1 Egu i Mwiizi Gulegela wa Yeesu Kilisito, Mwaana wa Kabejya. 2 Byeebya byayesinyibwa mubusinye bwa mubushi Isaya:

Kabejya gubu boya biibi: «Na taki anga mu sagujyi waami mabusu goobe,

eyu wa longanga zila ya wakidilanga.*

3 I yoowa gudi muuta mwandu mu ibalagaaza:

Mulonge zila ya Vidi, zila yaayi,

yagololoke zii.»

4 Yohane gubu weena kwii balagaaza, heekilu saula mauya ma Kabejya ti: Bandu basama bubi bwaabo mukuboya ti Kabejya wabafiile lusa bubi bwaabo. 5 Ihani bandu ba butelegejya wowa mwiizi na ugu tabuka, uhuma u Yelusalemu na mu kyee ihindi kyooso kya Bayuuda haba vueya udi Yohane lu yabika, haba haajya lusa lwa bubi bwa babuta mabusu ga Kabejya; Yohane haya bayabika mu luuyi lwa Yolodani. 6 Yohane gubutubila ngubu yababu fuma na mamenywa ga Ngamia. Yohane gubu yiganga mubya wa iseba mu lutinu lwayi, gubwanangi muudya zigi na buki bwa juki. 7 *Yohane haya booya ti: «Udi mundu yungi wa vueyanga manyuma gaami, gudi na butangala unikila. Miimi nidi haasi waayi shilu bengenena unyinama uganga miguzi ya tukokologo twaayi. 8 * Miimi, nibu ba yabika munda mwa meema, haboobwa, eyu wa baba yabikanga munda mwa Tima dya Kabejya».Yohane wasaula mauya kukidila Yeesu

9 Mu ihindi kyeekya, Yeesu gubu huma u Nazareti * munda mwa moola wa Galilaya, haya weena udi Yohane wa muyabii'i mu luuyi lwa Yolodani. 10 Yohane haya muyabi'a Yeesu munda mwa meema; haŋa Yeesu heebu lozo'a munda mwa meema, haya mona lububi lwa yigangula, haba mona Tima dya Kabejya dya sala heegulu wa Yeesu bidi tagaya. 11 Muhuya hawa huma u lububi hawa boya: «Beebe i Mwaana waami wandu vula koo nindu».

12 Hangahaŋa, Tima dya Kabejya hadya mu yiisha kwii balagaaza, 13 haya kaana kwii balagaaza masu moomi ganaa, Shetaani muu musolola. Gubwa nangi hamonga na bwinanyama na Malaika ba bwanangi muu muvubila.

14 Haŋa haba bumuziti'a Yohane mu Afwalubi, Yeesu gubu weena u Galilaya. Heekilu sawiila bandu mahuuya galegela uhuma udi Kabejya, 15 haya boya: «Masu gabengeneena. Butangala bwa Kabejya bwa nenama. Haboobwa mu fululu'i, mutabu'i Mahuya Galegela ga Kabejya»!

16 Lusu lumu, Yeesu gubu weena ayegelanga ha ngondu wa iziba kya Galilaya, Yeesu haya mu mona Simoni hamonga na mu waayi Andele. Ebu muu tashwa tubabila twaabu mu meema manee ba bwanangi balu sheeha na tubabila. 17 Yeesu haya ba sawiila: «Mu vueye mu nikumbi. Na miimi na mibi'anga ba sheha atumbulanga ba bandu.» 18 Hanga haŋa, haba sama totwa tu babila twaabu haba mu kumba Yeesu. Hakeaŋa habasama tubabila twaabo. 19 Haŋa Yeesu haya weena lungi mabusu, haya mona koo'a mabusu gayi, Yakobo na Yohane, baana ba Zebedayo na mu waayi ebu neebu ba bwanangi munda mwa mutumbu waabu mulonga tu babila. 20 Hangahaŋa Yeesu haya bataŋana. Haba musiga shaabu Zebedayo munda mwa mutumbu na ba vubi baayi ihani haba mu kumba Yeesu.

