1 Ndʉʉ ndə Jiso ghɔŋbə vâafɔʼɔ-bi gɛ̀ tə kə́ kə́ŋhə Jɛlosalɛŋ gwè dàa Befe ndəŋ Kwɔŋ-bəTyʉ-Oli, ndʉʉmɛ, Jiso tə́ŋ vâafɔʼɔ-bi bəbûu, 2 ghɔ̀ŋ tʉ bɔŋ mbɔ, "B̈ii gɛ̀ mu lɔʼɔ-fīi bəshʉ bii le, haʼ ndə bii tuŋ sʉ́ʉ nɔ, bii bu nyíɛ jakashi ndə bə chyúu, ghɔŋ vaa-ɛ kə́ bɛ mɔʼɔ. B̈ii yɔ̀ʼ bɔŋ, gwè nə bɔŋ tʉ mɔ. 3 Kaʼ wo bíʼtə nukə tʉ bii, b̈ii gìe tʉ ɔŋ mbɔ, ‘Mbʉ Tiekətʉ nɔ kie fɔ̀ʼ nə bɔŋ,’ ɔ bu tə́ŋ bɔŋ haʼ ndʉʉghɔfii." 4 Yɔ̄ŋ-yə nɔ nə bɛ ndə məchìi nukə ndə yʉkəŋgieNyii kə gìe i fyú shʉəŋ, ndə ɔ kə ghɔ̀ŋ mbɔ,

5 "Shyíi bʉə mu kəyəŋkwɛʼtəŋ Sayɔŋ mbɔ,

‘B̈ii nyíɛ, Fɔŋ-yii tʉʼ nə gwè tʉ bii.

Ɔ nɔ bɛ wo ndə ɔ lʉ̀ ŋwɔŋ-ɛŋ sê, kə́ gwè hə ndəŋ jakashi,

ndə bɛ vaaŋgwɔŋ-jakashi.’ "*21:5 Sakalia 9:9.

6 Mbʉ vâafɔʼɔ gɛ̀ chìi haʼ ndə Jiso ghɔ̀ŋ tʉ bɔŋ. 7 Bɔ̂ŋ gwè nə mbʉ Jakashi ghɔŋ vaa-ɛ, gwè sɛ̀nə ndyi-fəʼə-hə-ʉə ndəŋ bɔŋ, Jiso dùʼ ndəŋ ghɔ.

8 Njɔŋnjɔŋ bʉə kə́ sɛ̀nə ndyi-fəʼə-hə-ʉə sêfia, bəbɛʼbʉə gwìatə yuu-tɛ́ŋ-bə, sɛ̀nə sêfia. 9 Nuɔ bʉə ndə bɔ̂ŋ kə́ gɛ̀ hə bəshʉ ɔ ghɔŋbə bʉə ndə bɔ̂ŋ kə́ gwè hə bɔ̌ŋ ɔŋ, kə́ tòʼ tíitə ghɔ̀ŋ mbɔ,

"Osana*21:9 "Osana" nɔ bɛ ŋgie-Hibulu-kə ndə i bɛ mbɔ "N̈yii kwáa baʼa nduɔ," bɔŋ ndə mbi kə kwɛ̀ʼtə gɛ̀ i bɛ mbɔ "Tə bʉʼʉ lə̀ʼtə Nyii." tʉ Vaa-Dɛbi!

Tə Nyii bìʼ wo ndə ɔ gwè yie-Tiekətʉ!

B̈ə kɔ́ kuŋhə tʉ Nyii gɛ̀ tə dàa liʼ yuo!"*21:9 Ŋwɔʼnə-təLyuu 118:25-26.

