1 Saŋa gana naŋ na, Sɔɔlʋ saŋ wʋ a tawɩ kʋ ŋaŋsɛ wɩɛ wʋ a baŋ Kpaŋjuo Yesu kpalɛnara baa. Wʋ cha ju sei bɩnɩɛ naŋ bɩnɛ wʋŋ jaŋ 2 sɛ wʋ ga tasɛ ɩ sɛ wʋ n fa ɩ yikuo tanɩɛ na wʋ a ju Yudatina tʋm danɩŋ ŋii ŋɩ wɩɛ Damasiko dɩɛ naŋ na wʋ a ga chaŋ baala na ala baa ba kpi Gbɩɛ* gaa dʋɔ na, na wʋ a mʋ ba kɔŋ Yerusalem takɩɛ danɛ tʋɔra. 3 Gʋ wʋ tirina Damasiko dɩɛ na, gabʋanaŋ sɛ ŋmaŋi lɩɩ Ɩsʋɔ adugbe gaa chɩrɩɛ logo ɩ. 4 Sɛ wʋ lɩɩ sala tibi sɛ wʋ nyii lofu garɛ tasɛ ɩ sɛ, <<Sɔɔlʋ, Sɔɔlʋ be n yɩɛ sɛ nyaa nyala maŋ?>>

5 Sɛ Sɔɔlʋ tasɛ sɛ, <<Kpaŋjuo, nyaŋ n nyina Mmʋɔ?>>

Sɛ lofu gaa lɩsɛ ɩ nʋɔ sɛ, <<Maŋ n nyina Yesu wʋŋ nyaa nyala ɩ na.>>

6 <<Dɩtɩɛna kʋlʋ ju dɩɛ janɛ gaa naŋ. Baa tawɩ nyaŋ bʋrʋ gaa ŋɩ tiri gʋ nya n yɩɛ.>>

7 Sɛ baala baa ba na Sɔɔlʋ a ju gbɩɛ na sɩmɩɛɩ ba aa dɩlɛ baa tawɩ bʋrʋ ʋ, baa nyii lofu ama ba n na wʋrʋ ʋ. 8 Sɔɔlʋ kʋlʋ tibi na, ama wʋ fulu wʋ asa na, wʋ a na a. Dɩmʋŋ dʋɔ ba chaŋ wʋ pam naŋ bɛ ju Damasiko dɩɛ naŋ. 9 Wʋ yɩɛ ɔtaŋpʋ wɩɛ atoro yela wʋ n di yaa wʋ n nyʋɔ bʋrʋ ʋ.

10 Kpalɛnarɛ wʋrʋ wɩɛ Damasiko dɩɛ naŋ baa yagɛ ɩ sɛ Ananiyasi. Sɛ Kpaŋjuo lɩsɛ kalaa ɩ yagɛ ɩ sɛ, <<Ananiyasi!>>

Sɛ wʋ kpa sɛ, <<Ɛɛŋ Kpaŋjuo.>>

11 Sɛ Kpaŋjuo tawɩ ɩ sɛ, <<Kʋlʋ ju Yudasi waa gaa ga wɩɛ Chirigi dɩɛ naŋ gbɩɛ bie gaa dʋɔ, na nyaa tasɛ baalɛ wʋŋ wʋ lɩɩ Taasusi dɩɛ naŋ sɛ baa yagɛ ɩ sɛ Sɔɔlʋ na dʋɔ, akala takɩɛ wʋ a jɔ dɩga. 12 Sɛ wʋ yu Ɩsʋɔ lɩsɛ kalaa sɛ wʋ na gʋ baalɛ wʋrʋ wʋŋ baa yagɛ ɩ sɛ Ananiyasi kɔŋ gaa mʋ wʋ pam jaga wʋ dʋɔ, na wʋ asa a fulu.>>

13 Ama Ananiyasi tawɩ sɛ, <<Kpaŋjuo, ma nyii wɩɛ fɔɩ lɩɩ dɩmʋŋ baalɛ wina dʋɔ na ganaŋkʋ wʋ nyala n bakpa dɩchɩrɩchɩrɩ Yerusalem na. 14 Wʋ yu yikuo lɩɩ sei bɩnɩɛ naŋ bɩnɩɛ baa jaŋ kɔŋ jɩna na wʋ a gaa chaŋ baa baa yagɛ n yɩrɛ na kpiniŋ.>>

15 Ama Kpaŋjuo tawɩ Ananiyasi sɛ, <<Ju! Baalɛ wina yɩɛ wʋkpa wʋŋ ma lɩsɛ na bɛ, na wʋ a gaa tawɩ ma yɩrɛ dʋɔ wɩɛ fa baa ba ba yɩɛ Yudatina na ba juoneŋ na Isiralitina kpiniŋ. 16 Maa kalaa ɩ ganaŋkʋ ŋɩ tiri gʋ wʋ a na awʋrʋfʋɔ fɔɩ ma yɩrɛ dʋɔ.>>

