1 Nyuma ya bebya, Yeesu bya somba lungi kulangidila bandu mauya ma Kabejya hangondo ha ziba dya Galilaya. Kiandu kikata kya bandu hakya kumaana tonono naye, haaŋo, bya banda na kuyakana munda mwa mutumbu wene haulu ya ziba, na bandu booso haba shaala haŋongo ha meema. 2 Yeesu bya balangidila mauya mabule mu miele.

Muyeya miele bya balangidila mukusaula: 3 «Muteezye bangu! Lusu lumo, mundu yumo we yena kukunda dyaye muku miana bukuu. 4 Haŋa henagiye muku miana too tumuka, tumo tumuka hatwaonena hangondo ha zila, tuuni hatwaava na kudya totwa tumuka. 5 Tungi tumuka hatwaonena haulu hamavu madi na mabu, kwashenange mateke mabule. Hatwamena yayaya kumona kaindi kavane mateke ndakene kakata 6 Bobwa hee nana yuba, wowa mutoa hawanyuma kumona mizi ndayeeshwela bileela mu mavu. 7 Tumuka tungi hatwaonena hamukidi ha meeba, maa meeba hama kula kukumo na too tunuka na kutufinga, ndatweeta bimuka. 8 Bobwa tungi tumuka hatwahonena kudi mavu maleela. Totwa tumuka hatwamena, hatwakula na kuhaa mitumba. Tumo hatwa haa mitumba makumi masatumasatu, tungi makumi mutubamutuba, na tungi miamia.» 9 Haŋo Yeesu bya boya: «Yowa yidi na makushu makuteejya wa teejye»!

10 Haŋa Yeesu henange iye bunga, baba bemunyunganga na baa badingisi baye kumi na babidi haba muyuujya waba fifuludile yeya miele. 11 Haŋo Yeesu bya basaudila: «Kabejya uva muabila nyinyi kwa kuteejya bidi bufyame bya butangala bwa Kabejya,* ila kudi bandu badi haaza, ngiyakula kila kindu mu miele, 12 Kwa kuboya ti:

‹Balole soo kusidi kumona.

Baudikijya, kusidi kuteejye,

Kumona bandi fundulukila Kabejya

Na iye wandi bamonena lusa›».*

13 Haŋo, Yeesu bya saudila bandu: «Ndamukiteezya muele wuuwu? Kwa biibi musamuna bini kuteejya miele yingi? 14 Tumuka twe kuna yowa mundu, Mauya ma Kabejya. 15 Tumuka twe hona hangondo ha zila tukifandakana na bandu bamo baki tabukanga mauya ma Kabejya. Akeaŋa, Shetaani* waava kuva kuzula mama mauya. 16 Na totwa tumuka twe honena mu mavu madi na mabu badi bidi bandu bangi baki teejyanga mauya ma Kabejya na kumatabuka na tuseo. 17 Bobwa ndabakisamanga mauya mate mizi munda mwama tima maabo, baki ma kwatanga kaindi kashoo. Itu baba subisha, au baba yaa kukidila mama mauya ma Kabejya, basama butabuke bwaabo. 18 Na totwa tumuka twe hona hamukidi ha meeba. Tudi bidi bandu baki teejyanga mauya ma Kabejya, 19 Ila minyungonyungo ya muune mukisi, busungu bwa bindu buki bembela, na kalabwa kangi kaki finganga dedya huya, kwa bebya ndatukibutula tumuka. 20 Na totwa tumuka twe honena mumateke malwela tudi bidi bandu bakiteejyanga mauya ma Kabejya na bamatabuka na babutula bimuka bilwela, bamo babutula bimuka makumi masatu, bangi makumi mutuba, na bangi mia».

21 Yeesu bya basaudila lungi: «Mundu uki munikanga katoditodi kwa kufukika na ndamba ao haasi hakalako? Ndabeebyo! Miti tukimunikanga kwaku biika haulu hakiibikilu? 22 Kwa biibi ndakudi kindu kidi bufiamishibwe kyashakumonekanga hululu, na kyoso kidi muka fyamafyama kiyakananga hululu. 23 Yidi na makushu makuteejya wateejye!»

24 Yeesu bya basaudila lungi: «Muyakane na mbambi mumaa mamuki teejya! Kumona kasukijyo kakeekaka kamuki sukijyila bandu bangi, ni kyakekee kimu sukijyila Kabejya; naiye ukijya. 25 Kwa kumona yowa kiyakananga na kindu ni wabakiabilanga kingi; ila yowa sidi na kindu na kekya kidiye nakyo kikuzudibwanga».

26 Yeesu bya basaudila lungi: «Butangala bwa Kabejya budi bidi mundu yumo we kuna kunda dyaye. 27 Yowa mundu bufuku we tandabalanga mutulo, munyinya we buukanga, tumuka twamena na twakula naiye ndeeyuka byekidika bini. 28 Muyuke ti mateke menikindu makimenesha tumuka: Busu kamuka kaata kitombo, kisha kaata mutowa na kumongo kaata bimuka. 29 Itu bebya bimuka bya monga, mundu wabuula kiyoma kyaye wakatembe, kumona kindi kya kungula kyabambana».

30 Yeesu bya yakula lungi: «Ngikee kindu kikibambana kuyuula butangala bwa Kabejya? Au tubusaule muukee muele? 31 Boo butangala buki yuudibwa na kamuka ka haladali. Kaki yakananga kashenene kukila tumuka twooso twabaki kuna mukisi. 32 Ila itu kakunibwa, kakula na ndakate mutoa ukata kukila mitoa yooso ya kunda. Kakitanga matabi makata, na tuuni twaava twaluka maishwa maatwo kukidila mwiziizi waaye.» 33 Yeesu we balangidila mauya ma Kabejya mu miele yingi yabule ya byakee biibi; we balangidila mukitimba kyabe bambana kuteejya. 34 Nde yakula kindu kwa badi bila kuba teela muele. Nembebya, itu udi na badingisi baye ibo bunga we ba fifuludila kindu kyooso.

35 Kyolwa kya lwakeeloo lufuku, Yeesu bya saudila badingisi baye: «Tuyabuke mbanga yakabidi ya ziba.» 36 Badingisi baye haba sama kiandu kya bandu haba mubanga Yeesu moo munda mwa mutumbu mwenagiye. Haba somba luendo kwaku yabuka kiziba. Mitumbu yingi yeyabuka kukumo nabo.

37 Haŋa na haaŋa hakwa nyomokela muhee unyumine hawa somba kuhumba mutumbu, mabimbi hamasiki kwikasa munda mwamutumbu, mutumbu hawa somba kuyula meema. 38 Kekya kindi Yeesu wene bu tandabale mutulo kunyuma ya mutumbu bya teela mushu mukihoo.

Badingisi baye haba mubuusha na kumusaudila ti: «Mulangidishi! Ndatumota, ndayikikusaudila kindu?» 39 Haŋo, Yeesu bya buuka, bya hanunukila muhee na kusaudila ziba: «Bita nyaa!» Hakeaŋa muhee hawabita, na meema hama talala hakusite nyaa!

40 Haŋo Yeesu bya yuuzya badingisi baye: «Kwakayi mukitiina? Mbini! Ndamwedi na butabuke?» 41 Baba mitonge haba yudibwa na moyo.

Kwa bebya haba somba kukwiyuzyuzyena hamukidi haabo: «Habanuse! Jyuke mundu yuu, na muhee na ziba byamuteezya»?