Hebreus 4

Nyii nɔ kə kɔ̀ʼnə məkáa tʉ bʉə-bii

1 Ndʉʉghɔfii, bʉʼka ŋkɔʼnə-Nyii tʉ bʉʼʉ ndə məŋíi mu kəyəŋ ndə bʉʼʉ bu káa chɔ sê bíe tʉ bʉʼʉ, b̈ʉʼʉ láa bʉʼka wo mu bii mə yi gòʼ təmə yi kie ŋkɔʼnə-ɔ̄ŋ fɛ. 2 Bʉʼka ntəŋjyujyu nɔ nə gwè tʉ bʉʼʉ haʼ ndə i kə gwè tʉ bʉə-Isilɛ, təmə mbʉ ntəŋ ndə bɔ̂ŋ kə yʉ́ bɔŋ kwáa bɔŋ fɛ, bʉʼka bɔ̂ŋ kə mɔ̀ʼfyiihə-ʉə chɔ ndə bəbɛʼbʉə ndə bɔ̂ŋ kə yʉ́ mɔ̀ʼfyiihə-ʉə chɔ fɛ. 3 Bʉʼka bʉʼʉ ndə bʉʼʉ nɔʼ bɛ́ŋ Nyii, bəkɔ bʉʼʉ ŋíi mu mbʉ kəyəŋ káanə, haʼ ndə ɔ ghɔ̀ŋ mu ŋwɔʼnə-i mbɔ,

"Mɔ nɔ kə kàa ndʉʉ ndə tʉʉ-ɔ kə byʉ́ʼ mbɔ,

‘Bɔ̂ŋ kʉʉ nə ŋíi mu yəŋkə-ɔŋ ndə mɔ kə kʉ̀ʉ mbɔ bɔ̂ŋ káa chɔ sê fɛ.’ "*4:3 Ŋwɔʼnə təLyuu 95:11.

Ɔ nɔ nə kə gìe yɔ̄ŋ-yə, tʉ ɔ nɔʼ nə buŋ lìʼ ndə məchìi fɔbə inchəŋ lʉ̀ hə ndəŋ ŋgwunə-mbi. 4 Mu kəyəŋbɛʼ mu ŋwɔʼnə-Nyii, ɔ kwə́ʼ te mbʉ kəchî təkwiitia mbɔ, "Nyii nɔ nə fɔ̀ʼ fɔʼtə-i nchəŋnchəŋ ndə ɔ kə chìi wʉʉnəmbikə, kʉ̂ʉ bɛ ndəŋ mbʉ chîkə təkwiitia, ɔ káa." 5 Ɔ bʉ̀nə bìʼ ghɔ̀ŋ mu ŋwɔʼnə-i mbɔ, "Bɔ̂ŋ kʉʉ nə ŋíi mu yəŋkə-ɔŋ ndə mɔ kə kʉ̀ʉ mbɔ bɔ̂ŋ káa chɔ sê fɛ." 6 Bʉə ndə bɔ̂ŋ kə fəŋ yʉ́ ntəŋjyujyu te məkáa kə ŋíi mu mbʉ kəyəŋ ndə mɔ kə shʉ̀tə tʉ bɔŋ ndə məkaa fɛ bʉʼka bɔ̂ŋ nɔ nə chɔ́ʼ mɔ. Bəbɛʼbʉə nɔ bɛ ghɔ, ndʉʉmɛ, ndə bə bu mɛ̀ʼtə bɔŋ ndə məŋíi. 7 Yɔ̄ŋ-yə nɔ dʉ̀ʼ ndə Nyii kə fyúhə ibɛʼ-yə chîkə ndə bə tíi nə "Laa." Ɔ nɔ nə gìe yɔ̄ŋ-yə tʉ ŋgʉʼhə nɔʼ tíŋ buŋmbi tíŋ hə bɔ̌ŋ Dɛbi ndə mɔ kə fəŋ nyɔ̀ʼ mbɔ,

"Laa, kaʼ bii yʉ́ gyʉʉ Nyii,

kə bii mə shʉ́əhə fyiihə-ii fɛ."*4:7 Ŋwɔʼnə təLyuu 95:7-8.