10 Ndʉʉ ndə Jiso ŋíi mu Jɛlosalɛŋ, mbʉ mu kəyəŋkwɛʼtəŋ kə́ ŋɛ̀nə inchəŋ, bə kə́ ghɔ̀ŋ mbɔ, "Yɔ̄ŋ-yə bɛ nda nɔ?"

11 Mbʉ nuɔ-bʉə bə̀ŋhə mbɔ, "Nɔ bɛ Jiso yʉkəŋgieNyii nɔ, ndə ɔ lɔ̀ hə Nasalɛ mu Galili."

12 Jiso sʉʉ mu chunjaafɛ̀ʼndɛŋNyii, jə̀ŋ bʉə bənchəŋ ndə bɔ̂ŋ kə́ fɛ̀ŋ fɔbə ghɔŋbə bʉə ndə bɔ̂ŋ tʉʼ nyúɔ fɔbə, kíahə kwóhə bətebele-bʉə ndə bɔ̂ŋ tʉʼ kwɛ́nə kyʉə ghɔŋ fɔŋ-bʉə-bə ndə bɔ̂ŋ tʉʼ fɛ̀ŋ bətambʉətə. 13 Ɔ gìe tʉ bɔŋ mbɔ, "Bə nɔ nyɔ̀ʼ mu ŋwɔʼnə-Nyii mbɔ, ‘Njaa-ɔ nɔ bɛ njaagháaNyii,’ bɔŋ bii lʉ̀ i bə̀ŋ chəŋ-bəlʉʼʉ-shùɔ-bʉə."

14 Bəfʉ̀əŋtəshʉ ghɔŋbə bəlɛŋ gwè tʉ ɔŋ mu njaafɛ̀ʼndɛŋNyii, ɔ chʉ́ʼ bɔŋ. 15 Ndʉʉ ndə bətiefɛ̀ʼndɛŋNyii ghɔŋbə bʉə dàhə nuʼ-Mushi kə nyíɛ nuchíechubə ndə ɔ kə chìi, bɔŋleʼ yʉ́ ndə vâambuɔ kə́ tíitə mu chunjaafɛ̀ʼndɛŋNyii, kə́ ghɔ̀ŋ mbɔ, "Osana tʉ Vaa-Dɛbi!" tʉʉ-yʉə byʉ́ʼ. 16 Bɔ̂ŋ ghɔ̀ŋ tʉ ɔŋ mbɔ, "A yʉ́ nukə ndə vâa-bɔ̄ŋ tʉʼ gìe mɛ?" Jiso ghɔ̀ŋ tʉ bɔŋ mbɔ, "Əŋ, bii chʉʼ nə tíi mu ŋwɔʼnə-Nyii ndə i ghɔ̀ŋ mbɔ, ‘A nɔʼ dàhə vâambuɔ ghɔŋbə vâabuɔbuɔ ndə mələ̀ʼtə a,’ fe?" 17 Ɔ kʉ̂ʉ mɛ̀ʼtə bɔŋ, fyú hə mu mbʉ kəyəŋkwɛʼtəŋ gɛ̀ mu Bɛtani chí chɔ.

18 Mbi kʉ̂ʉ sɛŋ fíi, ɔ kə́ bʉ̀nə gɛ̀ mu kəyəŋkwɛʼtəŋ, jyʉʉ yɔ́ʼ ɔ. 19 Ɔ kʉ̂ʉ nyíɛ tyʉbɛʼkə ndə bə tíi nə tyʉ-fik-kə kəmbia fia, kwɛ̀ʼtə gɛ̀ mbʉə ghɔ, təmə nyíɛ fɔkə kətʉ-ghɔ̄ fɛ yaʼkɛŋ fyuŋbə. Ɔ ghɔ̀ŋ tʉ ɔŋ mbɔ, "Kə ntɔŋmə mə leʼnə kʉ́ʉnə ndəŋ aŋ fɛ!" Mbʉ kətyʉ-fik tuŋ yə́ŋ haʼ ndʉʉmɛ.

