1 ኢዮብ ዛሪደ፥ ሀዋዳን ያጌዳ፤ 2 "ኤ፥ ህንተ ቱሙካ አዳ ኤራንቻ፤ አዳ ኤራተ ኡባይካ ህንተናና ሀይቃና! 3 ሽን ታዉካ ህንተዋዳን አኬካይ ደኤ፤ ታን ህንተፐ ላፍከ! ሀ ህንተ ሃሳዬዳዋ ኡባ ኦንነ ኤሬ። 4 ታን ጾሳ ዎስና፥ እ ስሴዳ አሳ ግዶፐነ፥ ታ ላገቶ ሚጭያዋ ከሳድ፤ ታን ጽሉዋነ ቶሺ ባይና አሳ ግዶፐካ፥ ቅሊጭያዋ ከሳድ። 5 ህንተና አይ መቱነ ጋክቤና ድራዉ፥ ታ መቱዋ ካታ፤ ኩንዳናዉ ጋንድጋርያ ብታንያካ ሱጊታ። 6 ቦንቂያዋንቱ ጎለቱ ሳሮ ደኢኖ፤ ጾሳ ሀንቀያዋንቱ ህርግ ባይናን ደኢኖ። ኡንቱንቱ ኩሽያ ዎልቃይ ኡንቱንቱ ጎይንያ ጾሳ።

7 "ሽን ኔን አነ መሄቱዋ ኦቻ፤ ኡንቱንቱ ኔና ታማርሳና። ዎይ ሳሉዋ ካፎቱዋ ኦቻ፤ ኡንቱንቱ ነዉ ኦዳና። 8 ዎይ ሳአዉ ሃሳያ እዛካ ኔና ታማርሳና፤ አባ ሞለቱካ ነዉ ኦዳና። 9 መና ጎዳ ኩሺ ሀዋ ኦዳዋ ሀዋንቱ ኡባ ግዶን ኤረናዌ ኦኔ? 10 ፓጻ ደእያ መታቱዋ ኡባ ደኡነ አሳ ኡባ አያናይ አ ኩሽያና። 11 እንጻርሳይ ቁማ ሻክ ኤርያዋዳን፥ ሀይይ ሃሳያ ሻኪደ ኤረኔየ?

12 "አዳ ኤራተይ ጭሜዳ አሳቱ ማታን ደኤ፤ ዳሮ ዎድያ ደእያዌ አኬካ እሜ። 13 ጾሳዉ አዳ ኤራተይነ ዎልቃይ ደኤ፤ ዞሪነ አኬካይ አን ቤቴ። 14 ጾሳይ ቆሌዳዋ ዛረ ኬጻናዌ ኦኔ? እ ቃቼዳ ኡራካ ብል የዳናዌ ኦኔ? 15 ጾሳይ እራ ተኦፐ፥ ቢታይ መሌ፤ እ እራ ቡክሶፐ፥ ድኡ ቢታ ባይዜ።

16 "ምኖተይነ ጾኑ ጾሳዋ፤ ጭመትያዌነ ጭምያዌነ ላኡካ አፐ ጋርሳና ደኢኖ። 17 ዞርያዋንቱፐ እ አዳ ኤራ ቃር አኬ፤ ዳናቱዋካ እ ኤያ ከሴ። 18 እ ካተቱዋ ካተቱዋ አራታፐ ዎ፤ ኡንቱንታካ አይለቱዋ ኦ። 19 ቄሳቱ ዋፐካ ቦንቹዋ ቃር አኬ፤ ዎልቃማቱዋካ አ የጌ። 20 አማነቴዳ አሳቱዋካ ጮኡ ኦ፤ ጭማቱዋፐካ አኬካ ዎ አኬ። 21 ካፓቱዋ ካዉሼ፤ ደርያ ካለያዋንቱ ዎልቃካ ዉርሴ።

22 "ማን ደእያ ጹራ የዎቱዋ ቆንጭሴ፤ ጵ ጎ ማ ሳኣካ ፖኦ ከሴ። 23 ጾሳይ ካዉተቱዋ ቂሴ፤ ቃይ ጾኔ። ካዉተካ አሴ፤ ቃይ ይሴ። 24 ሳኣ አሳ ካፓቱዋ አኬካ ድጊደ፥ ኦጊ ባይና መላ ሳኣን ቶይላካታናዳን ኦ። 25 ፖኡ ባይና ማን ኡንቱንቱ ታታፊኖ፤ ማቴዳ አሳቱዋዳን ኡንቱንቱ ጋንድጋሪኖ።