1 ହଖଲୀୟନେ ଉଂଡେ ନିହିମୀୟାନେ ବ୍ନାଲିର୍‌ । କୁଡ଼ିଏତମ ମୁଆଁନେ କିଶ୍ଲେବ୍‌*1:1 କଶ୍ଲେବ୍‌ନେ ଅରତ୍‌ ଦିଆଲି ପଣ୍ଡ୍‌ ଆର୍କେ ଆର୍କେ କେଲା ନେଙ୍ଗ୍ ଶୂଶନ୍‌ ରାଜଧାନିନିଆ ନ୍ଲେଗେ । 2 ନେଙ୍ଗ୍‌ ଅଃନା ବେଲା ଶୂଶନ୍‌ନିଆ ନ୍ଲେଗେ, ନେଙ୍ଗ୍‌ନେ ରାଜାଇଂନେ ବାନ୍‌ ମୁଇଂଜାନେ ମିନି ଲାଏଗେ, ହନାନି ବାରି ଯିହୁଦାବାନ୍‌ ଉଡ଼ିରୁଆ ପାଙ୍ଗ୍‌ଲେଃଆର୍‌ଗେ । ତେଲା ନେଙ୍ଗ୍‌ ଆମେଇଂକେ ବନ୍ଦି ଡିଂଲାଏଃକ୍ନେବାନ୍‌ ପାଙ୍ଗ୍‌ଲାଏଃକ୍ନେ ଉଡ଼ିରୁଆ ଯିହୁଦିଇଂନେ ବିଶୟ୍‌ରେ ବାରି ଯିରୂଶାଲମ ବିଶୟ୍‌ରେ ମ୍ପଚାରେକେ । 3 ଆତେନ୍‌ ବେଲା ମେଇଂ ଆନେଙ୍ଗ୍‌କେ ବାସଙ୍ଗ୍‌କେ, "ଜାଣ୍ଡେଇଂ ବନ୍ଦି ଡିଂଲାଏଃକ୍ନେବାନ୍‌ ପାଙ୍ଗ୍‌ଲେଃଆର୍‌ଗେ ଆତେନ୍‌ ପ୍ରଦେଶ୍‌ନେ ବାଃଗାରେଇଂ ଜାବର୍‌ ଦୁକ୍‌ ବାରି ସୁକ୍‌ରେ ଲେଃଆର୍‌କେ ମେଃଡାଗ୍‌ଲା ଯିରୂଶାଲମନେ ତୁରାଃ ପାକ୍‌ଚି ବଆର୍‌କେ ବାରି ଆତ୍‌ଅରିଆ ଲେଃକ୍ନେ କାପାଟ୍‌କେ ବାବିଃବଆର୍‌କେ ।" 4 ଅଃନାବେଲା ନେଙ୍ଗ୍‌ ମେଙ୍ଗ୍‌ନେବାନ୍‌ ଆକେନ୍‌ କବର୍‌ ମ୍ୱାକେ, ନେଙ୍ଗ୍‌ ଦୁକ୍‌ ଣ୍ଡିଙ୍ଗ୍‌କେ । ନେଙ୍ଗ୍‌ କଚେ ଙକେ । ନେଙ୍ଗ୍‌ ଉପାସ୍‌ ଲେଃଚେ ଜାବର୍‌ ଦିନ୍‌ ସାଚେ ସର୍‌ଗନେ ପର୍‌ମେସର୍‌କେ ପାର୍‌ତନା ଣ୍ଡିଂକେ । 5 ଇଡ଼ିଂ ନେଙ୍ଗ୍‌ ଦେକ୍‌ରକମ୍‌ ପାର୍‌ତନା ଣ୍ଡିଂକେ: ଏ ମାପ୍‌ରୁ ସର୍‌ଗନେ ପର୍‌ମେସର୍‌, ନା ମ୍ନା ବାରି ବୟଙ୍କାର୍‌ ପର୍‌ମେସର୍‌ । ଜାଣ୍ଡେଇଂ ଆନାକେ ବଲ୍‌ ବାଡିଂଆର୍‌କେ ବାରି ନାନେ ଆଜ୍ଞା ସାପା ପାଲେ ଡିଂକେ, ମେଙ୍ଗ୍‌ନେ ପାକା ନା ନିଅମ୍‌ ବାରି ଦୟା ଆଃସୁଏ ନାମ୍ୟାଃକେ । 6 ନାନେ ନ୍ଲୁଗ୍‌ ଦ୍ରିଗ୍‌ ବାରି ନାନେ ମୁଆଃ ରଃ ବାରି ନେଙ୍ଗ୍‌ନେ ପାର୍‌ତନାନିଆ ଦିଆନ୍‌ ବିଃ । ମେଃନେ ନେଙ୍ଗ୍‌ ସ୍ମି ମିଡିଗ୍‌ ଆନାକେ ପାର୍‌ତନା ଡିଂଣ୍ଡିଂ । ନେଙ୍ଗ୍‌ ନାନେ ଦାସ ଇସ୍ରାଏଲ୍‌ ରେମୁଆଁଇଂନେ ଆତ୍‌ଲା ନା ଡାଗ୍ରା ପାର୍‌ତନା ଡିଂନେଡିଂ । ନା ବିରୁଦ୍‌ରେ ଡିଂବକ୍ନେ ପାପ୍‌ ନେ ମାନେଃନେଡିଂ । ନେଙ୍ଗ୍‌ ବାରି ନେଙ୍ଗ୍‌ନେ ଡୁଆଣ୍ଡ୍ରେ ପାପ୍‌ ଡିଂନେବ । 