1 Ihani Yeesu haya basalwila: «Unindu namisawila, udi bamu baandu batebami hamonga niishu hanu babumonanga butangala bwa Kabejya mabusu ha ebu kumota».

2 Ukila masu mutubaa, Yeesu haya buhula, Petelo, na Yakobo na Yohana, haya babuhula haya banda nabu hegulu wa ibanjwa ila. Ko'a, lwebu lwa Yeesu halwafundulu'a 3 Ngubu yayi hayikidi yito'a to'a peepeepee, na uto'a unindu ukila bandu kalunga badi hanu haasi wa yuba byebya byabalutosha ngubu. 4 Ihindi na ngulowa, Eliya na Musa tutuu mabusu hayi, habakiluta luhumbu hamonga na Yeesu. 5 Petelo bya saudila Yeesu ti: «Mulangidishi, mbileela bashu kuyakana haŋa. Buune, mbileela tuluke bisoso bisatu: kimo kyoobe, kingi kya Musa na kingi kya Eliya.» 6 Petelo na bezinaye habakushwa kyakuyakula kumona betiina kwabule. Haŋo petelo byasaudila Yeesu ti: Mulangidishi, mbileela tuyakane haŋa, tuluke bisoso bisatu: kimo kiyakana kyobe na kingi kiyakana kya Musa na kingi kya Elia. 7 Ihani timba hadyahuma na hadya babwila mulembela. Na muhuya hawahuma munda mwa timba na uboya: «Yuhu ni mwaana waami wanduvula kwa butu. Mumutelehejyi eyu!» 8 Hangahaŋa, habalola hangondu waabu, ndabumona mundu yungi ha Yeesu halaa.

9 Mukyee'a ihindi kyababwa nangi musala hehulu wa ibanjwa, Yeesu haya banyaya ti, ndabasawilanga mundu nangi yumu byebya byababumona, badindidi lusu Mwaana wa Mundu lwayafukukanga munda mwa baba babumota. 10 Ihani habayana nyaa. Habakiluyiyujya munda mwabu: «Biibi byatwamona bidi muvula uboya bini ‹kufukuka munda mwa bamote?›».

11 Ibobwa habamuyujya Yeesu: «Ngyayi balangidijyi ba mahuya holulu kyabadi musawila ti, Eliya i wavueyanga mabusu ga Masiya?» 12 Yeesu haya balunga: «Ngunindu ti, Eliya wavueyanga mabusu kulonga bindu byooso byayani biyabiya. Habobwa ngyayi Mahuya ha Kabejya kyahadi musawila na ehu ti, mbilehela ti, Mwaana wa Mundu wasubanga kwabutu, na umukezema? 13 Mimi namisawila: Eliya hubuvueya bubululu. Habamutela byebya byooso bibusinyibwa ti, bamatelanga, byebya byabibusinyibwa mu Mahuya ha Kabejya».

14 Haŋa Yeesu na Petelo na Yakobo na Yohana hababufi'a ko'a ubwanangi mitakibwa yingi, habomona ihandu kyatakyata kya bandu kyabanyungalala na ndangijyi ya mahu golulu ebu musindaŋana nabu. 15 Hangahaha bobwa bandu booso bwababumumona Yeesu, haba hanunu'a haba wena mulubilu haba muyambidila. 16 Yeesu haya yuzya mitakibwa yayi: «Mudi musindaŋana nabu u ayi?» 17 Ihaŋa mundu yumu mukyee igandu hayalunga: «Mulangidijyi, namuvwisha kodi bebe. Manee gudi na musimbusimbu wamuta buhala. 18 Na musimbusimbu gulumubanda bihindi byooso, umutasha mu mavu, luta mumuhuma mwanya, uyisuma meeno na wanyana. Handahajya badingisi boobe bajyangi musimbusimbu, haba kushwa.» 19 Ibobwa Yeesu haya balunga: «Banyu, bandu baleelo bashidi na ulungidila, nayani ninu masu ganga? Masu bungi ganda midindila tii, mulongamani? Munivuishidi yughu gende kwandidi.» 20 Ihani habamuvuisha. Bobwa ye, Musimbusimbu bwahubumumona Yeesu, hawamutenga mwana kwa butu. Mwana haya hona mu mavu, hekilugalagala, na luta halukilu huma mukwanywa kwayi. 21 Yeesu haya muyuzya shayi: «Nda udi masu ganga gekidi na musimbusimbu?» Shayi haya mulunga ti: «Usomba utote'a kwayi. 22 Mwena lusu, musimbusimbu yilumutasha u mudilu, mumema mukeba umuhega. Habobwa ishu wavula, utumonene lusa gutu fuudi!» 23 Habobwa Yeesu haya musawila: «Waboya ti, ishu navula! Bindu byooso mbihelahela udi mundu gululungidila udi Kabejya.» 24 Hangahaha, shayi na mwana haya tungula muhuya haya boya: «Na lungidila! Habobwa uniludi'i, manee ulungidila kwami ngushu!»