8 Bʉʼka kaʼ Joshua kʉ̌ʉ nɔʼ kə chìi bɔ̂ŋ káa ndə mbʉ kəyəŋ ndə Nyii kə kɔ̀ʼnə, təmə Nyii kə leʼ bʉ̀nə bìʼ kwə́ʼ te ibɛʼ-yə chîkə fɛ. 9 Ndə i bɛ nɔ, chîkə nɔ bíe tʉ bʉə-Nyii ndə məkáa haʼ ndə Nyii kə fɔ̀ʼ, kʉ̂ʉ bɛ ndə mbʉ chîbə təkwiitia, ɔ káa. 10 Wo ndə ɔ ŋíi mu yəŋ-káa-kə ndə Nyii kə kɔ̀ʼnə, bu káa ndə yi-yə fɔ̀ʼ haʼ ndə Nyii kə káa ndə yi-yə.

11 B̈ʉʼʉ kɔ̀ɔtə ndə məŋíi mu mbʉ kəyəŋ káanə, bʉʼka wo mə yi gwù mu bʉʼʉ ndə mətɛ́ŋ ndə məyʉ́ chu-Nyii haʼ ndə bɔ̂ŋ kə chìi. 12 Bʉʼka ŋgieNyiikə nɔ bɛ ŋɛnə bɔŋleʼ kə́ fɔ̀ʼ, chyʉ́ʉ chàa setə-bətʉbətʉ-kə, ĩ nɔ síi ŋíi tə gɛ̀ dàa ndə yəŋkə ndə fyii fə́nə chɔ ghɔŋbə lyʉʉhəkə, gɛ̀ tə dàa kəyəŋ ndə yuhəbə fə́nə chɔ ghɔŋbə ndiimə. Ĩ nɔ kɛ̀ʼ nubə ndə bʉə tʉʼ kwɔ̀ʼtə ghɔŋbə nubə ndə bɔ̂ŋ tʉʼ kʉ́ʉ. 13 Nubɛʼkə bɛ ghɔ ndə bəkɔ i líi kəghɔ-Nyii fɛ, fɔkə təmiyɔŋ ndə fɔbə ndə ɔ chìi, nɔ nʉ̀ʉ ŋgwʉʉnə, kə́ bɛ ighʉ́ʉnə bəshʉ ɔ. Nɔ bɛ mbəŋ-ɛŋ ndə bʉʼʉ bu túu chʉʼ-yʉʼʉ tʉ ɔŋ bənchəŋ te ŋwɔŋtə-ʉʼʉ.

Jiso Klai nɔ bɛ Tiefɛ̀ʼndɛŋkwɛʼtəŋNyii-yʉʼʉ

14 B̈ʉʼʉ yá mbʉ məmɔ̀ʼfyii ndəŋ Nyii ndə bʉʼʉ ghɔ̀ŋ mbɔ bʉʼʉ nɔʼ chìi, tə́nə chɔ shʉ́əshʉ́ə, bʉʼka bʉʼʉ nɔ kie fɔŋ tiefɛ̀ʼndɛŋkwɛʼtəŋNyii ndə ɔ nɔʼ gɛ̀ tə dàa bəshʉ-Nyii, kə́ bɛ Jiso, VaaNyii. 15 Bʉʼʉ nɔ kie Tiefɛ̀ʼndɛŋkwɛʼtəŋNyii ndə ɔ kínə jyujyu mbɔ ghʉəʼkə-ʉʼʉ nɔ tə́ʼ ndə məghɔ́ʼ bʉ̂ʼʉ, bʉʼka bə nɔʼ mùutə ɔŋ ndəŋ ntɛ-fia-hə ndə bʉʼʉ tʉʼ tíŋ hə muŋgɔ inchəŋ, təmə ɔ nɔʼ nə chìi bʉ̂ʼʉ fɛ. 16 Ndʉʉghɔfii, b̈ʉʼʉ kie fyii, ndə məkwɛ̀ʼtə gɛ̀ mbʉə yetə-buuŋjyu-Nyii-kə, mbɔ ɔ chʉʼ dʉ̀ʼ tʉvyiikə ghɔŋbə buuŋjyu tʉ bʉʼʉ, ndʉʉ ndə bʉʼʉ tʉʼ kɛŋ kʉ́ʉ.