1 Haŋo Yeesu bya somba kubalangidila kukidila miele; na kuba saudila: «Mundu yumo we kuna kunda dyaye dya mizabibu.* Bya dilukila mubwiila, bya fula kineene kyaku kamina meema mabimuka byami zabibu, na byaluka kyende kibande haulu kya baba bakulolanga dedya kunda. Na bya biika bandu bi habilangeye bimo bimuka bya dyee kunda, bya sumuka ku kisi kingi.

2 Haŋa he bambana mafuku maku konona bimuka bya mizabibu, yowa mwini kunda bya yiisha yumo muvubi waye kubaa baki vuba kunda waka mubuudile luba lwaye lwa bimuka bya mizabibu. 3 Ni baba badindikijyi bakunda haba kwata yowa muvubi, haba mutuuta na kumualusha minyu busadi.

4 Mwini wakunda bya yiisha lungi muvubi yungi, yowa naye byaba mubongola ku mushu na kumukaya.

5 Haŋo bya yiisha bangi bavubi baye babule, hamukidi haabo byaba batuta, na bangi haba bayaa.

6 Mwini kunda we shaala na mundu yuumo wa kuyiisha, mwana waye we vulangiye. Bya mu yiisha byakebee kumongo. Mukuejya: ‹Bimu teejya mwana wami›. 

7 Ila baba bakivuba kunda dya mizabibu haba kwijyobojya kukumo: ‹Yuu ni muyaani wa shaye; muve tumuyae mukuboya ti kuyaana kwa yakana kwiitu!› 8 Haŋo haba kwata yowa mwana, haba muyaa, na kukasa kyee kitumba haaza hadye kunda dyamizabibu.

9 Haŋo, Yeesu bya yujya: Haŋo mwini kunda dya mizabibu uuta bini? Huuva na kuyaa baba bakivuba dye kunda, na dedya kunda dya mizabibu hubaabila bandu bangi.

10 Nguboya ti ndamwesinyulula bubu businye bwa Kabejya buki boya:

‹Ibwe dyee bengebwa na baa bakiluka byende

leelo ndadite ibwe dikata dyakaongobela.

11 Ngukidila Vidi-nyambi, niweeta dii kumo.

Naidyo ni huya dya kuanunusha kumeeso miitu›».*

12 Bakulu ba Bamupelo, balangidishi ba buta na banunu be yuka ti wowa muele ukiba tela ibo, haba siki keba zila yakumukwata Yeesu, byaba tiina kiandu kya bandu, haba musama haba yena byabo.

13 Nyuma yabebya, baba bakulu ba Bayaudi haba yiisha kudi Yeesu bamo Bafalisayo* na bamo bandu ba mwajyo wa Helode kwa kumutea Yeesu mumaa maki yakuleeye.

14 Habe fika haba muvila na kumujyongodela ti: «Mulangidishi, tukiyuka ti beebe udi mundu yidi buludi; ndudi na moyo na bebya bikiejya bandu bangi na nduki bembeleka na fanda ya haaza ya bandu, ila ukilangidila bya kwinikindu kukidila zila ya Kabejya kukidila buludi, utu saudile! Mbi lweela tu mwabile Kaizali mulambu ao ndamumwabilanga»?

15 Haŋo Yeesu bya yuku ndimi yibidi yabo, byaba saudila ti: «Kwakayi mwangu teela muteo? Munguvishile dikuta didimo namone.» 16 Haba muvishila yeya dinali, naiye bya bayujya, «Lulu lukebo lukifandakana nanaani na buubu businye mbwa naani?» Haba muyaka ti: «Ŋjya kolo Kaizali».

17 Haŋo, Yeesu bya basaudila: «Muabile Kaizali bindu byaye na Kabejya mumwabile bindu byaye.» Naibo haba musheka kwinikindu.

18 Kukila haŋo, Basadukayo bamo haba muviila Yeesu. Hibo Basadukayo ni baki boyanga ti ndakudi kufukuka. Naibo haba muyuuzya Yeesu bibi: 19 «Mulangidishi, Musa we tusinyina mu kilau ti: ‹itu mukwaye na mundu wamota na wasia mukazi waye nee kusia mwaana, mwinawaye ukibambana kuyaana yowa mwadyangu kwa ku butudila mukwaye baana.› 20 Haŋo, kwene balungwa musambo. Yowa wa busu bya tundula mukazi, bya mota nee kubutula mwaana. 21 Wakabidi bya yaana yowa mwadyangu, iye naiye bya mota nee kusia mwaana. Byaya yakana kwa yowa wa kasatu byakeebe. 22 Na ku baba booso balungwa *musamboo. Ibo booso haba mota nee kusia mwaana. Ku mongo ya booso, yowa wamukazi na iye bya mota. 23 Haboobwa ihindi kyee'a kya ba fululu'anga baaba banumi baayi mu samboo ba bufwa, yuugu wa mwazi inaani, wa yaananga munumi waayi? Manee booso musamboo babu mu tundula».

