1 Wat aYeso nɔ ayɛt kukyɛ ashi, a tat sak ni nyi kuya ni iwɔp wu*. 2 Azɔng wu, fɛ́ banet bakak ku bɛ́ na anet akak fi kurɔm se mɛrɛk, ni men na meneng. Fɛ́ aYeso di inɔɔk atsak ba, a fɛ̀ na anet irɔk e, <<Nggon in, ngɔn bi daam awo, ba mi da fuut anɛn ngɔn.>>

3 Awɛt ni izen fɛ́ bakak ayɛt bafi itees ntsi aMusa fok anɔng, ba kpa tɔ wɔɔn ba yɛ, <<Anet yong beseng iyerek Adakunom!>>

4 AYeso rēn kuyiring bá, nek anɔng, a fɛ̀ ni iba, <<Akyɛ sak fi i bɛ̀ yin kuyiring kuduk e anɔng ɛ? 5 Ingan de fi iwat se byɛrɛ yɛ? Na ba fɛ̀, <Ba mi da fuut anɛn ngɔn a,> ke na ba fɛ̀, <Dorok tsik, da tseng,> ɛ? 6 Awɛt nɔng i da rēn yin fok Arim Anet bi ice azeng azatse na a fuut anɛn.>> A da nɛ tirik, a fɛ̀ nɛ anet fi kurɔm se mɛrɛk e, <<Dorok tsik, sok kameneng ngɔn, tseng sak ari.>> 7 Wat anet e, dorok, a yit irén. 8 Ni izen fi kudyɛng banet e di ikyɛng fi ite, ayɔɔt ka ba yit, ba tere Adakunom, nek kukyem ti kuyɔng fɛ́ a nɔɔk banet.

9 Fɛ́ aYeso se ni iwon karɔ me yɔng, a di anet akak fɛ́ ba ku yes aMatiyu, ni isonong ni kubut ishashang itsɔm mben wu. AYeso fɛ̀ ni wu, <<Di kuus mo.>> AMatiyu wat a dorok ziri, a ku kuus mo.

10 Ni izen fɛ́ aYeso sonong narɔ iyak ari me, banet ishashang itsɔm mben dot, nɛ bafɛ́ aduk nggɔn, tsɛ ba yas gung ni iwu nɛ bafi imɛɛs. 11 Fɛ́ BaFarasi di anɔng, ba rip bafi imɛɛs wu yɛ, <<Akyɛ sak Anet Itees yin, yas nɛ banet ishashang itsɔm mben nɛ bafi aduk nggɔn ɛ?>>

12 Ni ifok anɔng, aYeso fɛ̀ ni iba, <<Da bayɔng fɛ́ ba bɛ̀ kukyang bá fɛ́ ba tsɛt abok awo, tit bayɔng fɛ́ ba se ni irɔk. 13 Tsi yiring ifɛ̀ de: <Imi shim ni tonoso yin angmishish da inabak-akuce awo.> Nek imi bɛ́ nek iyes batabat e awo, tit mok bafi inɛn.>>

14 Ama anɔng, bafi imɛɛs aYohana tsɛ ba rip aYeso yɛ, <<Akyɛ sak fi iyit nɛ BaFarasi in temak yit nanu, awɛt na bafi imɛɛs ngɔn raba dang nye anɔng ɛ?>>

15 AYeso ka ba rip yɛ, <<I se yɛɛt na bafidang amatek agwel nye kafa kawe ni izen fi iwu rēn se ni iba yɛ? Awɛy! Izen bi nye fɛ́ ba bi sok amatek agwel e ni iba, ni izen e yɔng, ba bi nɛ ba temak nanu.

16 <<Vit anet fɛ́ a sok icek ikpin ifas fi i se dang te shungut, na di basak na ashungut agyɛt ikpin, nek ibisik e, da bang kɔrɔk agyɛt ikpin e, ni ku bang sarák. 17 Ke anet na tse na korok ashi anap afas ni itsung-kuruu kuzen. Ke ba nye anɔng, itsung-kukpa me da sarák. Ikyɛng inye yet, ashi anap afas, ba te ina ni itsung-kukpa kufas, na anɔng, ba di ki sak itsung-kukpa me, nɛ ashi anap e.>>

18 Na aYeso tsin ren cɛɛt, akɔk-ashon akak, tsɛ a te nyɔk ashon wu, a fɛ̀ ni iwu, <<Kangas hom tsin mɛsɛng ku. Awɛt ngɔn bɛ́ tsi di sak kubɔk naton ka, ka da tɛ ka dorok.>> 19 AYeso dorok, a ku kuus mo gung na bafi imɛɛs wu.

