1 Bulus ka sro si ran ya wa rinkon-a ran tre, <Miri vayi, Me kre ndu won ri Izhi ri sron rɨrɨ ri vi nyi.>> 2 Hananiya rinkon wa ndu Izhi ka la wawa wa kuki hyure ri Bulus wari wuru wu ri nyu. 3 Imba Bulus ka tre ri wu, a wu ri meme sron, <<Izhi ri wuru-u ri nyu ngawen! Wu son ri mba wuri ri bla tre ri mo bibi riwa a he ri doka, ama wu ran hu doka ran wu lawa ri nowa wuru wen!>> 4 Wawa wa ki hyure ri Bulus wa tre, <<Wu ran to ri wu kra nji rinkon ri ndu Izhi tu ran?>> 5 Bulus ka tre,<<Miri vayi, me ran to ri a he rinkon wa ndu Izhi ran, ritu a he ri nga: <Ran tre tre meme ritu wa rinkon wa nji mbi ran.>>> 6 Riwa Bulus a to ri wari mba wa he Sadukyawa, nga ngbromba wa he wa nji Farisa, ka yo wa rinkon-a ri, <<Miri vayi won wa nji Israila, me he nji Farisa nye, ivren Farisa. Wa tsra wen rinyi ritu me he ri yosron ri wawa wa kuu wa bru tashme!>> 7 Riwa Bulus a tre ngamba, ijanyu ka gra ri wa Farisa nga Sadukyawa, riwa ikabrutu mba ka ga ti hari. 8 Wa nji Sadukyawa waka tre ri, itashɨme ran he ran, ba kuma miriko Jii, ko iyu. Wa nji Farisa waka kri ri wawu mba wa he. 9 Ijanyu ka wulunde, wawa wa tsro tre Musa wa gbu Farisa waka wulunde ki nde, waka gra ri janyu. <<Ki ran bru fe meme ti rɨ ri nji nyi ran,>>Wa tre. <<Idan a he iyu ka ivrenko Izhi nyen a tre fa?>> 10 Ijaŋyu-a ka ngji waŋyu ye ri wa riwa rinkon wa klukpa ka ran ti sisiri ritu ka wa gbu wu ti zhuzhu. ka la wa ŋduwan no wa gre wari hi gbu ka kawa don ran ngɨzhi wu ye rimi mpwan. 11 Ri chu ri hari wan Bachi ka kɨri kusan Bulus ran tre,<<Vu sron, Bibi riwa wu kpa nyu won ri Urushelima, ngamba nyen wu kpa nyu won ri Roma.>>

12 Mibreka kpan, nji Yahuda waka vu nyu ri wawa wa ran ri ka wa ri so kyari ran ri tse wawa wa wuu Bulus. 13 Wawa wa kadzi ri wa wuu Bulus wa ke nji ŋgibresenza. 14 Wa hi ri w Firist ri wa rinkon wari tre ri,<<Ki shiiji ri ki ran ri ko ki so kyari ran tse ki wuu Bulus. 15 A he ngamba biyi wa rinkon bi hi ri la rinkon wa klukpa ri no ngɨzhi wu ye no yi, a zhu mba ka bi wa bi ri mɨlan bru miyen tu tre wan ri, kita ki mɨlan ki ritu ki wuu-u ri ko no ye zhuu nyi.>> 16 Riwa ivren vayi Bulus ka wo kya riwa wa wa wari ti, ka tsutsu hi ri ko wa klukpa ran ka la Bulus. 17 Imba Bulus ka yo nji wa klukpa ri ran la wu ri,<<Ngɨji vrenze nyin hi ri kusi nji rinkon a he ri kya riwa a riwa ran lawu.>> 18 Imba nji ri klukpa ka ban Bulus riwa wa tren-u-a hi kusi rinkon wa klukpa.

Nji ri klukpa ka tre ri,<<Bulus, nji riwa wa vu tren-a, a tiwen ndu ri wu ran tre ri mi ngji vrenze nyin ye ri wu ri a he ri kyari riwa ari la wu.>> 19 Rinkon wa klukpa ka gbi vrenze-a ri wo hi ri gran ran mɨyen wu yayɨbi ri,<<Ngye nyen wu ri wu su wu ri la mo?>> 20 Ivrenze-a ka tre,<<Ri nji Yahuda wa nyime ri wa miyen wu ri no ngɨzhi Bulus ye kusi wa rinkon mibreri gbundo ritu wa ri mɨlan wo tre ritu wan. 21 Ran nyɨme ri wa ran, ritu wa ke senza donton riwa wa gben. Wa shiiji ri wawa wa ran ri ko wari so ran tse wawa wa wuu-u. Wa ki ri gben wu don wuri no wa nkon.>> 22 Rinkon wa klukpa ka la vrenze-a ri no hi ngawan,<<Ran la njo tre riwa wu la wen-a ran.>>

23 Imba rinkon wa klukpa ka yo wa klukpa ti hari ran la wa ri, <<zhu wa klukpa ŋgibregbigba hari, nga wa hon ima ŋgibresetangban nga wa ta wɨyen ŋgibregbigba hari ki hi ri kaisariya ri krefi chu wa ri chu nyi. 24 A lawa ri no wa wa ŋɨma riwa Bulus ri hon hi ri rinkon ri Felis ri senkpa.>> 25 A nga mbe ri wa a he ngayin: 26 Juu ri Kalaudiyas Lisiyas hi ri wawu ri kpanchi ri gbu Felis. Tɨrewu bran bran. 27 Nji nyi nji Yahuda wa vu ri wawa wa wuu, ama mi ye ri wa ndu won ki ri kpa chuwo, ritu me wo ri a he nji Roma nyen. 28 Me ran wa me ri to ngye nyen Bulus ti ko wa vuu, mi ka ngɨzhi wu hi ri wa rinkon mba. 29 Mi to kya riwa wa vuu Bulus ritu wan a he ritu imɨyen ritu doka mba, ama ikyari ran he riwa a ke riwa wa wuu-u ko wa vu tre ran. 30 Riwa me wo kya riwa wa kadzi ritu Bulus, me truu ye ri yi meron. Nga me no wawa wa vu-a nowa ngji tre mba ye ri wu ritu wan. 31 Imba wa klukpa wa ka ban Bulus bibi riwa wa lawa ngɨzhi hi ri gbu Antibatrisi ri chu. 32 Mibrerɨa waka ka wa gbegbe chuwo riwu no wa ban kusi, ngbɨron mba waka kɨma hi ngamba ri mpwan. 33 Riwa wa gbegbe wa ke ri Kaisariya, waka ka mbe-a nga Bulus ka no Felikus. 34 Rinkon ŋji-a ka kɨra mbe-a ran mɨyen ri Bulus he nji gbu tan nyen? Riwa a wo ri a he nji kilikiya nyen, 35 Rinkon gbu ka tre,<<Me wo tre wen ka wawa wa vu-u wa ye zhi ri nyin.>>Imba ka lawa no wa Bulus ran gben dzi ri tra bla tre wa Hiridus.