20 Ndʉʉ ndə vâafɔʼɔ-bi nyíɛ yɔ̄ŋ-yə, i chàa bɔŋ, bɔ̂ŋ kə́ ghɔ̀ŋ mbɔ, "Mbʉ kətyʉ-fik tuŋ yə́ŋ haʼ ndʉʉmɛ nɔ təka?" 21 Jiso bə̀ŋhə tʉ bɔŋ mbɔ, "Shʉəŋshʉəŋ m̈ɔ shyíi bii mbɔ, kaʼ bii mɔ̀ʼfyiihə-ii ndəŋ mɔ, təmə kə́ jínə fɛ, bii mə chìi haʼ nukə ndə bə chìi tʉ mbʉ kətyʉ-fik fɛ, bɔŋ bəkɔ bii ghɔ̀ŋ tʉ kwɔŋ-ɔ̄ŋ mbɔ, ‘Sòʼ ŋwɔŋ-aŋ gɛ̀ gwù mu muukwɛʼtəŋmə,’ i bɔŋ bɛ haʼ nɔ. 22 Nukə təmiyɔŋ ndə bii bíʼtə mu məgháaNyii, bii bu kie, kaʼ bii mɔ̀ʼfyiihə-ii ndəŋ mɔ."

23 Ndʉʉ ndə ɔ ŋíi mu chunjaafɛ̀ʼndɛŋNyii, bətiefɛ̀ʼndɛŋNyii ghɔŋbə bəntəŋbəshʉ mbʉ bʉə gwè tʉ ɔŋ ndʉʉ ndə ɔ kə́ dàhə, bíʼtə tʉ ɔŋ mbɔ, "A tʉʼ fɔ̀ʼ nubə-ɔ̄ŋ nə ghʉəʼ-nda-kə, bɔŋleʼ kɔ́ nda kɔ́ ghʉəʼkə tʉ a?"

24 Jiso bə̀ŋhə tʉ bɔŋ mbɔ, "Mɔ bu bíʼtə mbyu kənu ghɔ tʉ bii, kaʼ bii bə̀ŋhə tʉ mɔ, mbəŋ-ɔŋ buŋ shyíi bii ghɔ nə yəŋkə ndə mɔ lʉ̀ ghʉəʼkə-ɔŋ chɔ ndə məfɔ̀ʼ nubə-ɔ̄ŋ. 25 Jɔŋ nə kə́ kɔ́ muu le, ghʉəʼkə-i kə lɔ̀ hə fa? Hə yuo mɛ, kə hə kəghɔ-bʉə-məsʉʉ?" Bɔ̂ŋ jìʼtə mbʉ kənu-ghɔ̄ mu bɔŋ, ghɔ̀ŋ mbɔ, "Kaʼ bʉʼʉ ghɔ̀ŋ mbɔ, ‘I kə lɔ̀ hə yuo,’ ɔ bu ghɔ̀ŋ tʉ bʉʼʉ mbɔ, ‘Kə chìi ka təmə bii bɛ́ŋ ɔŋ ndʉʉghɔfii fɛ le?’ 26 Bɔŋ kaʼ bʉʼʉ ghɔ̀ŋ mbɔ, ‘I nɔ nə lɔ̀ hə kəghɔ-bʉə-məsʉʉ,’ bʉʼʉ nɔ tʉʼ fàa mbʉ nuɔ-bʉə, bʉʼka bɔ̂ŋ bənchəŋ nɔ bɛ́ŋ mbɔ Jɔŋ nɔ kə bɛ yʉkəŋgieNyii." 27 Ndʉʉmɛ, bɔ̂ŋ bə̀ŋhə tʉ Jiso mbɔ, "Baʼa kínə fɛ." Ɔ gìe tʉ bɔŋ mbɔ, "Yɔŋ mbəŋ ghɔ kʉʉ shyíi bii nə yəŋkə ndə ghʉəʼkə-ɔŋ lɔ̀ hə chɔ ndə məfɔ̀ʼ nubə-ɔ̄ŋ fɛ."

