona bebya haba mu saudila Yeesu ti: «Mona bangu! Kwakayi badingisi boobe baata bindu biki benga buta* bwa Kabejya kutebwa lufuku lwa Sabaato?» 25 Yeesu bya bayaka: «Ndamwee sinyulula beebya byeta Daudi lumo lusu kukumo na bezinaye hetejyeye zala na kukushwa byakudya? 26 We shwela mukyende kya Kabejya* na kubuula mikati ye haana bandu kwa Kabejya byaadya na bya habila benagiye nabo, nee nguboya ti Bamupelo bobo ni baki bambana kudya*. Weeta bebya kindi kyene Abiathadi, mukulu wa Bamupelo.» 27 Yeesu haya basaudila lungi: «Sabato* ye teebwa kukidila mundu; nda mundu we teebwa kukidila Sabato*! 28 Kukidila bibi, miimi Mwana wa mundu ni mwiini wa Sabaato».