7 ନେ ନା ବିରୁଦ୍‌ରେ ଜାବର୍‌ ପାପ୍‌ ଡିଂନେଡିଂକେ ବାରି ନା ନାନେ ଦାସ ମୋଶାକେ ଆଣ୍ଡିନେ ଆଜ୍ଞା ବାରି ନିଅମ୍‌ ବାରି ସାସନ୍ ଡିଂନେ ଆଦେସ୍‌ ଡିଂନାବ, ଆତେନ୍‌ ସାପା ନେ ପାଲନ୍‌ ନେଡିଂକେ । 8 ନା ନାନେ ଦାସ ମୋଶାକେ ଆଜ୍ଞା ଡିଂଚେ ବାସଙ୍ଗ୍‌ନାବଗେ, ପେ ସତ୍‌କେ ଅମାନି ପେଡିଂଲା, ନେ ଆପେକେ ନାନା ଜାତି ବିତ୍‌ରେ ଚିନ୍‌ ଚତର୍‌ ନ୍ନାଃଡିଂଏ । 9 ମାତର୍‌ ଜଦି ଅଃନା ପେ ନେ ଡାଗ୍ରା ପେପାଙ୍ଗ୍‌ଏ ବାରି ନେନେ ଆଜ୍ଞା ପାଲନ୍‌ ଡିଂଚେ ଆତେନ୍‌ ଇସାବ୍‌ରେ କାମ୍‌ ପେଡିଂଏ, ତେଲା ପେନିଆ ଲେକ୍ନେ ରେମୁଆଁଇଂ କିତଂଇନିନେ କନେ ଲେଃଲା ଡିଗ୍‌ ନେ ଆତ୍‌ବାନ୍‌ ଆମେଇଂକେ ମୁଇଂତୁଗ୍‌ ନେରାଃସିଙ୍ଗ୍‌ଏ ବାରି ନେ ନେଙ୍ଗ୍‌ନେ ମ୍ନି ତିଆର୍‌ ଡିଂ ନ୍‌ସା ଆଣ୍ଡିନେ ଜାଗା ବାଚେମ୍ୱକେ, ଆତେନ୍‌ ଜାଗାନ୍ନିଆ ଆମେଇଂକେ ୱା ଡୁଙ୍ଗ୍‌ନେପାଙ୍ଗ୍‌ଏ । ଗୁଆରି ଡିଂଣ୍ଡିଂ, ନାନେ ଆକେନ୍‌ ସାମୁଆଁକେ ମନେ ତ୍ଲାଗ୍‌ । 10 କିମେଇଂ ନାନେ ଦାସ ବାରି ନାନେ ରେମୁଆଁ, ନା ଆକ୍ମେଇଂକେ ନାନେ ମ୍ନା ପରାକ୍ରମ ବାରି ନାନେ ବପୁତି ଏଃତେ ଉଦାର୍‌ ଡିଂନାବ । 11 ଏ ମାପ୍‌ରୁ, ଗୁଆରି ଡିଂଣ୍ଡିଂକେ, ଜାଣ୍ଡେଇଂ ନା ମ୍ନିକେ ବୁଟନ୍‌ସାଃ ସାର୍ଦା ଡିଂମିଆ, ଦେତ୍‌ରକମ୍‌ ନା ଦାସନେ ପାର୍‌ତନା ବାରି ନା ଦାସଇଂନେ ପାର୍‌ତନା ଡିଂନେ କେଲା ନାନେ ନ୍ଲୁଗ୍‌ ଅଁଲେ, ବାରି, ପାର୍‌ତନା ଡିଂଣ୍ଡିଂ, ଏଃକେ ନାନେ ଦାସନେ କାମ୍ ପୁରନ୍‌ ଆଃଡିଂ, ବାରି ଆକେନ୍‌ ରେମୁଆଁ ସାମ୍‌ନାବାନ୍‌ ଆମେକେ ଦୟା ବାନ୍‌ସାଃ ବିଃ । ଏନ୍‌ ବେଲା ନେଙ୍ଗ୍‌ ଇଃସାଙ୍ଗ୍‌ ଉଗ୍‌ନେ ମୁତାକେ ସା ଅଲେଙ୍ଗ୍‌ ଣ୍ଡିଂଗେ ।