28 "A kwɔ̀ʼtə mbuka? Wobɛʼ nɔ nə kie vâabələŋ bəbûu. Ɔ gɛ̀ tʉ fəŋ ghɔ̀ŋ tʉ ɔŋ mbɔ, ‘Ŋaʼ, gɛ̀ laa gɛ̀ fɔ̀ʼ mutɔ bətyʉ ndə bə tʉʼ kwɛ̀tə ntɔŋmə chɔ.’ 29 Ɔ bə̀ŋhə mbɔ, ‘Mɔ kʉʉ gɛ̀ fɛ,’ bʉ̀nə shi kwɛ́nə fyii-i gɛ̀ mbʉ mutɔ. 30 Ɔ bìʼ gɛ̀ tʉ ibɛʼ-yə vaabələŋ-ɛŋ, bìʼ gɛ̀ gìe haʼ nɔ. Ɔ bə̀ŋhə mbɔ, ‘Mɔ bu gɛ̀, tie-ɔ,’ təmə bɔŋ gɛ̀ fɛ." 31 Jiso bíʼtə tʉ bɔŋ mbɔ, "Bɛ yɔ̂ŋ-yə ndə ɔ̈ yʉ́ gyʉʉ tie-e?"

Bɔ̂ŋ bə̀ŋhə mbɔ, "Nɔ bɛ fəŋ."

Jiso gìe tʉ bɔŋ mbɔ, "Nɔʼ m̈ɔ shyíi bii nə shʉəŋ mbɔ bʉə fí tashi ghɔŋbə bəsɔkʉʉ bu fəŋ ŋíi mu Sɔ́ʼ-Nyii bii buŋ yi ŋíi. 32 Jɔŋ ndə ɔ̃ kɔ́ muu nɔ nə gwè kə́ dʉ̀ʼ fia tʉ bii ndə məbɛ ndyʉndyʉ təmə bii bɛ́ŋ ɔŋ fɛ, bɔŋ bʉə fí tashi ghɔŋbə bəsɔkʉʉ bɛ́ŋ ɔŋ. Bɔŋ buŋ ndʉʉ ndə bii kə nyíɛ, təmə bii kwɛ́nə ndaahə-i bɛ́ŋ ɔŋ fɛ.

33 "B̈ii yʉ́ ibɛʼ-yə chəŋkə. Wobɛʼ nɔ nə bè tɔ-təlyʉʼ-kə-i ndə i kʉ́ʉnə ntɔŋmə bə kə́ tíi nə geleb, kɔ́ʼ lɔ̂ŋ chɔ yə̀ŋhə fúu, tyúu byʉʉ, bɔ́ŋ ŋkyʉʉkə chɔ ndə mə-kə́-lyúʼ mbʉ məntɔŋ muŋgɔ, bɔ́ŋ yəŋkə ndə nchyii bu kə́ kóʼ tə́nə chɔ lɛ́nə mutɔ. Ɔ chɔ̀ʼhə kɔ́ tʉ bəbɛʼbʉə mutɔ ndə bɔ̂ŋ bu kə́ yú bɔŋleʼ shyíi, lɔ̀ gɛ̀ lɔʼɔ kətə̂ŋ kədɔŋ. 34 Ndʉʉ ndə bə kwɛ̀tə ntɔŋmə chɔ kʉ̂ʉ kə́ŋhə, ɔ tə́ŋ vâafɔʼɔ-bi mbɔ b̈ɔ̂ŋ gɛ̀ fí shyîikə-i. 35 Mbʉ bʉə-mutɔ yá vâafɔʼɔ-bi, gwúu imɔʼ, yí imɔʼ leʼ túŋtə imɔʼ nə ŋgoʼhə. 36 Ɔ bìʼ tə́ŋ bəbɛʼbə vâafɔʼɔ, bɔ̂ŋ yɔ́ŋ chàa fəŋtə. Bɔ̂ŋ bìʼ chìi haʼ nɔ nə bɔŋ.

