1 Ri bubu mibrewa rinkon wa sro yii nga wa rinkon wa kpanchi wa tsro doka Musa nga mgbron wa rinkon wa kabrutu wa vu Yeso wari ngɨzhi-u hi ri kusi Bilatu.

2 Bilatu ka miyen Yeso ri,<<A wu nye wu he chu nji Yahuda?>>

Yeso ka tre wu ri,<<Nghamba nye wu tre.>>

3 Wa rinkon wa sro yii waka vu Yeso ti meme ti kigbu. 4 Imba Bilatu ka bru miyen Yeso ri,<<To wa tre tre ri kigbu ritu wen ko wu ran tre kyari ran?>>

5 Ama ye zizan Yeso ran bru tre kya ran nga Bilatu ka ran ndzu sron ritu wan.

6 Ikya riwa ichu Bilatu ri si ti ka ivi ro ri dza gran ye ari chu nji wawa wa tren wa ri tra tren chu wo bibi riwa nji wa bre wu iri no ti. 7 Inji ri a he riwa inde wan a he Barabas riwa wa lo-u yo ri tra tren iwawa wa wanyu wa wa wa wuu nji ri chachu riwa iwanyu a wulunde. 8 Ijɨbu nji waka hi ri Bilatu wari miyen iri no ti bibi riwa ari si ti.

9 Bilatu ka tre ri wa ri,<<Bi wa me chu nji Yahuda chuwo ri yi?>> 10 Ritu a to iri wa rinkon wa sro yi wa ka Yeso de ritu ngu nye. 11 Ama wa rinkon wa sron yii waka tre jɨbu nji iri no wa tre ri no chu Bilatu no chu Barabas nye chuwo riwa ari chu Yeso.

12 Bilatu ka miyen wa ri,<<Ko bi wa me ti se ri riwa bi tre ri a he chu nji Yahuda!>>

13 Waka ndzu ran wari tre ri,<<No wa kpan-u ritu konkron!>>

14 Bilatu ka miyen wa ri<<Ritu ngye nye? Memeti bibi tan nye a ti?>>Imba waka bru ndzu ran reri,<<No wa kpan-u ri tu konkron!>>

15 Ritu riwa Bilatu a ran wa ran sii nji sron ka chu Barabas chuwo ri wa imba ka no wa ti Yeso ri gbagba wari ngɨzhi-u hi ka kpan ri tu konkron.

16 Wa klukpa waka ban Yeso hi ri tra bla tre chu gbu nga wari yo ngbron wa klukpa. 17 Waka suu bibi tsro riwa wa chu ri wu, waka ti ntan bibi riwa chu ri nchon wari ka son ri Yeso ri tu. 18 Wa gra ri chi Yeso ri,<<No vi wen no ban kusi, a wu chu nji Yahuda!>> 19 Wa sondu ran wuru-u ri kpala ri tu wari zhu nten ran sro nga wari ran kɨbu mgbazhu iri wa no mkpen. 20 Riwa wa ti-u Yeso ndan kre wari zhu tsro riwa wa chu zho ri wu nga wari vu tsro wama suu ri wu wari ngɨzhi-u hi ri ra riwa wa kpan-u ri konkron.

21 Riwa wa he nkon ran hi,waka to nji ri ri nkon riwa nde wan a he Sima, a he nji Sayirin iti Alekzanda nga Rufus a zhu ri vi gbu ran ye, wa klukpa waka vu ri no ban konkron riwa wa kpan Yeso riwu. 22 Waka ngɨzhi Yeso hi ri bubu ri wa yo-u ri Golgota itu wan he bubu mgborotu. 23 Ri bubu wan nye wa kabru ima ri mgban nga gbɨre riwa wa yo-u ri muri, ama Yeso a kawan ri so. 24 Imba waka kpan Yeso ri konkron wari gbon tsro wan wari ta mgbe ritu wari to ko iŋɨma ritan nye ko ngaa ri fe.

25 A he ri mibrenye wa kpan yeso ritu konkron. 26 Ritu konkron riwa wa kpan Yeso wa ngan kya riwa a ti iri,<<ICHU YAHUDAWA.>> 27 Ngha wari kpan wa yɨbi hari ri wu, iri a he ku wo ri nga ri ka he ku wo ta wan. 28 Rinyi nye he ke tre riwa a tre ri,<<Wa bla Yeso yo rimi wawa wa ti meme ti.>> 29 Inji wawa wa ran vu yɨba ri bubu wan wa ran tre tre ri tsri, wari ran wu tu wari ran tre ri,<<A wu riwa wu dzi bubu bre Izhi wuri mme rimi vi tre, 30 kpa ngawen chuwo wuri gɨzhi ye mme!>>

31 Nghamba ngawen wa rinkon wa sro yii nga wa tsro doka Musa wa sondu ran ti Yeso ndan ri,<<A kpa wari chuwo ama a ran to kpa ngawan chuwo ran. 32 No Kristo ichu Israila nyi no gɨzhi ri tu konkron ye mme riwa ki to kiri kpanyɨme.>>Wa yɨbi wawa wa kpan wa iwawa Yeso ngawen wa tre tre meme ri wu.

33 Ri gbege ji ibuu ka ka ji hi ri yawulu. 34 Ri yawulu-a Yeso ka ndzu ran ran tre ri,<<Eloi, Eloi, lama sabatani? a wu Izhi won ritu ngye ko wu kɨma gon ti wen?>>

35 Riwa wawa wa he ri bubu wan waka wo ngamba wari tre ri,<<Wo ari iliya nji ri la tre Izhi.>>

36 Iri rimi mba ka tsutsu ye ran son soso rimi ima mgban ran ka no Yeso ri no so ran tre ri,<<Chu wu wo no Iliya no ye gɨzhi ri mme ran.>>

37 Imba Yeso ka ndzu ran mgbamgban ran ndzu vri nga ran kuu.

38 Itsro ri ka nkon tra ka yɨra ri shu ye ri mme. 39 Riwa rinkon wa klukpa riwa a kri kusi Yeso ka to bibi riwa Yeso a kuu-a nga ran tre ri,<<Kpunji tre nye nji nyi a he vren Izhi nye.>>

40 Mba wari wa ki kpata wari ran ya ngawan. A he wa meremu ri gbu magadala nga meremu iyi Yakubu tsitsa Yusufu nga salomi. 41 Ri Galili nye imba-a wa ran hu Yeso wari ran ti ndu riwu Imba wari ngawen wawa wa ye iwawa Yeso zhu ri Urushalima wa he ri bubu wan ngawen.

42 Riwa yawulu ka ti riwa imibreri han wan ri he vi sonvri. 43 Inji riwa inde wan a he Yusufu a zhu ri Arimatiya ye a he ri rimi wa rinkon ri tre Izhi riwa a he ri rereriwa a ran yosron no kpan hi ri Bilatu ran ibreiri no wa ka kɨmo Yeso no wawu. 44 Bilatu ka ndzu sron riwa a wa ri Yeso kuu-e ka yo rinkon wa klukkpa-a ran miyen-u ri ko Yeso kuu-e. 45 Riwa a wo ri nyu nji ri klukpa-a ka no Yusufu no ban kɨmo Yeso. 46 Yusufu ka reŋɨma tsro kinklan, ran gɨzhi ri kɨmo Yeso ran ka yo rimi bubu gru riwa wa shi-u ri kpa tita nga ran nyi tita ri ye ka nyun bubu gru. 47 Meremu ri gbu magadala nga meremu iyi Yusufu waka ki ran ya bubu riwa wa ka kɨmo Yeso ka ye ri bubu wan.