1 Riwa a ti vi ton rinkon wa tsro tre Izhi, nga Hananiya waka ye wawa wa rinkon nga nji ri bla tre riwa wa yo ri Tartulus, waka nji tre mba ritu Bulus ye kusi nji rinkon. 2 Riwa wa yo Bulus ye rimi, Tartulus ka ngɨzhi tre wan ye kusi nji rinkon:<<Ki ran ri raro nga ri sisron, iya kusi wen a ngɨzhi sran ye ri gbungblume. 3 Ko minyi, ko ri nkon ritan, a wu Felis rinkon rigbu, ki kpa rinyi ri ngɨri. 4 Ama ritu ki ran no wu ya ran, Me ibreu wuri sɨren ton ri wo ta. 5 <<Ki fe nji nyin a he nji riwayun nyen, ari ngɨzhi wanyun ye rimi nji Yahuda ko kutan ri gbungblume. Wawu nyen he rinkon ri gbu Nazarawa, 6 Nga wa su ran kpa bubu bre Izhi time, ki ka vu ngɨzhi. 7 Ama lisiyas rinkon wa klukpa ka ye ran kpa ri gbengbren 8 Riwu ya-u kyuwen, wu to kya kpunji ritu tre riwa ki ngɨzhi ye ritu wan.>> 9 Nji Yahuda ngawen waka kpa hu wa, ri a he ngamba nyen. 10 Riwa nji rinkon no ri no tre, Bulus ka tre:<<Me to ri sisenmu ri wu he nji ri bla ri gbungblume, ri kinklan sron me kpa nyu ngawon. 11 Wu ya mɨlan wo ri a ran han vi wurudon hari riwa me hi ri Urushelima me ri gbresan nde Izhi. 12 Wawa wa ran kɨrawentu wa ran fe wen me janyu ri njo ri tra bre Izhi ran, ko me kpaŋji ran pɨsi ri tra Izhi ko ka ri bubu ri nkan rimi gbu. 13 Wa ran ya la kpunji ri wu ritu kya riwa wa tre ritu won ran. 14 Aran he ngamba nye me yɨme ri me hu Izhi riwa wati mbu ka wawa wa hu gba riwa wa yo ri irɨme. Me kpa nyɨme ko ŋge riwa wa yɨme ri doka nga a he rimi nga ri wa la tre Izhi. 15 Me yo sron ri Izhi bibi wa nji mba, ri vi riye riwa wawa wa kuu wa tashime ri wa dindi ti riwa meme ti. 16 Me ti kukuri me ri no sron won no he kinklan kusi Izhi nga kusi nji. 17 Kugon ise riwa wa vu yɨwa, me ran ye ri Urushelima me ri ngɨzhi de won ngji hi no wa ya nga me ri de sraka. 18 Me he rimi ti kamba waka fe wen rimi tsɨtsɨri ri tra bre, gbunji wa ran he ri me ran, me ran ran kpagɨro ran. 19 nji Yahuda wari wa he riwa wa zhu ri Asiya, wa wa wari ye ri wu wari ngɨzhi tre won ye ri wu ka wa he ri kyari ritu won. 20 Ka nji mba ritumba wa ya la kya riwa wa fe wen ri wu riwa me he kusi wa rinkon, 21 Ara riwa me kpagɨro ka mi kɨri kusi mba,<A he ritu tre tashime wawa wa kuu nyen me he ri kusi mbi luwa.>>> 22 Felis riwa a he ri tu to ritu nkon-a ka lawa ri no wa kawa chuwo, ran tre, me rimiren ritu tre mbi. 23 Ka no rinkon wa klukpa ri no kɨshu Bulus ti ran gben ama no chu wu wo no vɨri, no ran dzu wa kpan wan ri ye ri bubu ya wu ran. 24 A ti vi hari Felis nga wa wan, Durusila, a he ivɨra nji Yahuda. ka ti ndu no wa ngɨzhi Bulus ye, ka sɨren ton ran wo wu ritu tre kpanyɨme ri Bachi Yeso. 25 Bulus ka ran bla tre ritu ti dindi ti, ri vu tu, nga no ya riwa ari ye, Felis ka ti sisiri ran tre ri,<<No kɨreron! Wu ya hi ngawen ron.Ka me fe nkon, Me tiwa ndu riwu.>> 26 Ritu a ran yo sron ri Bulus ri no wawu nkɨren, ritu wan nyen a ran ye ri wu ri so ri so, ran tre riwu. 27 Riwa ise hari ka vu yɨwa, Pokiyus Festu ka kpa kpanchison Felis. Felis ritu riwa a ran wa no yi wan no ban nji nji Yahuda, ka chu Bulus wo ri tra tre.