1 Chachu ri nganga, Yeso ka bru ran tsro ri nyu nne Galili, nji wawa wa kɨshu-u ti wa kigbu ka gra rimi mvu ima-a ran kuson rimi wan nga ijɨbu nji-a waka kuki ri tu gashi ri nyu nne-a. 2 Yeso ka tsro wa kyawa bran ri kɨbu-kɨbu, nga rimi tsro wan ka tre ri. 3 <<Biyi wo wen! Wa ti nji ri riwa a hi ri bubu chu wɨlo kpi. 4 Riwa a he rimi hi wɨlo kpi-a wari waka ku ri nkon riwa wa hu, nga chenchen waka ye tan wa ri. 5 Iwɨlo wari waka ku ri bubu meme riwa a ti tita ka zhumbe gbagbla ritu meme ri bubu wan a ran bran ran. 6 Imba riwa nji a chu ka zhumbe tsitsa wan ritu inja mba a ran gra meme bran ran. 7 wari mba wa ku rimi nchon, riwa wa gbron inchon ka ima wa to wa ka ran to ti wɨlo ran. 8 Ama wari wa ku ri bubu meme ndindi wari zhu mbe, wari gbron nga wari ti wɨlo, wari wa ti wɨlo setra, wari wa tiwɨlo setanren nga wari wa ti wɨlo gbigba ri.>>

9 Imba Yeso ka tre ri,<<Inji riwa a he ri ton ri wo no wo.>>

10 Riwa Yeso a he ri nkankshi wan, wari wawa wa wo-u waka ye ri wu nga miri ndu wan wuru don hari nga wari miyen iri no ŋɨran nchi kɨbutre-a ri wawa. 11 Yeso ka la wa ri,<<Biyi wa ŋɨran nchi kpanchi Izhi>> ri yi-e. <<Ama wawa wana he rimi mbi ran wa wo tre-a ri kɨbukɨbu. 12 Ritu,

<Wa sondu ran ya ama wa ran too ran,

wa sondu ran wo ama wana to tu wan ran;

Ko no wa kɨma ye ri Izhi nga no ka meme ti mba rega ri wa!>>>

13 Yeso ka tre wa ri,<<Bi ran to tre kɨbu nyi ran?Ko bi ti se bi ri to tre kɨbu-kɨbu riwa me la yi? 14 Inji ri hi wɨlo kpi-a a he tre Izhi nye ari hi. 15 Inji wari wa he ka iwɨlo kpi riwa a ku ri nkon riwa wa hu ka wa wo tre Izhi meme nji ri ye ran ye ban ngawan. 16 Ngbron nji wari wa he ka iwɨlo kpi riwa wa ku ri bubu tita ka wa wo tre Izhi, wa kpa ri ngɨri. 17 Ama a ran ri gra rimi sron mba bran ran, nga wa ran ri ti vi hari ran. Rimba ka iyaa ye riwa ritu tre Izhi wa chichi joku. 18 Ngbron nji wari wa chu rimi nchon. Wawa nye wa wo tre Izhi, 19 ama wa tika ritu kya wa riwa wa wa, inyɨme kyawa wa mgbumgblume a ye ran ima tre Izhi-a to a ran ti wɨlo ran. 20 Ama mgbron nji wari wa he ka iwɨlo kpi riwa wa chu ri bubu meme ndindi. Wa wo tre Izhi-a wari kpa a nga wari ti wɨlo wari wa ti wɨlo se tra wari iwɨlo setanren nga wari iwɨlo gbigba ri.>>

21 Yeso ka tre ri wa ri,<<Njo ran yo wulu ran kadzi ri ndoza didan ko ri ndodza bla ri kru ran? A ran he ngamba ran tsede ari ka-u dzi ri tu bubu kri wan? 22 Kongye riwa wa ka-u wa ban wu zhu raa, nga kongye riwa wa kau wa ŋɨren yo raa. 23 Wo wen, nji riwa a he ri ton no wo.>>

24 Ka bru tre ri wa ri,<<Mɨlan ya kya riwa bi wo! ikya riwa wu ti ri njo, Izhi ri ti ri wu han kya riwa wu ti ri njo. 25 Wawa wa he ri kyawa wa bru sro ngaa ri wa; nga wawa wa ran he ri kyari ran wa kpa vi riwa wa he ri wu. >>

26 Yeso ka bru tre,<<Kpanchi Izhi he nganyi nye. Inji ri hi wɨlo kpi ri zhu wan. 27 Ri ji nga ri chu, ka ari kru nna ko a he ri si, iwɨlo kpi ri zhu ran gbron, ama a ran ri to ko a ti se ran. 28 Meme ri tuwan nye ri no wɨlo kpi no gbron nga ran ti wɨlo, ari gbuchi zhu ri dagbu ri ko ran ye ti wɨlo. 29 Ka iwɨlo kpi-a wiri, nji ri rɨma ri gra sren kpi-a ri riji, ritu ivi ri sren kpi ye.>>

30 Yeso ka bru miyen wa ri,<<Ki tre ri kpanchi son Izhi he ri se? ka ri kɨbu tre bibi tan nye ki ka-u kabru? 31 A he nganyi nye nji ri ban wɨlo konkron riwa a he kremkpen rimi wɨlo kpi ri mgbumgblume nga ran ka chu ri meme. 32 Kugon vi hari ari gbron ran kɨma he nchon wɨlo rimi wɨlo kpi. Ari ti nchon ganran riwa chenchen wa ye kuki ri wu wan.>>

33 Yeso a ti ndu ri tre kɨbu-kɨbu kigbu ran bla tre wan ri wa bibi riwa wa too. 34 Kongye riwa ari tre ri wa a ran tindu ri kɨbu tre. Ama ka a he ri nkankshi wan nga wa miri ndu wan, ari ŋɨran ko ngye ri wa.

35 Ri chachu vi mba riwa yawulu a ti Yeso ka tre ri miri ndu wan ri,<<No wa ru gran hi ri ku gran nne kumu.>> 36 Imba wa miri ndu wan waka ka jɨbu nji-a don, wari hi gra ri nvuma riwa Yeso a gra son rimi wan-e, nga waka ban wu hi ri wawa rimi wan ngbron mvu ima ka gbuchi ran sho ri ima. 37 Ri bubu wan inchon gungu ka fu, nga ishi ima ka gbuchi ran kɨbu mvu mam-a, ka gbuchi ran sho ri ima. 38 Yeso a he ri kugon mvu ima-a a ran kru nna ran ka tu wan yo ri tsro ri yo tu, imiri ndu wan waka shɨme-u ran tre ri,<<Inji ri tsro, a ran dren sron riwa ki wa kiri kuu ran?>> 39 Yeso ka wulunde kri nde ran tre ri ngungu ri,<<Kukri kpen!>>Imba ngungu-a ka kukri nga ko kutan ka he yoon.

40 Imba Yeso ka tre ri miri ndu wan ri,<<Ritu ngye ko bi ti sisiri? Bi kambi ran he ri Yosron ran?>>

41 Ama wa ti sisri bran wari ran tre ri ngamba ri,<<Inji nyi he ngaa nye? Kau ri ngungu nga shi ima wa wo tre wan?>>