24 Yeesu haya balunga: «Banyu mwa luba, manee nda mulu'a Mahuya* na nda mulu'a butangala bwa Kabejya. 25 Ihindi kyee'a kya baaba ba bufwa haba fuulu'anga, nda boo tundula lungi na nda boo tundujya baana baabu lungi. Bayanaanga bidi malaika badi u lububi. 26 Haboobwa ukidila baaba bifukukanga, i uboya ti, nda mukyee silula mu kitabu ibu sinya Musa; haŋa Kabejya heebu sagula mu ati adi mu teema mudilu nangu sheema, lugulugu? Kabejya haya boya na haya musawiila Musa tii: ‹Miimi, nidi Kabejya wa Habulamu, Kabejya wa Isaka, na Kabejya wa Yakobo.›* 27 Yeesu haya boya lungi: Kabejya ndi luyaana Kabejya wa bamote, haboobwa guluyaana Kabejya wa bandu boomi. Unindu, mubu yizimba banyu banindu»!

28 Mulangidijyi yumu wa buta haya ba telegejya ebu muu sindaŋana na Yeesu, haya mona ti, Yeesu gubu balunga bilegele. Ihani na eyu haya sheena udi Yeesu na haya mu yuujya: «Munda mwa bilagu byooso, ngilahu* ayi idi kyatagadi?» 29 Yeesu haya mulunga: «Ilagu kyatakyata i kii'i: ‹Banyu baana ba Isilaeli mutelegejyi! Vidi-nyambi wiishu ni Kabejya gulu yaana Vidi wishu eyu bunga ye. 30 Yiluhajyibwa mundu wooso uvula Ngana Kabejya vidi goobe, mu tima dyoobe dyooso, na migeejyo yooso, nyinyi yoobe yooso na butangala boobe booso.›* 31 Na ilagu kya bubidi i kii'i: ‹Yilu kuhaajya umu vula yoowa gudi hangondo woobe byeebya byolu yivula beebe munindu.› Ndoodi bilagu bingi byatagadi 'ukila biibi bilagu bibidi».*

32 Ihani mulangidijyi wa buta haya mu sawiila Yeesu: «Mulangidijyi, gaaga mahuya gawa sagulanga unindu. Wasa gula bilegela unindu ti, Kabejya gudi eyu bunga ye, na nda udi Kabejya lungi bidi eyu. 33 Mundu gooso gulu bengeneena 'umu vula Kabejya na tima dyayi dyooso, na nyinyi yaaye yooso, na butangala bwaayi booso, na vula mundu didi hangondo woobe beebya byoolu yivula beebe mu nindu bilukila bwinanyama booso bulu jyijyibwa na utuula salaka, na byee bingi byooso bilu tuula bandu mabusu ga Kabejya bidi salaka.» 34 Haŋa Yeesu heebu mona ti, walunga na nyinyi yilegela, Yeesu haya mu sawiila: «Ndudi ula na Butanga bwa Kabejya.» U somba luulu lusu nda udi mundu fumu heleejya kumu yuujya Yeesu huuya dingi.

35 Haŋa Yeesu heebwa nagi muu lulu bandu mahuya, munda mwa lubunga* haya ba yuujya binu: «Baaba balangidijyi ba Buta* ngyayi kya badi muu boyela ti, Masiya* shaayi ni Daudi? 36 Manee Daudi eyu mu nindu Tima Dito'ato'a dibu muludi'a uboya:

‹Vidi-nyambi gubu boya udi Vidi-nyambi waami:

Vueya, yaani mugela wa ubo'o kwaami kwa mugela munumi,

Mupaka haŋa hambi bika balwishi boobe haasi hamaulu moobe.›*

37 Haŋa Daudi eyu mu nindu gubu sagula ti: Ngana waayi. Haboobwa ya yananga bini Masiya* uyaana mwaana lungi mwaana wa Daudi»?

Na bandu ba butu babu mu telejya na 'usehelela. 38 Haŋa Yeesu heebwa nangi muu ba luula, haya ba sawiila binu: «Muyi lodi na mu yaanangi na bubangu na baaba ba langidijyi ba Buta. Manee ebu balu vula ukila ŋana na balu vula uvuala ngubu yilayila, na balu vula bandu uba hanwiina na ineemu munda mwa bi gandu, 39 lungi balu vula uyaana mu byaala bya mabusu mu Sinagogi.* Na mu bi gandu bya usehelela; balu vula uyaana mu byaala bya ineemo. Na uheebwa biyaazi bya ineemo, mu bigandu bya tabyata bya balu tee'a biyaazi. 40 Ebu balu kuujya ba fwiidi* bindu byaabu. Balu haajya, kwa butu! Kooboya ti, bandu babamone. Ukidila biibi, Kabejya waba titiminyanga bubibubi ukila bandu booso».

41 Habu kila biibi, Yeesu haya weena na haya yaana hasi tega mabusu ga idindu kyoo tuudila sadaka udi Kabejya. I heeki muu lola bandu byeebya byaba bwa nangi muu tuula sadaka yaabu munda mwa 'idindu. Baaba badi na mona ya butu, haba tuula mona ya butu munda mwa idindu.

42 Mwadyangu yumu shidi na mona ya butu, haya vueya na eyu, haya tuula bishedi bi shoŋono bibidi bya fwalanga* mu kyee idindu, yeeya mona nda yi bwa nangi na ineemo.

43 Ihani Yeesu haya taŋana mitongi yayi na haya ba manya: «Nami sawiila unindu: Guugu mwadyangu asuvi, eyu watuula ukila baaba booso bandu babu tuula sadaka mu idindu. 44 Manee, baaba bangi booso babu tuula yeeya mona yibu shagala, haba gula byeebya byababu vula. Haboobwa yuugu mwadyangu ashuvi, eyu watuula yaayi yooso yeebwa nangi nayu yoo mulula.»