37 "Kəliʼ, ɔ tə́ŋ vaa-ɛ, kə́ ghɔ̀ŋ mbɔ, ‘Bɔ̂ŋ bu fàa ɔ.’

38 "Bɔŋ ndʉʉ ndə mbʉ bʉə-mutɔ kə nyíɛ vaa-ɛ, bɔ̂ŋ ghɔ̀ŋ tʉ ŋwɔŋtə-ʉə mbɔ, ‘Nɔ bɛ mbʉ nju-i nɔ, b̈ii gwè b̈ʉʼʉ yí ɔ, chʉʼ kie fɔbə-i.’ 39 Ndʉʉmɛ, bɔ̂ŋ yá ɔ, fyúhə ɔŋ mbʉ mutɔ mɛ̀ʼ ɔŋ mbi, yí ɔ.

40 "Ndʉʉ ndə mbʉ ŋwɔ̌ŋ-mutɔ bu gwè, ɔ bu chìi ka nə mbʉ bʉə-mutɔ ndʉʉmɛ?"

41 Bɔ̂ŋ ghɔ̀ŋ tʉ ɔŋ mbɔ, "Ɔ bu yítə bʉə-bʉ̂ʼʉ-maa-bɔ̄ŋ, bɔ̂ŋ kwú, kwú bʉəbʉə, kɔ́ mbʉ mutɔ tʉ bʉə-kədɔŋ ndə b̃ɔ̂ŋ fɔ̀ʼ mutɔ, ndə bɔ̂ŋ bu kə́ shyíi ndʉʉ ndə ntɔŋmə kʉ́ʉnə."

42 Jiso ghɔ̀ŋ tʉ bɔŋ mbɔ, "Bii chʉʼ nə tíi mu ŋwɔʼnə-Nyii ndə i ghɔ̀ŋ mbɔ,

‘Mbʉ ŋgoʼ ndə bʉə bɔ́ŋ njaa kə bìe mɛ̀ʼ,

nɔ bɛ ŋgoʼ-fûu-njaa nduɔ,

kə́ bɛ fɔʼɔ-Tiekətʉ,

i bɔŋleʼ bʉ̀ʉ shʉ-baʼa daa’ fe? * 21:42 Ŋwɔʼnə-təLyuu 118:22-23.

43 Nɔʼ m̈ɔ shyíi bii mbɔ bə bu fí Sɔ́ʼ-Nyii kəghɔ-bii, kɔ́ tʉ bʉə ndə bɔ̂ŋ tʉʼ kʉ́ʉnə ntɔŋmə-i. 44 Wo ndə ɔ bu wɔ̀tə ndəŋ ŋgoʼ-ghɔ̄ gwù, bu ŋìʼtə bəviabəvia, bɔŋ kaʼ mbʉ ŋgoʼ leʼ gwù ndəŋ wo, i jìehə ɔŋ tə ɔ báʼtə." *21:44 Bəbɛʼbəŋwɔʼnə kəŋgie-Gili nɔ fyúhə yuhəbə 44.

45 Ndʉʉ ndə bətiefɛ̀ʼndɛŋNyii ghɔŋbə bʉə-Falasi kə yʉ́ chəŋbə-ɔ̄ŋ ndə Jiso kə mɔ̀ʼ, bɔ̂ŋ kínə yʉə-yə mbɔ Jiso nɔ kə́ kwə́ʼ te bɔŋ. 46 Buŋ ndə bɔ̂ŋ kə́ kʉ́ʉ fia ndə məyá ɔ, bɔ̂ŋ nɔ kə́ fàa shʉ mbʉ nuɔ-bʉə-tə bʉʼka bɔ̂ŋ nɔ nə lʉ̀ ɔ ndə məbɛ yʉkəŋgieNyii.