25 Haŋa Yeesu hebumona igandu kyavueya kukuu, kwabadi, haya taŋanywina musimbusimbu, haya musawila: «Bebe musimbusibu wa buhala na shilutelegejya, mimi nakusawila, huma munda mwayugu mwaana bwangabuni, koko nangushwela gungi munda mwayi.» 26 Haaŋo wowa muzuka hawatumba muuya, na kuzezesha yoowa mwaana binyumiine na kunyomoka munda mwaye.

Ni yowa mwaana bya yakana bidi mundu mumote; haaŋo bandu babule kisha kumona beebya haba sikiyakula ti: «Wamota!» 27 Haŋo Yeesu bya mukwata kukiboko, na kumutalusha, naiye bya taluka mushuteba.

28 Haaŋa he shwela Yeesu mukyende, badingisi baaye haba muyuuzya habeene ibobunga, «Mbikayi baashu ndatuvasamuna kuboosha yiiyi mizuka?» 29 Yeesu bya bayaka: «Mizuka ya biibi yiki bozokanga bobo kwa kuajya».

30 Yeesu na badingisi baye haba hezela kokwa, haba kidila mu kisi kya Galilaaya. Haŋo Yeesu ndee vula mundu neeyumo wayuke bua dya beenange. 31 Kumona wene mukulangidila badingisi baaye na kubasaudila: «Miimi Mwaana wa Mundu nitudibwa mubi boko bya bandu naibo binguyaa; nembebya lufuku lwa kasatu ni zikuka.» 32 Nembebya badingisi* ndabee yuka dedyo huya dye yakula Yeesu. Ibo haba tiina kumu yuuza.

33 Haŋo Yeesu na badingisi* baye haba shwela mu mukola wa Kapelenaumu. Haŋa habe shwela mukyende, Yeesu bya bayuuzya: «Muvane mukuingana kukidila kayi muzila?» 34 Haŋo ndabee yaka kindu, kumona muzila beene mukuingana ibo kwa ibo ti bayuka itu ninaani yidi mukulu hamukidi haabo.

35 Haŋo Yeesu bya yakana haasi, bya bataana baa mitonge baye kumi na babidi na kuba saudila: «Itu mundu wooso ukivula kuyakana wabusu hamukidi ha bandu, ukibambana kukwita wamongo yabooso na muvubi wa booso».

36 Haŋo Yeesu bya buula mwaana muteenene na kumubiika hamukidi haabo. Bya muyambitila, kisha bya basaudila: 37 «Mundu wooso kitabuka kwaaye mwana muteenene bidi yuu muzina dyaami, wangundabuka miimi. Na mundu wooso kingundabuka miimi nda miimi kitabukeye ila watabuka yowa wenguyiisha».

38 Haŋo Yohane bya saudila Yeesu ti: «Mulangidishi twamona mundu ukizyanga mizuka muzina dyoobe, ila baashu hatwa mubengela, kumona iye ndadi yumo hamukidi hiitu».

39 Yeesu bya yaka: «Ndamumubengela lungi. Kumona ndakudi mundu kita kingulungulu muzina dyaami na kaindi kukila wayakule bibibibi kwambidi. 40 Kumona yowa wooso sidi mulwishi wiitu udi mwajyo wiitu. 41 Ngimusaudila bya kwinikindu: Mundu wooso yimuabila mubungu* wa meema ma kukubila, kumona ti mudi bandu ba Kilisito,* kwa kwinikindu ndakukushwa sabwidi yaaye.»

42 Itu mundu wooso waoneshesha yuu yumo mwana mubaa basheenene bakingundabuka miimi kuta bubi, yandiyakana bilweela kwayuu mundu kuangibwa ibwe dikata musingo dyaye, na kukasibwa muziba.

43 Itu kiboko kyoobe kyaku humba kuta bubi, ukitembe! Kumona mbilweela kwaudi kushwela mubua dyamwejyo na kiboko kikimo, kusidi kuyakana na biboko bibidi na kushwela muziba dya mudilo.

[44 Bua dedya disikimota bivinyu byaye wala mudilo waaye ndauki zimika.] 45 Na itu kidimba kyoobe kyaku vishila kuta bubi, ukitembe! Kumona mbilweela kwoobe kushwela mubua dyamwejyo udi na kidimba kikimo, kusidi kuyakana na bindimba bibidi na ukashwele muziba dyamudilo. [46 Buwa didi bivinyu byaaye ndabikimota wala mudilo waaye ndauki zimika.] 47 Itu iso dyoobe dyaku humba kuta bubi, utukune dye iso, na kudi kasa! Kumona mbilweela kwobe kushwela mubutangala bwa Kabejya na iso didimo, kusidi kuyakana na meeso mabidi na ukasibwe jehanamu, 48 buwa didi bivinyu byaye ndabiki mota, wala mudilo waaye ndaukizimika.

49 Kila mundu ukila mumudilo wa kusuba na haŋa ni iyakaneye mungwa winikindu*.

50 «Mungwa ukiyakananga kindu kilweela. Ila itu wa zizimisha kisa kyaaye, uutabini kwa kualusha kisa kyaaye? Na banyu muyakane na mungwa munda mwiinu, na muyakane nyaa, kila mundu na mwizinaye».