1 A don vi hari riwa wa roro ri dza gran nga ro ri kpa kpi fu ran tse wa rinkon wa sro yii nga wa tsro doka Musa, riwa wa vu Yeso ri yayɨbi wari wuu-u. 2 Ama wa tre ri<<No ran he ri vi ri roro dza gran ran ritu nji wa wulunde ri wanyun.>>

3 Yeso a he ri Batani ko nji riwa wa ran yo-u ri Sima riwa a he ri lilo ntan kpa, riwa Yeso a ran ri ri tse iwa ri ka ye ri mgbu ri riwa wa ti-u ri tita onis, a sro nye ri hwi raro riwa a ti nkren bran sho rimi wan riwa wa ti-u ri konkron nardi zalla, iwa-a ka yira nyun mgbu-a ran ka nye-a bwa Yeso ri tu.

4 Inji wari wawa wa he ri bubu wan waka ti fu wari ran tre ri ngamba ri,<<Ritu ngye ko wa kpa nye nyi ri time ngayin? 5 Wa ri ka nye-a rebibi riwa wa ri fe nkren bran riwa wa han wa ndu ri vi gbigba tra nga wa ri no wa yaa ran bi.>>Imba waka tre wa-a bran bran.

6 Ama Yeso ka tre ri wa ri,<<Ka-u chuwo! ritu ngye ko bi nyan-u sron? A he kya ndindi nye a ti ri mo. 7 Wa yaa wa he ri yi bla vi, bi to dzon wa ko ri shitan ri wa bi wa bi ri dzon wa. Ama a ran he bla vi nye bi fe wen ran. 8 A ti kya riwa a tsra ri gbengbren wan. A bwa nye-a mo ri kpa ritu riwa wa no wen yɨbi. 9 Me la yi kpunji tre, ko kutan ri mgbumgblume nyi riwa wa la tre wan dindi nyi, wa ran taka kya riwa iwa nyi ti ri mo.>> 10 Imba Yahuda Iskariyo riwa a he ri rimi miri ndu Yeso wurudonhari ka hi ri rinkon wa sro yii riwa ran ka Yeso reri wa. 11 Riwa wa wo ngamba waka ngɨri bran bran wari la-u ri wa no nkren, Yahuda ka gra wa nkon riwa ari ka Yeso reri wa.

12 Ri vi ri mimilan ri ro ri dza gran ri jujuyɨmo riwa a ran he ri mumu ri kpa kpi fu ran a he vi riwa sro yi ri vren ntɨma ri roro ri dza gran, imba imiri ndu wan waka miyen Yeso ri,<<Ri minyi nye wu wa ki hi milan bubu ri ri roro ri dza gran ti ri wu?>>

13 Imba ka ti miri ndu wan hari ndu ran la wa ri,<<Hi rimi gbu ri bubu wan bi to nji ri a ngɨzhi vaja ri ima ari fe yi. bi ka hu-u. 14 Iko riwa bi gra bi ka miyen nji ri ko-a ri,<Inji ri tsro ri miyen ri itra riwa wawu nga miri ndu wan wa ri ri ri roro dza gran he kutan?> 15 Wawu ri tsro yi kpolo tra ri ri shu riwa wa mɨlan ti kre-e ritu roro-a. Ri bubu wan nye bi mɨlan bubu ti.>> 16 Imba imiri ndu Yeso waka wulunde wa ri gra rimi nchon gbu wari ka fe kyawa riwa Yeso tre ritu wan-a imba waka mɨlan bubu ri ri-a ti. 17 Riwa Yawulu a ti, Yeso nga miri ndu wan wurudonhari-a waka hi ri ko-a. 18 Riwa wa ran ri ri-a Yeso ka tre wa ri,<<Kpunji tre me la yi, iri rimi mbi wawa bi ri ri ri me ri nyi ri ka wen re.>>

19 Imiri ndu wan waka ti fu wari ran miyen-u yɨyyɨri ri <<Ka a he ame kya?>>

20 <<Yeso ka nyɨme ri wa ri,<<A he ri rimi mbi wurudon hari wanyi riwa ki son wo ri vaŋo riri imbu-u nye. 21 Ivren nji ri kuu bibi riwa a he rimi ngan ritu wan! Ama iyaa nji riwa ari ka vren nji de! Ari bi ri wu riwa wari ran ngɨzhi-u ran.>>

22 Riwa wa he rimi ri ri Yeso ka ban jujuyɨmo ran ngiri ri Izhi nga ran chiwa ran ka no wa miri ndu wan ran tre ri,<<Kpa yi, rinyi he ka ikpa won nye.>>

23 Ngha kugon rimba Yeso ka ban vaŋo ri ima ri ro-a ran ngɨri ri Izhi ritu wan nga ran ka no wa miri ndu wan-a, nga wawu mba waka so rimi wan.

