1 Rinyi nye he tre ri ro ritu Yeso Kristo ivren Izhi.

2 A gbuchi bibi riwa Ishaya nji ri la tre Izhi a ngan ri:

<<Izhi a tre ri me ti vren ri ndu won no ye gbuchi ri yi,

ran bu nkon ri yi.>> 3 <<

Iran ri yo ri tsutsu ji ri,

<Milan nkon ti ri Bachi,

bi mɨlan nkon wan ti riwa ari hu.>>>

4 Yohana nji ri son nji tu ri ima a zhu ri ji ran ran tre tre Izhi no nji no wa ka meme ti chu wa no wa son wa tu ri ima wa ri ka meme ti mba rega ri wa. 5 Inji wawu kugran Yahudiya, nga nji wawu ri Urushalima wa gbundo ran ye ri wu wa ran la meme ti mba wa ri ka wa ran rega nga vu wa son tu ri ima ri ba ne Juda. 6 Yohana a su tsro riwa wa ti ri nfu ntɨma ri ji, nga ran lo tri ri nchanwa ri ntan iri wan a he lamgblan mba ima ton. 7 Yohana a la nji ri,<<Inji ri ri ye riwa a han wen, riwa me ran ke riwa me sii zhizhi ntan dza wan ran. 8 Me son yi tu ri ima ri ima, ama wawu ri son yi rimi wu Tsitsri.>>

9 Chachu ri Yeso a zhu ri Nazaret ri Galili nga wa son-u tu ri ima ri ba nne judan. 10 Riwa Yeso a Zhu ri ima ran ye raa, ka to ishuwulu ka bu nga iyu Izhi riwa a he ka nguu ka ye kuson ri tu wan. 11 Ngha iran ka zhu shu ye ri,<<A wu wu he vren won riwa me nyɨme wu, me ti kinklan sron ri wu branbran.>>

12 Ri bubu wan Iyu Izhi riwa a he ri wu ka ngizhi wu hi ri tsutsu ji bubu riwa giga ran he ran, 13 riwa a son ri bubu wan ti vi senza, meme nji ka sondu ran tsra-u, a son iwawa nɨma ji wa fu nga miri ko Izhi waka ye dzon wu.

14 Kugon riwa wa vu Yohana yo rimi tra tren, Yeso ka hi ri Galili ran ran la tre dindi riwa Izhi. 15 Aran la wa ri,<<Ivi ye hwire.>>Ran bru tre ri,<<Kpanchi Izhi ye hure meme ti mbi chuwo bi ri kpa nyɨme ri tre dindi!>>

16 Riwa Yeso a ran vu yɨba ri nyu nne ri Galili, imba ka to Sima nga vayi wan Andarawus wa ran ta tsro ri vu lambe ritu wa he wa vu lambe. 17 Yeso ka la wa ri,<<Hu wen ame me kɨma yi he nji wawa wa ngɨzhi nji ye ri me.>> 18 R i bubu wan waka ka kpi ri vu lambe mba don wari hu Yeso.

19 Riwa a hwi hi kusi tsawen ka to miri vayi hari wawa nde mba a he Yakubu ivren Zabadi nga vayi wan Yohana wa he rimi nvuima, wa mɨlan tsro ri vu lambe mba ran ti. 20 Ri bubu wan ka yo wa, wa ka ti mba Zabadi don rimi nvu ima nga miri ndu wawa wa vu wa wari hu.

21 Yeso nga miri ndu wan wa hi ri Kafarnaum, riwa ivi son vri a ye, Yeso ka gra rimi tra Izhi ran ran tsro wa. 22 Inji wawa wa wo-u waka ti sisiri ritu tsro riwa a ran tsro ritu a tsro wa ka nji riwa a he ri gbengbren, a ran bibi wa tsro doka Musa ran. 23 Ri mba nji ri ri meme Yuu ka ye rimi tra ri kabrutu nji Yahuda ran ran kpagro, 24 <<Yeso ri Nazaret ngye nye wu wa ri ta? Ka wu ye wuri wuu ta nye? me to ri wu he nji ri Tsitsri riwa Izhi nye!>> 25 Yeso ka tre ri,<<Somgbi wu ri zhu ri kpa nji mba!>> 26 Iyu meme-a ka dzan nji-a kpa ran no kpagro nga ka zhu ri kpa wan.

27 Inji wawu wa ti sisiri wari ran miyen ngamba ri,<<Rinyi he ngye nye a he tsro ri sisa nye? Inji nyi he ri gbengbren ri la meme wu tre waka ti sisiri wan!>> 28 Ngha ri bubu wan itre Yeso ka shan gra ko kutan kagon gbu Galili.

29 Ri zhu wa Yeso nga miri wa ndu wan ri tre Izhi, wawa ri Yakubu nga Yohana waka kunkon hi ri ko Bitrus nga Andarawus. 30 Iyi wa Bitrus a kru ri blaa ran ran tsri mbzhu, nga riwa Yeso a zhu ri bubu wan, waka la-u ritu wan. 31 A hi kusan wan, ran ndzu-u wo dzi nde, imbzhu-a ka kau chuwo nga ka ti ndu ri wa. 32 Riwa iji a ku nga yawulu ka ti, nji waka ngiji wa lilo nga wawa wa he ri bɨzhi ye ri wu. 33 Inji wawu waka ye kabru ri nkon ko riwa Yeso a he-a. 34 Yeso a den nji kigbu wawa wa he ri lilo kankankan. Ran zhu bɨzhi kigbu zho ri nji kigbu, a ran no wa bɨzhi no wa tre kya ri ran ritu wa to ko wawu he ngan.

35 Ri bubu mbre, ka ibu a ti, Yeso ka wulunde, ran ka ko don ran hi ri bubu riwa a he yoon, bubu riwa ari bre Izhi. 36 Imba Sima nga wawa wa he wawa waka zhu hi ri bubu wa Yeso, 37 Ngha riwa wa fe wu, waka tre ri,<<Ko ngaa ri wa-u.>>

38 Ama Yeso ka tre ri wa ri<<Ki hi ri gbu wa kusi mu me ri bla tre Izhi ri wa ngawen. Ritu wan nye me ye!>> 39 Ka dzren kagon gbu Galili ran ran tre tre Izhi ri tra Izhi mba nga ran dzu wa bɨzhi zho ri kpa nji.

40 Inji ri lilo Mkpuzhu a ye kɨbu mgbazhu ri kusi Yeso ran bre ri,<<Ka wu nyɨme, wu to tsri won bibi riwa lilo won ri kre penpren.>>

41 Imba ka lo Yeso sron ka nɨme wo ran bre wu ran tre ri wu ri,<<Me nyɨme meri tsri-u he nji ri tsitsri!>> 42 Ri bubu wan lilo mkpuzhu-a ka ka wu chuwo, ka he nji ri tsitsri.

43 Rimba Yeso ka no hi nga wan ri nghɨron tre ri senkpa ri: 44 <<Milan ya ran la njo ran, ama hi tsro tu wen ri wa sro yii nga wu ri hu kya riwa Musa a tre no wa ti ritu ti tsitsri, ti ngamba bibi riwa wu tsro nji iri wu fe si!>> 45 Ama ka hi ran gra bla tre-a ran ran shan tre kya riwa a ti kagon, a ti ran no Yeso a ran to gra ri kokutan ri rira ngaran ka son ri bubu riwa njo ran he ri bubu wan ran. Ngha nji wa sondu zhu ko kutan ran ye ri wu.