1 Yeesu wa shweela lungi mu sinagogi. Mukye kyende mwenange mundu yidi na kyazaza kilebele. 2 Ba bandu haba kidi mulola bamone itu umu fuulanga lusu lwa Sabato,* kwa kuboya ti, bamone zila yaku musosela.

3 Yeesu haya mujyongodela yoowa uvanange na kiboko kilebele: «Taluka kila busu bwa bandu booso bakumone.» 4 Haŋo Yeesu bya bayuujya: «Buune, mbilweela kuta kindu kilweela lufuka lwa sabato ao kuta kindu kisidi kilweela? Ni kuboya ti, mbilweela kufuula au ku yaa mundu lufuku lwa Sabato?» Ila ibo haba bita bii. 5 Yeesu haya balola booso sokosoko, haya zinguka; bya mona susu mutima dyaye kumona kuuma kwa matima maabo. Kisha bya jyongodela yowa wene na kiboko kilebele: «Olola kiboko kyobe!» Na iye bya olola kiboko kyaye, na kiboko kyaye hakya fuuka.

6 Hakeaŋa, Bafalisayo* haba nyomoka haaza ha sinagogi haba yeena mukuta kaole kukumo na bandu ba Helode ti, bamone zila yaku muyaa Yeesu.

7 Yeesu na badingisi baye haba hezela mudedya bua haba yena hangonda ha ziba dya Galilaya na kiandu kikata kya bandu; hakya mulonda. Kumona beteejya bindu byooso byetangeye. Bandu benyomoka ku Galilaya na Yudea, 8 na bangi haba nyomoka ku Yelusalemu, Idumea mwajyo wa luuyi lwa Yolodani, na bangi hangondo ha kisi kya Tilo na Sidoni na booso be yenaa kudi Yeesu.

9 Kumona bukata bwa kyandu kya bandu Yeesu haya saudila ba dingisi* baye ti bamu bikile tonaa mutumbu umo ushee, kumona ti kiandu kyabandu ndakimufinga. 10 Kumona Yeesu wefuula bandu babule, na baba booso benange na nyifu bemufinganga kwaku boya ti Yeesu waba lengele. 11 Na haŋa baba bandu badi na mizuka habe mumona Yeesu, haba hona busu bwa Yeesu ibo muku bazya miuya: «Beebe udi Mwaana wa Kabejya!» 12 Ila Yeesu bya babengela kushu minyee ndaba saudila mundu ti iye ni naani.

13 Kaindi kashoo kukila, Yeesu haya banda haulu ya kituulu, haya taana bandu beevuleye, haba yena bua dyenangiye. 14 Iye bya sobola hamukidi haabo kumi na babidi, haya baabila zina dya mitonge. Yeesu uva basobola kuboya ti bayakane naye, na wayakanange mukubayiisha mukusaula Mauya ma Kabejya. 15 Na bya baabila butangala bwa kujyanga mizuka. 16 Maama ni mazina ma baba mitonge kumi na babidi: Simoni, yowa we hunika Yeesu zina dya Petelo, 17 Yakobo na Yohane baana ba Zebedayo Yeesu haya baabila ibo booso zina dya Boanalegesi, kumonesha ti «Mbaana ba mukungulu» 18 Bya sobola byakebee na Andele, na Filipi, na Balatelemi, na Mateo, na Tomasi, na Yakobo mwaana wa Alufayo, Tadayo, na Simoni Muziloti, 19 Bya sobola lungi na Yuda Isikaliyote, yowa we tuula Yeesu.

20 Hani Yeesu hayaweena ku kyendi*. Igandu kya bandu hakyamukumba gungi kukuu, hayaaluka lungi mukyende habafi'a ku kyendi, Yeesu na mitongi yaayi habakushwa udya biyaazi.* 21 Hanha Bawayi na Yeesu hababu telegejya biibi, habaweena kumubugula, manee bakwaye bavaboya ti Yeesu ndate na kaololo.

22 Balangidijyi ba buta, babuhuma u Yelusalema haba kilu sagula ti: «Yeesu wabandwa na Belzebuli. Misimbusimbu, haba kidi muu boya lungi ti ngu kidila butangala bwa yuu Belzebuli* na mweedi wa Shetaani, iboobwa Yeesu byeedi mujyanga Misimbusimbu.» 23 Ukidila biibi Yeesu haya bataŋana na haya bateela muele: «Byasa muni'anga bini, Shetaani uyijyangijyeena iyu mwinindu ujyanga Shetaani? 24 Ishu bandu babutangala bubumu bwa gabulu'a mu bihindi ngu boya tii, boobwa butangala nda bootebama* ishu ndabudi muulwa ebu bunindu, ndaboo tebama! Bwa honanga. 25 Na ibyanga byeebya bandu ba ilongo kikimu ishu bagabulu'a ibu kwa ebu, kyee'a ilongo nda kyoo talu'a. 26 Itu Musimbusimbu naiye waaba butangala bwaye, buubutangala bwalwa na buu bungi nguboya ti wakwivundanya iye mwinikindu haŋa butangala bwaye bwawa.

27 Unindu, mundu ndo shweela mu yendi kya mundu gudi na butangala, tii, wabugudi bindu bidi munda mwa yendi kyaayi, ishu mabusu ndibu muganga mwiini yendi myilu. Ishu wohwa umuganga myilu ihani haya samunanga ubugula bindu bidi munda mwa yendi kyaayi.

28 Namisawiila unindu: Unindu Kabejya wa bamonenga lusa, bubi bwa bandu badi na bubi na baba balu kaya bandu booso bafwilwanga lusa, mu bubi bwaabu booso baaba bamu kayanga Kabejya; 29 haboobwa, mundu yoowa wooso wakayanga Tima dya Kabejya,* Kabejya nda kumufiila lusa neelumo! Manee mundu watanga bibi waya nanga na bubi* Kwakumona ti bobwa bubi bwooso buyakananga kukumo naye bwa masu* gooso bila ufwiilwa lusa bubi bwaayi.» 30 Yeesu gubu sagula bibi manee balangidijyi ba Buta* babu boya ti: «Gudi na muhehe gubigubi».

31 Nyuma yahaŋo Najyaayi* na Yeesu na bawaayi* na Yeesu habafi'a. Haba tebama haajya. Habe nange bakidi haaza haba yiisha mundu wenangi kumutaŋana Yeesu. 32 Momwa munda mwa kyende, bandu babutu babukaana haasi haba munyungalala Yeesu, haba musawiila. «Lola! Najyoobe na beena yoobe, badi haayja badi mukukeba.» 33 Yeesu haya balunga: «Najyaami ninani, na ba waami mbanani?» 34 Na Yeesu haya lola baba babu yaana haasi na umu nyungalala, haya boya: «Baba i Najyaami na ibawaami! 35 Umona Yoowa wooso watanga byeebya Kabejya byeelu vula, i muwaami na i Najyaami.»