24 Yeso ka tre ri,>>Ri nyi he yii won nye, iyii riwa wa katre dzi ri ari rega ritu nji ki gbu. 25 <<Me la yi kpunji tre ri, me ran bru so ima ri ro nyi ngaran tse chachu riwa me so ri sisa wan ri kpanchison Izhi. 26 kugon riwa wa chuse ri gbre mba waka zhu wari hi ri mgblu ri konkron zaitun.

27 Yeso ka tre ri miri ndu wan ri,<<Wawu mbi bi wulutsu ka wen don bibi riwa wa ngan ri mbe iri,<Wawu ri wuu nji ri kɨshu ntɨma nga intɨma wa pisi.> 28 Ama kugon riwa me tashɨme me gbuchi hi ri yi ri Galili.>> 29 Bitrus ka tre ri,<<Ko wari ka-u don wawu mba, ame me ran ka-u don ran.>> 30 Yeso ka tre ri Bitrus ri,<<Kpunji tre me la-u, ri chu nyi wu tron nyun won ti mkpa tra ri ko no kuko no tɨbu 31 Ama Bitrus ka sondu ran tre ri,<<Ko wari ri wuu wawu, wawu ran tron nyun Yeso ran.>>

Ngha mgbron mba waka tre ngambame.

32 Yeso nga miri ndu wan wa ye zhu ri bubu ri riwa wa yo-u ri Getsemani bubu riwa wa shibi wɨlo konkron Zaituu, Yeso ka tre ri miri ndu wan ri,<<Biyi kuki ri nyi me hi bubu bre Izhi.>> 33 Yeso ka yo Bitrus Yakubu nga Yohana ri ngawan nga ka gra ri tika nga shnji sron. 34 Yeso ka tre ri wa ri,<<Shnji sron riwa a he ri mo ri sron ari to wuu wen, bi kuki ri nyi bi ri ran ya.>> 35 Riwa Yeso a hwi hi kusi tsawen ran joku ri mme ran bre Izhi ri ran bi wari ban vi yaa nyi ri mo. 36 <<Yeso ka tre ri, Abba, A ti won ikyari ran ri na-u wo ran, wu ban vaŋo yaa nyi zho ri mo, ri ngamba wu ti kya riwa a bi ri wu a ran kya riwa a bi ri mo ran.>>

37 Kugon rimba Yeso ka bru ye ran ye fe miri ndu wan hari-a ka wa krunna ka tre ri Bitrus ri,<<Bitrus bi kru nna ngye? Ko wu ran to gben ri vi tsawen ran? 38 Milan ran ya bi ri ran bre Izhi ritu bi ri ran joku ri tsra ran, iyu ri wa ran ti kya ama ikpa ran he ri senkpa ran.>> 39 Yeso ka bru hi ri bubu bre Izhi ran bre bibi riwa a bre ri sen-a. 40 Imba Yeso ka bru ye ran ye ran fe miri ndu wan ka wa kru nna nganga ritu inna a sho ri wa ri sii nga wa ran to kya riwa wa tre ri wu ran. 41 Riwa a hi ran bru ye ri mkpa ri tra ran tre wa ri,<<Bi kambi ri kru nna ri ka bi son vri nye? A kre ron! Ivi ye riwa wa ka vren nji no wa meme ti. 42 Wulunde ki hi, ingye ngaa nji riwa ari kawen reri ye-on!>>

43 Riwa Yeso a he rimi tre tse Yahuda iri rimi miri ndu wan wurudon hari a ye iwawa nji kigbu wa ngɨzhi wa njimgban nga kpala a he wa rinkon wa sro yii nga wa tsro doka Musa nye wa ti wa ndu ye ri Yeso. 44 Yahuda nji riwa ari ka Yeso re-a ka la wa dzi iri,<<Inji riwa wawu smo ngɨzhi mbari ka a he wawu nye bi ka vu bi ri milan-u ngɨzhi.>> 45 Riwa Yahuda a ye zhu ri Yeso ran tre ri wu ri,<<Inji ri tsro!>> Ngha ran smo ngɨzhi. 46 Imba nji-a waka vu Yeso wari ngɨzhi-u mgbemgben. 47 Imba nji ri rimi nji wawa wa ki ri Yeso riwa a kri hyure ri wu ka chu njimgban ran ka sren mvumvu ton vren ndu nji rinkon wa sro yii-a taga. 48 Yeso ka tre wa ri,<<Bi zhu ri wa njimgban nga wa kpala bi ri ye vu wen ka me he nji ri yɨbi? 49 Ingye ti ko bi ran vu wen ri bubu bre riwa Izhi riwa me he ri yi me ri ran tsro ran? Ama kyawa wa nyi wa ti ritu no tre Izhi riwa a tre ritu won no ye ke.>> 50 Ri bubu wan imiri ndu wan waka ka-u don wari tsutsu. 51 Ivren nze ri a hu Yeso ran hi a ran suu tsro wan ri wu tsro riwa ka ka kpa wan ri wu riwa nji-a wa wa wari vu vren-a, 52 ama ka sii ŋɨma tsro wan-a don wa ri wo ran tsutsu ri mgbamgbre.

