1 Nɔ bɛ vɛʼ tia nduɔ ndə mɔ tʉʼ shʉ̀tə ŋwɔŋ-ɔŋ ndə məgwè tʉ bii. Ŋwɔʼnə Nyii bɔŋleʼ ghɔ̀ŋ mbɔ, "Kaʼ a gìe nukə kətʉ wo, bʉə bəbûu byuunɔ bʉə bətia nɔ kie ndə mənú gwù." 2 Mɔ nɔ tʉʼ shyùu tyunə-bʉə-kə ndə bɔ̂ŋ nɔʼ kə fəŋ chìi bʉ̂ʼʉ leʼnə bəbɛʼbʉə bənchəŋ, mɔ nɔ tʉʼ shyùu tyunəkə-ʉə nduɔ təmə nɔʼ gwè fɛ, ndə mɔ kə shyùu tyunəkə-ʉə vɛʼ ndə mɔ kə bʉ̀nə bìʼ gwè mətòʼ tʉ bii ndə vɛʼ bûu, mbɔ kaʼ mɔ bʉ̀nə bìʼ gwè, mɔ mə mɛ̀ʼtə bɔŋ chɔ fɛ.

3 Mɔ bu chìi bii kínə nubə nchəŋnchəŋ ndə bii tʉʼ kʉ́ʉ, ndə mədʉ̀ʼ mbɔ Klai la tʉʼ kwə́ʼ tíŋ hə bɔ̌ŋ mɔ. Ndʉʉ ndə Klai tʉʼ fɔ̀ʼ nə bii, ɔ byúu ghʉəʼkə fɛ, ɔ̃ bɔŋ nɔ dʉ̀ʼ ghʉəʼkə-i mu bii. 4 Buŋ ndə ɔ kə lʉ́ʉtə, bə kwɛ̀ŋ ɔŋ yí, ɔ nɔ tʉʼ chí mbi tíŋ hə bɔ̌ŋ ghʉəʼ-Nyii-kə. Mbəŋ-yaʼ ghɔ nɔ lʉ́ʉtə haʼ ndə Klai kə bɛ, bɔŋ ndʉʉ ndə baʼa tʉʼ fɔ̀ʼ bii nɔ, baʼa bu bɛ ŋɛnə baʼa bɔŋ tíŋ hə bɔ̌ŋ ghʉəʼ-Nyii-kə.

5 B̈ii kíi ŋwɔŋ-yii ndə mənyíɛ mbɔ bii kɛŋ mɔ̀ʼfyiihə-ii ndəŋ mbʉ fia-Nyii mɛɛ. B̈ii yúotə ŋwɔŋ-yii. Byuunɔ, bii chèʼnə yɔ̄ŋ-yə nukə te ŋwɔŋ-yii, mbɔ Jiso Klai bɛ mu mbʉə bii fe? Kaʼ Klai ghɔ gòʼ təmə bɛ mu mbʉə-bii fɛ təmə bii nɔʼ gwù mbʉ njuotə. 6 Mɔ nɔ kwɔ̀ʼtə mbɔ bii bu chèʼnə mbɔ baʼa kə gwù mbʉ njuotə fɛ.

7 Baʼa bɔŋ kə́ gháaNyii mbɔ bii mə chìi mɔ̀ʼmbɛ təmiyɔŋ fɛ, kaa ndə mədʉ̀ʼ mbɔ baʼa nɔʼ tíŋ mbʉ njuotə fɛ, bɔŋ bə mbɔ bii fɔ̀ʼ haʼ nukə ndə i bɛ kʉ̀ʼnə, buŋ ndə i bɛ fi nə baʼa nɔʼ gwù. 8 Bʉʼka baʼa mə fɔ̀ʼ nukə i gɛ̀ ŋkʉʉ ndə shʉəŋ fɛ, baʼa bɔŋ kie məfɔ̀ʼ haʼ ndə mədʉ̀ʼ shʉəŋ. 9 T̃ʉʉ-yaʼ nɔ bʉ̀ʉ ndʉʉ ndə baʼa lʉ́ʉtə, bii bɔŋ shʉ́ətə. Baʼa nɔ tʉʼ gháaNyii mbɔ bə bu bʉ̀nə chɔ̀ʼhə bii sê.

10 Bʉʼka yɔ̄ŋ-yə, nɔ bɛ luu-i ndə mɔ tʉʼ nyɔ̀ʼ nubə-ɔ̄ŋ ndʉʉ ndə mɔ gòʼ təmə bɛ mbʉə bii fɛ, mbɔ ndʉʉ ndə mɔ bu yi gwè nɔ, təmə mɔ kie ndə məchyʉ́nə tʉ bii nə ghʉəʼkə ndə Tiekətʉ nɔʼ kɔ́ tʉ mɔ ndə mə-kə́-bɔ́bɔ́ nə yɔŋ, kaa ndə mə-kə́-kùukùu fɛ.

11 Ndə məlìʼtə, bəliŋ-bɔŋ, ẗʉʉtə-ii bʉ̀ʉ. B̈ii bʉ̀nə shʉ̀tə məchimbi-yii bɔŋleʼ kə́ kwèʼhə ŋwɔŋtə-ii. B̈ii dùʼ nə gyʉʉ imɔʼ bɔŋleʼ kie fyiighʉ́ənə mu bii. Ndʉʉmɛ, Ñyii ndə ɔ kɔ́ ŋkʉ̂ʉ ghɔŋbə fyiighʉ́ənə bu bɛ bii bɔŋ mɔʼɔ.

12 B̈ii chàʼtə ŋwɔŋtə-ii nə nchaʼtə ndə i bɛ ŋkʉʉ. 13 Bʉə-Nyii ndə bɔ̂ŋ bɛ fɛ̄ŋ bənchəŋ nɔ tə́ŋ nchaʼtə-yʉə tʉ bii.

14 Tə buuŋjyu Jiso Klai Tiekətʉ, ŋkʉ̂ʉ-Nyii leʼnə njunə mbʉ kəLyʉʉhəNyii bɛ bii bɔŋ bənchəŋ.