17 Dɩmaŋ sɛ Ananiyasi ju ga jʋʋ waa gaa dʋɔ. Sɛ wʋ mʋ wʋ pam jaga Sɔɔlʋ dʋɔ tawɩ sɛ, <<Ma dʋɔ Sɔɔlʋ, Kpaŋjuo Yesu, wʋŋ wʋ lɩsɛ wʋ wʋsɛ kalaa nyaŋ gbɩɛ naŋ gʋ nyaa kɔŋ jɩna na, n kpiri maŋ ganaŋkʋ nya asa aja fulu, na Ɩsʋɔ Feliŋ ŋii a su n tɩba.>> 18 Gabʋanaŋ sɛ bʋrʋ garɛ ga kɩɛna bɛ takɩɛ diji bɔrɩɛ lɩɩ Sɔɔlʋ asa dʋɔ sala, sɛ wʋ bɔrɛ wʋ a na. Wʋ kʋlʋ sɛ ba sɔ ɩ. 19 Gʋ wʋ di taŋ na, wʋ yu doŋ.

Sɔɔlʋ di gɩyɩɛnɩŋ fɔɩ kpalɛnara baa jaŋ Dasikosi dɩɛ naŋ.

20 Gabʋanaŋ sɛ Sɔɔlʋ fara wʋ a tawɩ Ɩsʋɔ wɩɛ Yudatina tʋm danɩŋ naŋ sɛ Yesu n nyina Ɩsʋɔ Bu wʋŋ. 21 Sɛ dɩ yɩɛ baa ba nyii wʋ wɩɛ ŋii kpiniŋ doba sɛ ba tasɛ sɛ, <<Naa baalɛ wina n cha nyala baa ba wɩɛ Yerusalem baa dɩmʋŋ yagɛ gana yɩrɛ naa? Naa wʋŋ n kɔŋ jɩna na wʋ a gaa chaŋ ba takɩɛ danɛ tʋɔra ga fa Ɩsʋɔ sei bɩnɩɛ naŋ bɩnɩɛ baa naa?>> 22 Ama Sɔɔlʋ bɩɩ yɩɛ doŋ Ɩsʋɔ wɩɛ tawɩ naŋ sɛ wʋ dɩlɛ kalaa gʋ Yesu n nyina Kirisito wʋŋ. Ŋina dʋɔ Yudatina baa ba wɩɛ Damasiko dɩɛ naŋ na n dɩlɛ di ɩ noro ʋ.

23 Wɩɛ fɔɩ ŋarɛ wʋrʋgbɩɛ na, Yudatina baa pɔgʋ sɛ ba n kʋ ɩ, 24 ama Sɔɔlʋ jiŋ ŋii ba pɔgʋ na. Wiita na yuluma kpiniŋ baa kɩɛ dɩɛ janɛ gaa buonɔ na dieli na baa ɩ kʋ. 25 Ama wʋ kpamɩra baa mʋ ɩ dʋ gachaŋa naŋ yuluma mʋ ɩ mʋna dɩpɔrɛ gaa ga logo dɩɛ janɛ gaa bʋɔ naŋ tibi na ɩ.

26 Gʋ Sɔɔlʋ tala Yerusalem na, wʋ chɩdɩsɛ wʋ a kpi kpalɛnara baa dʋɔ, ama ba kpiniŋ baa se ɩ, akala takɩɛ ba n lɩɛ ɩ di gʋ wʋ yɩɛ kpalɛnarɛ gasiŋteŋ ŋ. 27 Ama Banabasi mʋ ɩ kɔŋ kpirida baa jaŋ. Wʋ tawɩ ba ganaŋkʋ Sɔɔlʋ na Kpaŋjuo sɛ Kpaŋjuo tawɩ fa ɩ gʋ wʋ a ju gbɩɛ, na ganaŋkʋ wʋ mʋ digela tawɩ Ɩsʋɔ wɩɛ Yesu yɩrɛ naŋ Damasiko. 28 Sɛ Sɔɔlʋ cha ba jaŋ sɛ wʋ lɔ wʋ wʋsɛ Yerusalem, sɛ wʋ mʋ digela tawɩ Ɩsʋɔ wɩɛ Kpaŋjuo yɩrɛ naŋ. 29 Sɛ wʋ tawɩ di noro na Yudatina baa baa tawɩ Giriki dɩtawɩ na, ama ba chɩdɩsɛ baa kʋ ɩ. 30 Gʋ lɩɛdɩra baa jiŋ ŋina na, ba mʋ ɩ ju Kayisariya dɩɛ naŋ sɛ ba lɩsɛ ɩ gbɩɛ ju Taasusi.