53 Waka ngɨzhi Yeso hi ri kusi rinkon wa sro yii nga mgbron wa rinkon wa sro yi-a nga wa tsro doka Musa waka shutu ki ri bubu wan. 54 Inga Bitrus ka ran hu Yeso ri kpata, hari hi ri ko rinkon wa sro yii-a ri bubu wan ka son ri wawa wa gben ran ran so gbaji wulu.

55 Wa rinkon wa sro yii-a waka ran wa wari fe kyari riwa ari tsro ri Yeso ti meme ti ritu no wa wuu-u ama wa ran fe kyari ran. 56 Inji kigbu wa la tre ri che ritu Yeso, ama nyu mba ari he riri ran.

57 Kugon rimba nji wari waka wulunde kri nde wari la tre ri che ritu Yeso ri: 58 <<Ki wo a tre ri,<Wawu ri zii bubu bre riwa nji wa mme nga kugon vi tra wawu ri mme risa.>>> 59 Ka hu ri ngamba inyu mba ka ran ye ri ri ran.

60 Imba rinkon wa sro yii-a ka wulunde kri nde ran miyen Yeso ri,<<Wu ran he kya riwa wa tre ritu tre riwa wa tre ritu wen nyi ran? Itre riwa wa tre ritu wen ran?>> 61 Ama Yeso ka songbi a ran la-u kya ri ran.

Ngha rinkon wa sro yi-a ka bru miyen Yeso ri,<<Ka a wu nye wu he Kristo ivren Izhi ri tilɨbu?>>

62 Yeso ka tre ri,<<Me he wawu nga wu to vren nji ri kuson kuwori bubu gbengbren riwa Izhi nga ari zhu ri kpa wulu ri shu ye.>>

63 Imba rinkon wa sro yii-a ka gbon tsro wan ran tre ri,<<Itre ngye wu he ri wu?>> 64 <<Bi wo riwa a kpa nde time ri Izhi, ko bi to ki ti-u ri se?>>Wawu mba waka tre ri no wawa wuu. 65 Wari mba wa gbuchi ran sru nten ran sro Yeso wari lo-u si wari ran tsii wa ran tre ri,<<La ta nji riwa a wuru-u!>>Ngha wawa wa gben wa sondu ran tsii.

66 Bitrus ka son meme ri ko riwa wa vu Yeso hi imba vra ri ndu ri rimi wawa wa ti ndu ri ko rinkon wa sro yii-a ka ye i bubu wan. 67 Riwa a to Bitrus ri so nzan wulu ka milan-u ya ran tre wu ri,<<A wu ngawen wu he ri Yeso nji Nazareti.>>

68 Ama Bitrus ka tron ran tre ri<<Wawu ran to kya riwa ari tre mba ran.>>Imba Bitrus ka wulunde hi ran ka kuson ri tra nkon ri ko-a, nga ri bubu wan kuko ka tɨbu.

69 Riwa ivra-a ka bru to-u ri bubu wan, ka bru la wawa wa kukri ri bubu wan ri,<<Ri nyi he ri rimi mba nye.>> 70 Bitrus ka bru tron nganga. Kugon vi tsawen wawa wa hi hwɨreri Bitrus wa ka tre wu ri,<<Kpunji tre wu he iwawa nye. ka wu ran he nji Galili nye ran.?>>

71 Ama Bitrus ka ran shizhi ran ran la nyun ri ngawan ri kusi mba, a ran tre ri,<< Wawu ran to nji riwa wa tre ritu wan ran.>> 72 Ri bubu wan kuko ka tɨbu ri mkpa ri hari Yeso a la-u ri,<<Ko no kuko no tɨbu ti mkpa hari wu tron nyun won ti mkpa tra.>>Riwa a taka tre riwa Yeso a la-u-a ikpa wan ka ku ka gra yii.