1 Yeso ka la wa ri,<<Kpunji tre me layi, wari rimi mbi wa ran kuu ran tse kpanchi Izhi ye ri gbengbren wan.>>

2 Kugon vi tanren Yeso ka gbu Bitrus ri Yakubu nga Yohana hi ri tu mgblu, ri bubu wan wa he nkankshe mba, wa he ri bubu wan ikpa Yeso ka sran kinklan pyapya ri kusi mba wawu. 3 Itsro wan ka kɨma he kinklan ran ran kpan riri bibi ri wa injo ran ri to ngla-u no he ngamba ri mgbumgblume nyi ran. 4 Tse wa la tre ri kusi hari lliya nga Musa waka zhu ri wa wari ran tre ri Yeso.

5 Bitrus ka tre ri Yeso ri,<<Inji ri tsro a bi riwa ki he ri nyi no ta ki ti bru ti tra, iri ri he wa me iri ri he wa Musa nga ri ka he wa lliya.>> 6 Aran to kya riwa ari tre ran nye ritu wawu ri mgbron mba wa ran ti sisiri bran.

7 Ikpawulu ka zhu ran ye ka wa si, iraan ka zhu rimi kpa wulu-a ye ri,<<Rinyi he vren won riwa me nyɨme-u, bi wo-u!>>

8 Ri bubu wan waka ndzu si ya wa ran to njo ngaran ka ra Yeso.

9 Riwa wa ran gre ri tu mgblu, Yeso ka gbi wa ton ran tre ri no wa ran la njo kya ri wa wa to ran tse chachu riwa ivren nji tashɨme ri bubu gru. 10 Wa ka tre-a chuwo wari ran miyen ngamba ri ingye nye Yeso ri tre ritu,<<Tashɨme ri bubu gru.>>

11 Ngha imiri ndu Yeso waka miyen-u ri,<<Ritu ngye ko wa tsro doka Musa wa tre ri Iliya ri gbuchi ye ri?>>

12 Yeso ka la wa ri,<<Kpunji tre nye Iliya ri gbuchi ye ran milan kongye ti ri. Ama a ran he rimi ngan mbe Izhi iri ivren nji ri so yaa bran nga wa kamba ri wu ran? 13 Ama me la yi Iliya-a riga ka ye-e nga nji wa ti-u kya riwa isron mba su bibi riwa wa ngan ri mbe ritu wan. >>

14 Riwa wa Yeso nga miri ndu wan wa bru ye fe mgbron mba tse waka to jɨbu nji wa kagon ki wa tsro doka Musa waka ran jan nyu ri wa. 15 Riwa ijɨbu nji-a wa nzu si to Yeso waka ti sisiri bran, waka wulunde tsutsu ye tre ri wu.

16 Yeso ka miyen wa ri,<<Bi janyu ngye iwawa?>>

17 Inji ri rimi jɨbu nji-a ka tre ri,<<Inji ri tsro me ngɨzhi vren won ye ri wu ritu a he ri lilo meme wu a ran ri to tre ran. 18 Ri vi riwa lilo-a wulunde ri wu, ari ban wu taga ri meme ari no si funfon ri nyu ran ran tan ŋɨri, nga ran ran nɨme ngawan. Me miyen miri ndu wen no wa chu meme yu zho waka ran to ti-u ran.>>

19 Yeso ka tre wa ri,<<Biyi nji wa nzan nyi wawa bi ran he ri kpanyɨme ran, me son ri yi hi shitan nye? Me vu sron ri yi hi ri shitan? Ngɨzhi vren-a ye no wen.>>

20 Waka ngɨzhi vren-a ye ri Yeso, riwa iyu meme-a a to Yeso, ka wuru vren-a taga ri meme ikpa wan ka ran wɨri, inyu wan ka ran funfon.

21 Yeso ka miyen ti vren-a ri,<<Tu shitan nye ikya nyi vu?>> Ngha iti vren-a ka tre ri,<<A vu tu ri vren.>> 22 <<Ari si wuru-u taga rimi wulu ko rimi ima, ritu ran wu-u nye. Ama ka wu to ti kyari wuka losron ri ta wu ri dzon ta.>>

23 Yeso ka la-u ri,<<Ritu ngye ko wu miyen ri ko me to ti? Ko ngye ri he hwri ri nji riwa a kpanyɨme.>>

24 Ri bubu wan iti vren-a ka nzu ran ran tre ri,<<Me he ri kpanyɨme; dzon wen no kpanyɨme won no bran!>>

25 Riwa Yeso a to jɨbu nji wa ran ye hyure ri wu ri tsu ka yira meme yu ngaa ri,<<A wu meme wu mba riwa wu dzu vren nji ri tre me wa no zhu ka-u don ran bru ye gra wu ri kpa ngaran.>>

26 Meme yu ka kpagro ran gɨzhu vren-a bran ran zhu hi ngawan ivren-a ka kru ka ikɨmo, ijɨbu nji-a wa ran tre ri,<<Ivren-a kuu.>> 27 Ama Yeso ka vu wo ran nzu-u ka wulunde son nde.

