Nu-kɛ̀ʼ-bə 4

Mələ̀ʼtə Nyii yuo

1 Kʉ̂ʉ bɛ ndə yɔ̄ŋ-yə kə tíŋ, mɔ bìʼ nyíɛ ibɛʼ-yə nubə, nyíɛ chusii ndə i tə́nə ighʉ́ʉnə yuo. Fəŋ gyʉʉ ndə mɔ kə fəŋ yʉ́, i kwə́ʼ tʉ mɔ nə gyʉəʼə-vaa le, ghɔ̀ŋ mbɔ, "Kóʼ gwè fɛ̄ŋ, mɔ bu dʉ̀ʼ nubə tʉ a ndə i bu yaʼ fyú ndʉʉ ndə yɔ̄ŋ-yə tíŋ." 2 Haʼ ndʉʉmɛ, LyʉʉhəNyiikə chʉ́ʉhə məjyʉ́ʉhə mɔ, mɔ nyíɛ yetəkə ndə i tə́nə yuo, wo kə́ yétə ndəŋ ghɔ. 3 Wo ndə ɔ kə dùʼ ndəŋ ghɔ kə́ lèʼnə nə ŋgoʼbɛʼ ndə bə kə́ tíi nə jasaba leʼnə ŋgoʼ ndə bə kə́ tíi nə kanilia* ndə i bɛ kəmbuu, ŋkwunduŋ yə̀ŋhə mbʉ kəyetə fúu fínə ŋgoʼbɛʼ ndə bə kə tíi nə ɛmɛla i kə́ bɛ lúhə. 4 Yetəbə njuɔ kwi nə wuŋ bûu nɔ kə tə́ŋtə yə̀ŋhə mbʉ kəyetə, bəntəŋbəshʉ ghəŋ ndə bɔ̂ŋ kie kuŋhə, bɔ̂ŋ njuɔ kwi nə wuŋ bûu dùʼtə ndəŋ ghɔ, bə véʼ bɔŋ nə ndyi-kəfyuʼ-hə, bɔŋleʼ fùɔ ŋgʉʼhə, ndə bə chìi nə goo, kətʉ-bɔŋ. 5 Leʼnə-wyuu-bə kə́ fyú hə ndəŋ fəŋ kəyetə, mədùŋtə ghɔŋbə fuu-yuo kə́ bɔ̀ʼtə chɔ. Kɛʼtə təkwiitia, kə́ kwíi bəshʉ ghɔ, ndə bɛ lyʉʉhə-Nyii-bə təkwiitia. 6 Shʉ-mbʉ-kəyetə-bə, kə́ nʉ̀ʉ kəfyuʼ nə ŋgwɛŋ galashi, tʉ́ʉnə tə bɛ nə vii.

Fɔbɛʼbə tʉbə-ʉə kwi ndə bɔ̂ŋ bɛ ŋɛnə, shʉtə kwóhə bɔŋ bəshʉ tə gɛ̀ dàa bɔ̌ŋ liɛŋ-bɔŋ tə́ŋtə mbʉə mbʉ kəyetə bəviabəvia. 7 Fəŋ mu fɔbə-iŋ ndə bɔ̂ŋ bɛ ŋɛnə le, kə́ bɛ nə bʉʼ, ntyunəkə kə́ bɛ nə vaaŋgwɔŋ naʼ ləŋ, yi-yə ndə ɔ leʼ tyúnə kie mbe shʉ nə yi-wo-yə, yi-yə ndə ɔ lìʼtə bɔ̌ŋ kə́ bɛ nə mbʉʼməghe ndə mətíe. 8 Mbyu imɔʼ mu fɔbə-īŋ ndə bɔ̂ŋ bɛ ŋɛnə le, kə́ kie ghɔnətə ntʉʼʉ, shʉtə kə́ bɛ ndəŋ mbʉ bəghɔnə yə̀ŋ fə́nə, liɛŋ-ɛŋ ghɔŋbə mu-i. Ndʉʉnəchî ghɔŋbə ndʉʉbətyuʼ, təmə bɔ̂ŋ nɔʼ nə káa ndə mə-kə́-gìe mbɔ,

"Ŋkʉʉ, ŋkʉʉ, ŋkʉʉ, nɔ bɛ mbʉ Nyii Tiekətʉ ndə ɔ kie ghʉəʼkə inchəŋ,

ndə ɔ kə fəŋ bɛ, ndə ɔ bɛ, bɔŋ-kə́-leʼ bɛ ndə məgwè."

9 Ndʉʉtəmiyɔŋ ndə mbʉ bəfɔ ŋɛnə-ghɔ̄ kwi tʉʼ kɔ́ məgʉ́ə ghɔŋbə kuŋhə leʼnə ndɔ tʉ mbəŋ-ɛŋ ndə ɔ yétə ndəŋ mbʉ kəyetə, ndə məchimbi-i kie liʼ fɛ, 10 mbʉ bəntəŋbəshʉ ghəŋ ndə bɔ̂ŋ kie kuŋhə, njuɔ kwi nə wuŋ bûu bʉ́ʉnə bəshʉ mbʉ wo ndə ɔ yétə ndəŋ mbʉ kəyetə, lə̀ʼtə mbʉ wo ndə məchimbi-i kie liʼ fɛ. Bɔ̂ŋ yíɛʼhə ŋgʉʼhə-ʉə mɔ̀ʼ sê bəshʉ mbʉ kəyetə, ghɔ̀ŋ mbɔ,

11 Nyii Tiekətʉ-yaʼ, a nɔ kʉ̀ʼnə wo ä kie məgʉ́ə, kuŋhə, b̈ə bɔŋleʼ lə̀ʼtə a ndə ghʉəʼkə-a, bʉʼka nɔ chìi a chìi fɔbə inchəŋ, a nɔ chìi bɔŋ, bɔ̂ŋ kə́ chí mbi ndə ŋkʉʉnə tʉʉ-a.