Nu-kɛ̀ʼ-bə 14

Mbʉ Vaabinjyʉʉ ghɔŋbə mbʉ 144,000

1 Ndʉʉmɛ, mɔ lɛ́nə nyíɛ mbʉ Vaabinjyʉʉ ndə ɔ tə́nə ndəŋ Kwɔŋ Sayɔŋ ghɔŋbə bʉə 144,000 ndə bɔ̂ŋ kie yie-e, leʼnə yie-Tie-e, ndə bə nyɔ̀ʼ chutəyi-bɔŋ. 2 Mɔ yʉ́ gyʉʉbɛʼ yuo kə́ gìe nə gyʉʉ muu buŋmbi ndə i tʉʼ gwù nə ghʉəʼkə leʼnə fuu-yuo shʉ́əshʉ́ə. Mbʉ gyʉʉ ndə mɔ yʉ́ i bɛ nə gyʉʉ ŋkyitə ndə bʉə bʉ́ʼ ŋkyitə tʉʼ bʉ́ʼ.

3 Bɔ̂ŋ kə́ yùɔ lyuu fefe bəshʉ mbʉ kəyetə, leʼnə fɔ-ŋɛnə-bə-īŋ kwi ghɔŋbə mbʉ bəntəŋbəshʉ ghəŋ ndə bɔ̂ŋ kie kuŋhə. Wo kə bɛ ghɔ ndə bəkɔ ɔ yétə mbʉ lyuu fɛ yaʼkɛŋ haʼ bʉə-bīŋ 144,000 ndə bə nɔʼ kə chʉ̀ʼ tʉkə-ʉə kəchisê. 4 Nɔ bɛ bʉə ndə bɔ̂ŋ gòʼ təmə nɔʼ bʉ́əhə ŋwɔŋtə-ʉə nə bəke fɛ, bʉʼka bɔ̂ŋ nɔ bíe bəŋgwɔŋ. Nɔ bɛ bʉə-bɔ̄ŋ ndə bɔ̂ŋ kə́ gɛ̀ hə bɔ̌ŋ mbʉ Vaabinjyʉʉ ndə yəŋkə təmiyɔŋ ndə ɔ kə́ gɛ̀ chɔ. Bə nɔʼ chʉ̀ʼ tʉkə-ʉə mu bʉəməsʉʉ ndə məbɛ fəŋ bəfɔ ndə bə kɔ́ tʉ Nyii leʼnə mbʉ Vaabinjyʉʉ. 5 Lɛɛŋkə chʉʼ nə fyú hə chu-bɔŋ fɛ. Bɔ̂ŋ kie kwɔtəkə mu məchimbi-bɔŋ fɛ.