20 Ba se na anɔng, abining akak fɛ́ a bɔrɔng ni iteng nasok ayɛ kusɔk abe afaa, ne ama wu, a ra kanu ikpin aYeso, 21 abining e fɛ̀ ayɛt iyɛ wu, <<Ki in kyem in ra kanu ikpin wu kyɛk, in da sɛ kukyang.>>

22 AYeso tirik, a ku di, a fɛ̀ ni iwu, <<Angas yin, sak iyɛ ngɔn ting! Inɔɔk atsak ngɔn mi da te kyang*.>> Ni izen izining, abining e wat a sɛ kukyang.

23 Izen fɛ́ aYeso tsɛ a ta ari akɔk-ashon e, a sɛ bafi ihwyɛrɛ iyɔm, ni kudyɛng banet nkum awɔng kaakyɛ. 24 A fɛ̀ ni iba, <<Di nang yin irèn! Kanamang e mi ku awo, ka se ni nda.>> Banet e ku mas. 25 Ama fɛ́ ba mi tun kudyɛng banet e amatse, aYeso nɔ ayɛt e, a sok kubɔk anamang e, kanamang e dorok. 26 Kucɛɛt ikyɛng fɛ́ aYeso nye me, teng ku tseng kaakyɛ ni mben e.

27 Na aYeso tsin won azɔng, bakpatɔn bafaa ku kuus mo, ba ta kutɔ, ba fɛ̀ ni iwu, <<Arim agwɔm aDauda, fok angmishish yit!>>

28 Ama fɛ́ nɔ ari kakak, bakpatɔn e, tsɛ ba ku sɛ azɔng, a fɛ̀ ni iba, <<Iyin nɔɔk yin atsak fok imi da kyem in ki te yin kyang ɛ?>>

Ba fɛ̀ ni iwu, <<Ey, aTisa!>>

29 A ma ka ba ra ayisi, a fɛ̀ ni iba, <<Won ni i ki sot yin kpaf ti inɔɔk atsak yin,>> 30 ayisi ba wat a tarak. Ama anɔng, aYeso ka ba kɔrɔk kuto yɛ, <<Da i bi tak yin akak ikyɛng fi ite awo.>> 31 Ngma na anɔng, iba ya kashon ni ishara ifɛ̀ naton wu kaakyɛ ni mben e.

32 Ni iba tsin wuru, ba se ni inɔs na anet akak fi kurɔk itseng ku sak a kyem a cɛɛt awo narɔ aYeso. 33 Ama fɛ́ ba tun itseng e, anet fi kucɛɛt tsang ku gaat e, kpa cɛɛt. Ayɔɔt yit kudyɛng banet fɛ́ ba se azɔng, ba fɛ̀, <<Ba mang di ikyɛng ti ideng ni aIsrela awo.>>

34 Awɛt BaFarasi fɛ̀, <<Ayet agwɔm itseng wu a ku nesek agap fɛ́ a di turung itseng e.>>

35 AYeso teng a kat ni nwɔp nratek, ni nban e, na ras itees na narɔ inyis baYahuda, na shara ifɛ̀ itek ifi igwɔm, na tes banet nrɔk zizɛɛt nɛ bafi isɔ izot kyang. 36 Ni izen fɛ́ a di kudyɛng banet, a fok angmishish ba, nek ba ka ba tes anyim, wɛt vit ayɔng fɛ́ a da ka ba se mo ti ítsamang fi i se vit anek de. 37 Nek anɔng, a fɛ̀ na bafi imɛɛs wu, <<Itusung kuyak e se dot, awɛt bafi itomong e rat. 38 Nek anɔng, ra yin awon sak na aTisa ikɔ me, na a tom banet itomong fɛ́ ba da tusung kuyak akɔ me.>>