31 Dɩmaŋ sɛ lɩɛdɩra dikpeŋ gaa ga wɩɛ Yudiya, Galaliya na Samariya tibi kpiniŋ dʋɔ na yu wʋsɛfɩɛ saŋa gana naŋ. Sɛ Ɩsʋɔ Feliŋ dʋ ba doŋ sɛ wʋ tawɩ dʋ ba, sɛ lɩɛdɩra dikpeŋ gaa bɩɩ sɛ lɩɛdɩra baa cha Kpaŋjuo wʋŋ sebisi naŋ.

32 Gʋ Petero pala tibi gaa kpiniŋ dʋɔ na, wʋ ju ga yɩlɩ Ɩsʋɔ bakpa dɩchɩrɩchɩrɩ baa ba wɩɛ Lida dɩɛ naŋ. 33 Dɩmaŋ sɛ wʋ na baalɛ wʋrʋ baa yagɛ ɩ sɛ Aniyasi, wʋ jaɩ-jaɩ wʋ duwei kalaŋ dʋɔ bɩŋsɛ jiŋinara. 34 Sɛ Petero tawɩ ɩ sɛ, <<Aniyasi, Yesu Kirisito chɔ nyaŋ. Kʋlʋ na nyaa go n kalaŋ.>> Gabʋanaŋ sɛ wʋ kʋlʋ. 35 Gʋ bakpa baa ba wɩɛ Lida na Saroŋ dɩɛ naŋ kpiniŋ na ɩ na, ba biliŋi ba n nfɩɛrɛ sɛ ba lɩɛ Kpaŋjuo di.

36 Alʋ Lɩɛdɩrɛ wʋrʋ wɩɛ Yopa dɩɛ naŋ baa yagɛ ɩ sɛ Tabita [tie n nyina Dokasi*], wʋŋ wʋ a yɩɛ dɩbam yela wʋ a chɔna ayɔŋtina saŋa kʋma. 37 Dɩmʋŋ saŋa gana sɛ wʋ kili sɛ wʋ sɩŋ, sɛ ba sɔ wʋ gɩtatɛ mʋ ɩ ga si abaŋsʋrʋ danɛ naŋ. 38 Lida dɩɛ tirina Yopa dɩɛ. Dɩmʋŋ dʋɔ gʋ kpalɛnara baa nyii gʋ Petero wɩɛ Lida dɩɛ naŋ na, ba kpiri baala bala wʋ jaŋ ga tawɩ ɩ sɛ, <<Dɩɩ sʋlʋ nyaŋ, yɩɛ bileŋ na nyaa kɔŋ.>>

39 Sɛ ba na Petero ba ju. Gʋ wʋ talɛ na, ba mʋ ɩ ju abaŋsʋrʋ danɛ gaa naŋ. Sɛ bakulapuna ala jaŋ baa kpiniŋ sɩŋ logo ɩ baa wɩɩ yela ba chamɩna ba gagbasɛ na abʋrɩ afuusa ŋii Dokasi ŋara fa ba, gʋ wʋ chaɩ nkpa naŋ ba jaŋ na mʋ kalaa Petero.

40 Sɛ Petero yela sɛ baa ba wɩɛ danɛ gaa naŋ na kpiniŋ lɩɩ asʋŋ. Sɛ wʋ luuŋ wʋ dʋna dʋɔ jɔ dɩga. Sɛ wʋ biliŋi kɩɛ atatɛ wʋŋ tawɩ sɛ, <<Tabita kʋlʋ.>> Sɛ wʋ fulu wʋ asa na Petero, sɛ wʋ kʋlʋ cha. 41 Sɛ Petero chaŋ wʋ pam naŋ chɔna ɩ sɛ wʋ kʋlʋ sɩŋ. Dɩmaŋ sɛ wʋ yagɛ lɩɛdɩra baa na ala bakulapuna baa sɛ wʋ mʋ Tabita wʋŋ wʋ feŋ kɔŋ nkpa naŋ na, fa ba. 42 Dɩmʋŋ wɩɛ ŋina yalagi Yopa dɩɛ naŋ kpiniŋ, sɛ bakpa fɔɩ lɩɛ Kpaŋjuo di. 43 Sɛ Petero cha Yopa dɩɛ naŋ wɩɛ akalasa ŋarɛ gbaŋsɩba wʋrʋ wʋŋ baa yagɛ ɩ sɛ Simoŋ na jaŋ.