ନିହିମିୟା ଯିରୂଶାଲମନେ ତୁରାଃ ଆଣ୍ଡେଙ୍ଗ୍କେ ଅଲେଙ୍ଗ୍ଚେ କେକେ
11 ନେଙ୍ଗ୍ ଯିରୂଶାଲମନିଆ ଉଁୱେକେ ବାରି ଆତ୍ଅରିଆ ଜିର୍ସି ଦିନା ନ୍ଲେଗେ । 12 ଆକେନ୍ ପରେ ମିଡିଗ୍ବ କେଲା ଉଡ଼ିକ୍ଲିଗ୍ ରେମୁଆଁଇଂ ଏତେ ଅଲେଙ୍ଗ୍ସାର୍ ଉଁୱେକେ । ପର୍ମେସର୍ ଯିରୂଶାଲମ ଆତ୍ଲା ମେଃ ଡିଂନ୍ସାଃ ଆନେଙ୍ଗ୍ ବାସଙ୍ଗ୍ବଗେ, ଆତେନ୍ ନେଙ୍ଗ୍ ଜା ଡାଗ୍ରା ଡିଗ୍ ନ୍ନାବାସଙ୍ଗ୍କେ ଣ୍ଡୁ । ନେଙ୍ଗ୍ ଆଣ୍ଡିନେ ଗଡ଼ାନିଆ ଡେଃନ୍ଲେକେ ଆତେନ୍ ଗଡ଼ାକେ ଆନ୍ତାର୍ ବିଃଲା ନେଙ୍ଗ୍ ଡାଗ୍ରା ଆରି ଗଡ଼ା ଆଲେଗେ ଣ୍ଡୁ । 13 ତାଂକିଗ୍ଲା ନେଙ୍ଗ୍ ଟିକ୍ରା ଗାଲି ବିଃଚେ ମାଃଲାଃ ବଃ ଡୁଲେଗ୍ଲେଃକ୍ନେ କୁଇଁସାଲ୍ ଆରି କତ୍ଗାଦି ଡିଙ୍ଗ୍ଲେକ୍ନେ ର୍ଣ୍ଣସାଙ୍ଗ୍ ଜାକ ଉଁୱେକେ ଆରି ଯିରୂଶାଲମନେ ପାକ୍ଚିକ୍ନେ ତୁରାଃ ଆରି ଆତ୍ଅରିଆ ଲେଃକ୍ନେ ଗିଃଡିଙ୍ଗ୍କ୍ନେ ର୍ଣ୍ଣସାଙ୍ଗ୍ ସାପା ଙ୍କେକେ । 14 ଇଡ଼ିଂ ନେଙ୍ଗ୍ ଜଲାଡ଼୍ୟାଃ ଜାର୍ନେ ର୍ଣ୍ଣସାଙ୍ଗ୍ ଆରି ଇଃସାଙ୍ଗ୍ନେ କୁଣ୍ଡ୍ ଜାକ ଉଁୱେକେ । ମାତର୍ ଆତ୍ଅରିଆ ନେଙ୍ଗ୍ନେ ଗଡ଼ା ୱେନେ ଜାଗା ଆଲେଗେ । 15 ଆତେନ୍ସା ନେଙ୍ଗ୍ ଟିକ୍ରା ଆରାତ୍ରା ତାଙ୍ଗ୍କିଗ୍ ବେଲା ଣ୍ଡେଃକେ ଆରି ତୁରାଃକେ ନିମାଣ୍ଡା ବାବ୍ରେ ଙ୍କେକେ ଆରି ପାଦାନେ ର୍ଣ୍ଣସାଙ୍ଗ୍ ବିଃଚେ ଆଣ୍ଡେ ମ୍ପାଙ୍ଗ୍କେ । 16 ନେଙ୍ଗ୍ ଆଣ୍ଡିକେର ଙ୍ଗୁଏଃକେ ଆରି ମେଃନେ ଣ୍ଡିଂକେ ସାସନ୍ ଡିଂଣ୍ଡ୍ରେ ଆତେନ୍ ମ୍ୟା ଆୟା ଆର୍କେ । ଆରି ନେଙ୍ଗ୍ ଡିଗ୍ ଯିହୁଦିଇଂକେ, ପୁଜାରିଇଂକେ, ମ୍ନାଃରେକେ ଅଦିକାରିଇଂକେ କି ବିନ୍ନେ ଆଜାକେ ଡିଗ୍ ଆତାନ୍ ଆମ୍ୟାଃ ନ୍ନାବଗେ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)