21 Hebuhwa bibi, Yeesu na ndingisi* yaayi haba weena u moola wa Kapelanaumu. Haŋa lusu lwa Sabato,* Yeesu haya shweela munda mwa mu sinagogi, heekilu ludi'a bandu mahuya ga Kabejya. 22 Baa benange muku muteejya haba hanunu'a na uludi'a kwaayi. Ndibu baludi'a byeebya biluludi'a balangidijyi ba Buta;* gububaludi'a na butangala ukila byeebya biluludi'a balangidijyi ba Mahuya golulu.* 23 Akeaŋa kwenange momwa munda mwa sinagogi mundu yumo wenee na mizuka na wene mukuyaba: 24 «Kudi kaayi amukidi iitu, na beebe Yeesu wa nazaleti? Waava kutusubisha? Ngiyuka ti beebe ni; Sidinabubi wa yiisha* Kabejya»! 25 Yeesu bya hanunukila wowa muzuka na kuboya: «Bita! Nyomoka munda mwa yu mundu.» 26 Ni wowa muzuka bya wabilusha yowa mundu, na kunyomoka munda mwaye. 27 Bandu booso benange haŋa byaba hanuka. Byaba kwiyujya hamukidi haabo: «Mbike bindu biibi? Diidi ni langidijyu diya? Yu mundu udi na butangala bwa kuyakula nee na mizuka, naiyo yamuteejya!» 28 Hakeaŋa dedya longo dya Yeesu hadya bambana nee kulojya mu kiba kyooso kya Galilaya.

29 Nyuma yabebya Yeesu bya nyomoka mu sinagogi*, haya yena kukumo na Yakobo na Yohane ku kyende kya Simoni na Andelee. 30 Habe sosoka momwa haba musaudila ti najye mweno na Simoni wene butandabale mu busazu manee wene na kitukutuku kinyumine. Akeaŋa he sosoka Yeesu byaba mu saudila kunemenwa kwaye. 31 Haŋo Yeesu haya tuluka tonono na yowa mwamukazi, haya mu talusha kwa kumukwata ku kiboko. Akeaŋa bya fuuka na kitukutuku hakya musama, naiye bya somba kubaabila bidyazi bya kudya.

32 Hayee bambana kyoolwa, yuba kusala, bandu byaba muvishila Yeesu bandu booso badi na lufu na booso badi na mizuka. 33 Bandu booso ba wowa mukola byaba kumaana busu bwa kibelo kya kyende. 34 Na Yeesu bya fuula bandu babule beenange na nyifu mbalambala. Na kujyanga mizuka yabule; ndee yiabila mbangu yaiyo kuyakula kumona ye mu yuka iye ni naani.

35 Mukisi pupu, kukidi kakunga, Yeesu bya buuka bya nyomoka mu kyende, bya yena bua disivane mundu, na haya somba kuhaajya. 36 Simoni na bezinaye byaba yena kwe mukeba. 37 Haŋa habee mumona, byaba musaudila ti: «Vidi-nyambi bandu booso bakikukeba.» 38 Haŋo Yeesu naiye bya basaudila: «Twene mumukola ungi wa tonono naka saule mauya ma Kabejya koo naako, kumona ti, ni byambevila.» 39 Haŋo Yeesu bya yena mukye kiba kyooso kya Galilaya. Muku yakula mauya ma Kabejya muma sinagogi maabo na kujyanga mizuka munda mwa bandu.

40 Lusu lumo, mundu yumo yidi na kivu weyena busu bwa Yeesu. Bya fukika manyu busu bwa Yeesu, bya kwiaya na kuboya ti: «Itu wavula, ukibambana kungufuula!» 41 Yeesu bya mumonena lusa. Byaolola kiboko kyaye, byamulengela na kumusaudila: «Navula. Ufuuke!» 42 Akeaŋa lufu lwa kivu halwa musama yowa mundu bya fuuka. 43 Nyuma yaaŋo, Yeesu bya mumonesha zila wa yeene na kumulanga biibi: 44 «Teejya bilwela: Ndusaudila mundu nee yumo maama mauya!, Ni uka kwimoneshe kwa mupelo*, na ukahaane salaka* kudi Kabejya ku kumo dya kutooka beebya bye sinya Musa kwaku monesha kudi bandu ti wafuuka».*

45 Bobwa bwe yena yowa mundu, bya somba kumwangidijya wowa musau mabua mooso. Kukidila bebya Yeesu nde samuna lungi kushwela mumukola ungi hululu. Bya yakana mubua dyabunga. Nee mbebya, bandu babule be yena kudiye mbanga yooso.