28 Riwa Yeso a gra rimi ko, imiri ndu wan waka miyen-u ri yayɨbi ri,<<Ritu ngye ko kita ki ran to dzu yu ran?>>

29 Yeso ka la wa ri,<<Bibi wu nyi ran ri zhu ran tse ri bre Izhi.>>

30 Yeso iwawa miri ndu wan wa ka bubu wan don wari hu ku meme Galili, Yeso ka ran wa no njo to bubu riwa wa he ran, 31 ritu a ran tsro miri ndu wan ri,<<Wa ka vren nji de ri wo nji, wa wu-u nga ari ti vi tra ran tashɨme.>> 32 Ama wa ran to tu kya riwa a ran tre ritu wan ran nga wa ran ti sisiri riwa wa miyen-u.

33 Riwa wa Yeso nga miri ndu wan Waka zhu ri Kafarnaum. Riwa Yeso a gra ri ko ka miyen miri ndu wan ri<<Ritu ngye nye bi si janyu ri nkon?>> 34 Ama waka ki mgbi yoon ritu wa janyu ri nkon ko ingaa nye he rinkon rimi mba.

35 Yeso ka kuson meme, ran yo miri ndu wan waru don hari ye ri ngawan ran la wa ri,<<Inji riwa ari wa ran he ri mimilan, dole no kɨma ngawan ti krenkpen wawu no ti ndu ri ko ngaa.>>

36 Yeso ka ban vren tsitsa ka dzi ri tsutsu mba. Ka ban wu sa mgban ran la wa ri. 37 <<Inji riwa a kpa vren tsitsa ka ri nyi rimi nde won a he ame nye a kpa, nji riwa a kpa wen a ran ame nye a kpa ran a he nji riwa a ti wen ndu nye a kpa.

38 Ri bubu wan Yohana ka la-u ri<<Inji ri tsro ki to nji ri ri zhu bɨzhi rimi nde wen, nga ki dzu ritu a ran he wambu ran.>>

39 Yeso ka tre wa ri,<< Ran dzu ran.<<Injo ran ti kya ri de sisiri rimi nde won ran bru tre tre meme ritu won ri bubu wan ran, 40 Inji riwa a ran yo ta kusi ran a he wambu. 41 Me la yi kpunji tre, nji riwa a no yi ima ri so rimi nde won ritu bi he wa Kristo, me la yi a ran hon fe kya ran.

42 <<A ri he kya ri losron ri nji riwa ari no ri rimi miri wa tsitsa nyi wawa wa kpa nyime ri me nyi no ti meme ti ari bi han ri wu no wa ban nɨran ri kon ka lo ri wu ri to wari ban wu ta yo rimi ima ri nne. 43 Ka iwo wen ri no-u ti meme ti wuka han-u taga, ari bi riwa wu hi ko Izhi ri wo riri riwa wu he ri wo hari wuri hi ko wulu riwa wa ran to yɨbi-u ran. 44 Ri bubu wan ikpanji wawa wa ri nji wa ran ri kuu ran iwulu ran ri huu wa ran. 45 Ngha ka idza wen ri no-u ti meme ti wu ka han-u taga ari bi riwa wu gra ri ko Izhi ri dza riri riwa wu gra ri ko wulu ri dza hari. 46 Ri bubu wan kpanji wawa wa ri nji wa ran ri kuu ran iwulu ran ri huu wa ran. 47 Ka isi wen ri no-u ti meme ti wuka chu wu taga. Ritu ari bi riwa wu hi ko Izhi ri si riri riwa wu gra ko wulu ri sii hari, 48 ri bubu wan, <kpaji wawa wa ri nji wa ran ri kuu ran,>

nga iwulu ran ri hu wa ran nga wa ran to yɨbi wulu-a ran.>

49 Wa tsri ko ngaa ri wulu bibi riwa wa tsri sro yi ri maa.

50 <<Imaa bi, ama ka iro wan zhu zho wu ti ri se wu ri kɨma-u nbru ro nganga? Imaa ri sron mbi bi ri kii ri sikpa ri ngambi.>>