1 Lusu lumu Bafalisayo* na bamu Balangidijyi ba buta babu humina u Jeluzalema haba ganda mabusu ga Yeesu. 2 Haba mona mitongi yimu ya Yeesu muudya biyaazi na minyu yidi na ifufu i, uboya tii, ndababu tumba minyu bilu boya bwaama bwaabu. 3 Babu boya biibi, manee Bafalisayo na Bayuda booso ndaba ludya mupaka utumba mobo'o bilegela byeebya bibu balaga ba shaabu. Kyee'a ilagu nda'ibu vula mundu udya bila utumba minyu bilegela. 4 Na'ishu bagalu'a kwijyumbidilu, mabusu ga udya mupaka ba tumbi mabo'o. Na babwa nangi na bilagu bingi bya butu byaba bwa nangi muuta; bidi utumba ngata, milondo, ngolo na bi teelu bingi bya byababu longa na shaba. 5 Ihani bafalisayo na Balangidijyi ba Sambu* haba mu yujya Yeesu: «Kwa ayi mitongi yoobi badi muyatiyila bilagu bya ba shiitu, na mona byeebya bya badi muudya na minyu ya ifufu?» 6 Yeesu haya balunga: «Banyu mudi na ngenu! Mubushi Isaya gubu sagula unindu hebu mi teela asa'u, heebu sinya:

‹Bandu baaba badi muu nineemesha na minomo yaabu ye,

haboobwa matima gaabu galukaana ula naami.

7 Uni haajya kwaabu ngwa busadi,

Na ndangijyu yaabu yilu yaana ndangijyu ya bandu yega*.›

8 Yeesu byabayaka ti: Banyu mulusama bilagu bya Kabejya na mwa kumba buyaani bwa bandu».

9 Na gungi haya ba salwiila: «Banyu mulu yananga ba helahela usama bilagu bya Kabejya manee mulu kumba buyaani bwiinu! 10 Miti, mu luyu'a byeebya Musa byeebu sagula: ‹Tiina shoobe na najyoobe.›* Na haya boya lungi: ‹Yoowa wooso wa kayanga shaayi au najyaayi, wamote.›* 11 Banyu mulu sagulanga ti: ‹Itu mundu udi nakindu kyandi bambana kunyangujya shaye ao najye, ila bya yakula ti kiiki kindu ni kyambivavula kukuabila ni kolobani.*› (Ngu boya ti: na yituula kudi Kabejya). 12 Uta biibi ngu boya tii, mulu sawiila mundu ndi teelanga shaayi ao najyaayi umu yangula. 13 Usagula biibi, mwa taasha hangondo mahuuya ga Kabejya ukidila ndangijyu ya ba shiinu muulu, ya mudi muulula. Na mudi muuta bingi bindu byabutu bilu fwandana na biibi».

14 Ihani Yeesu haya taŋana lungi igandu kya bandu na uba sawiila: «Banyu booso muni telegejyi bilegela na muyu'i kwa unindu biibi byandi mumi sawiila bilu boya ayi:  15 Ndaudi indu ilu shweela munda mwa mundu na umuta bubi. Haboobwa ni bindu bilu huma munda mwa mundu i bilu muta bubi. [16 Yoowa gudi na moosho goo telegejya watelegejye!»] 17 Haŋa Yeesu heebu huma mu igandu na ugalu'a u yende, ndingisi* yaayi haya mu yuujya tii, guugu muele gulu boya bini. 18 Yeesu haya basa wiila: «Banyu neebu, nda mudi na nyinyi? Nda muluyu'a indu nangi imu ilushweela munda mwa mundu na umuta bubi? 19 Manee ndabilushweela munda mwa tima. Haboobwa ebyu bilushweela munda mwa ifu na uhuma lungi munda mwa mubidi waayi na uweena ilu.» Ukidila buubu busagudi, Yeesu gubu vula usagula tii, biyaazi byooso mbilegela udiibwa.

20 Yeesu haya boyalungi: «Ni indu ilu huma munda mwa mundu i ilu muta mundu bubi. 21 Manee migejyu yibiyibi yilu huma munda mwa tima dya mundu i yi lumuta bubi, na ufila mundu uta: Masenga, wiiba, uhega* bandu, 22 masenga, afyuulu, tima dibidibi, majyindi, uta bindu bishidi mu buludi, ngenu, ugambijyeena, uyimona, uluba nyinyi. 23 Biibi byooso bindu bibibibi i bilu huma u tima dya mundu na umubii'a mundu na bubi».

24 Biibi ukila, Yeesu haya huma hanha haya weena mugela gungi nena na moola wa Tilo. Koo'a, haya kwashweela mu yendi imu mwijyeejyi. Haboobwa ndibu vula bandu uyu'a ti, gudi hanha. Habobwa ndibu samuna ufwaama mabusu ga bandu.

25 Biibi muukila, wa mwaazi yumu gubwa nangi na musi'a waayi na muhehe gubigubi haya telejya woowa mwiizi guhyaguhya wa Yeesu, hani haya vueye na haya hulu'a u mgulu ga Yeesu. 26 Yuugu wa mwaazi ndibwa nangi muyuda gubwa nangi mu mugiliki, gubutote'a mu Foiniki* mu isi shamu. Habobwa hekilu yigaya udi Yeesu, wazyangu muhehe gubigubi wabagadi munda mwamusi'a waayi.

27 Ihani Yeesu haya musawiila: «Sama bangu baana baadi biyaazi na uyuuta. Manee nda bilegela ubugula biyaazi bya baana na utashila mbooze.»* 28 Haboobwa wa mwaazi haya mu lunga: «Kabejya, nangi ngu boya tii ngu nindu, na imbwa na eyu yi ludya makombo galu hulu'a haasi heegulu wa ihibiilu haludya baana biyaazi.» 29 Ihani Yeesu haya mulunga: «Ukidila biibi byawa nilunga, galusha u yende kyoobe. Goowa muhehe gubigubi wabagala adi munda mwa musi'a woobe.» 30 Ihani yuugu wa mwaazi haya galu'a u yendi kyaayi, haya heta musi'a waayi muladi heegulu wa bulalu. Muhehe gubigubi gubwa nangi walozo'a munda mwaayi.

31 Biibi ukila, Yeesu haya bagala mu iba ibwa nangi mugela wa Tilo, haya kila mu bwaata bwa Sidona na Dekapoli, na haya weena hangondo wa iziba kya Galilaya. 32 Koo'a haba mu vuishila mundu shilu telegejya hamonga na buhala, na haba mu gaayidila Yeesu ti, wamu hibiidi mabo'o na wamu fuudi. 33 Ihani Yeesu haya mu fufula haajya wa igandu, haba sheena hangondo. Haya shweejya minyu yaayi munda mwa moosho gaayi, haya fiila mata na haya leengala ludimi lwaayi. 34 Ihani haya tungula meesu hegulu, haya saguha na muhuuya watagadi na uboya «Effata!» I usagula biibi: «Yuuzulu'a beebe!» 35 Ihindi nangu lowa, moosho ga yuugu mundu haga gangu'a na ludimi lwaayi halwa namu'a, na heekidi sagula bilegele.

36 Yeesu haya ba sawiila baba booso babwa nangi hanha ndaba sawilanga mundu nangi yumu biibi bibu teebwa. Haboobwa bandu ndababu telegejya haba sagula guugu mwiizi 37 Baaba bandu babu teleghejya guugu mwiizi, babu haanunu'a unindu na haba boya: «Byooso Yeesu byeedi muuta mbilegela! Wa tegeshesha bandu badi na moosho ga zimbani na u sawiisha bifuma»!