MRK MARKUS; BUU 5

Inji ri La tre Izhi ran he ri mkpen ri gbu wan ran

1 Yeso nga miri ndu wan wa ka ruu gran nne ri Galili hi ri gbu Garasina. 2 Ri gɨzhi Yeso rimi mvu ima, nji ri lilo meme bɨzhi riwa a zhu ri bubu no nji yɨbi ka ye ri Yeso. 3 Inji-a a ran kru ri bubu riwa wa no nji yɨbi, injo a ran to lo-u ri che ran. 4 Ritu riwa wa sondu ran lo-u wo nga dza ka suu che ran rega. Injo ka ran to vu lo ri che nga ran. 5 Bla vi ri chu nga ri ji a ran zren rimi bubu riwa wa ban nji ri no yɨbi-a, nga ritu gashi ka ran kpagro ran ran dru ngawan kpa ri tita.

6 Riwa nji-a a to Yeso ri kpata, ka wulunde ri tsu ran ye kɨbu mgbazhu ri kusi wan. 7 Inji-a ka Kpagro mgbamgban ran tre ri< Yeso, Ivren Izhi riwa a he ri mkpen bran ingye nye wu wa ri me? Me bre rimi nde Izhi ran no wen Yaa ran!>> 8 Inji-a ka tre ngamba ritu Yeso a tre ri wu ri,<<A wu Yuu meme mba zhu zho ri kpa nji nyɨn!>>

9 Imba Yeso ka miyen-u ri,<<Inde wen he ngaa?>>

Ka tre ri,<<Nde won he ijɨbu, ritu ki kigbu ri kpa nji nyi.>> 10 Ngha ka sondu ran bre Yeso ri no ran dzu wawa zho ri bubu nyi ran.

11 Ijɨbu dushu wa ko wari wa ran ri ri ri kpa mgblu hwɨreri bubu wan. 12 Iyu meme-a ka bre Yeso ri,<<No ta ki hi gra ri kpa dushu wa ko wamu wuri no ta ki kii ri mi mba.>> 13 Yeso ka nyɨme, imba Iyu meme-a waka hi gra rimi kpa dushu wa ko-a. Ijɨbu dushu wa ko-a wa he ngo hari nye, imba waka wulunde gbagbla wari gre hi wari ka ku rimi nne wari kuu.

14 Inji wawa wa ran kɨshu dushu wa ko-a waka tsutsu hi ri gbu ri bran nga gbu wa tsitsa, wari kasi bla tre kya riwa a ti wa kusan mba nga ikpa nji waka gre ye wari ye to kya riwa a ti. 15 Riwa wa ye ri Yeso waka to nji riwa a he ri ijɨbu meme bɨzhi ka kuson ri tsro ri kpa wan ri tu wan riri, waka ti sisiri. 16 Wawa wa to kya riwa a ti ri nji ri lilo meme bɨzhi nga wa dushu wa ko-a, waka ran la wawa wa ye ri bubu wan. 17 Imba nji-a wa gra bre Yeso ri no ka meme mba don ri wa.

18 Riwa Yeso a ran gra rimi mvu ima-a, nji ri meme bɨzhi ka bre Yeso ri no wawu hu hi ngawan. 19 Ama Yeso a ran nyɨme ri wu ran, ama ran tre ri,<<Bru hi ko wuri la miri vayi wen bibi kya riwa Bachi ti ri wu nga bibi rereriwa a ti ri wu.>> 20 Imba nji-a ka hi ngawan ran hi gra rimi gbu wuru ran gra ri la wa kya riwa Yeso ti ri wawu. Ngha nji waka ran ti sisiri.