1 መና ጎዳይ ሀዋዳን ያጌ፤ "ህንተ ኡንቱንቶ ጎይናናዉ ኤቃቱዋ መፕተ፤ ቃይ ሀዉልትያ፥ ማሰቴዳ ምስልያ ዎይ ማሰቴዳ ሹቻ ኤሶፕተ። ታን፥ መና ጎዳይ፥ ህንተ ጾሳ። 2 ታ ሳምባታቱዋ ናግተ፤ ታ ዱንካንያ ቦንችተ፤ ታን መና ጎዳ።

3 "ህንተ ታ ህግያን ቦፐ፥ ታ አዛዞቱዋካ ናጎፐነ ኦፐ፥✝ 4 ታን ህንተንቶ እራ ዎድያን ቡክሳና፤ ቢታይካ ካ ዳርሲደ ሞካና፤ ደምባ ምቱካ አይፍያ አይፋና። 5 ህንተ ካ ቡክያ ዎድያፐ ቢደ ዎይንያ አይፍያ ማጽያ ዎዲ ጋካናዉ ካ ቆጻና፤ ቃይ ዎይንያ አይፍያ ማጹካ ቢደ ካ ዘርያ ዎዲ ጋካናዉ ዉረና። ህንተ ካላና ጋካናዉ ቁማ ማና፤ ቃይ ህንተ ህንተ ቢታንካ ሳሩዋን ደአና።

6 "ታን ቢታዉ ሳሮተ እማና፤ ኦንነ ያሽሰናን ህንተ ግሳና። ኢታ ዶአቱዋ ታን ጋድያፐ ይሳና፤ ህንተ ጋድያን ላኤን ኦላይ ደንደና። 7 ህንተ ሞርከቱዋ ህንተ የደርሳና፤ ህንተ ስንን ኡንቱንቱ ማሻን ሀይቃና። 8 ህንተፐ እቼሹ ጼቱዋ የደርሳና፤ ቃይ ጼቱ ታሙ ሻኣ የደርሳና። ህንተ ሞርከቱ ህንተ ስንን ማሻን ሀይቃና።

9 "ታን ታ ዴሙዋ ህንተኮ ዛራና፤ ህንተና አይፍሳና፤ ህንተና ዳርሳና። ቃይ ታን ታ ጫቁዋ ህንተናና ምንሳና። 10 ህንተ ሻቻ ካ ማና፤ ቃይ ሀ ላይ ካ ዎናዉ፥ ሻቻ ካ ድጊደ ሳኣ ከሳና። 11 ታን ታ ደእያ ሳኣ ህንተ ግዶን ኦና፤ ታን ህንተና ሻትከ። 12 ታን ህንተ ግዱዋን ሀመታና፤ ቃይ ህንተ ጾሳ ግዳና፤ ህንተካ ታ አሳ ግዳንታ።✝ 13 ህንተ ግብጼቶ አይልያ ግደናዳን፥ ግብጼ ጋድያፐ ህንተና ከሴዳዌ ታን መና ጎዳይ ህንተ ጾሳ። ታን ህንተ አይለተ ሞርገ ም መንድ፤ ቃይ ህንተካ ቁ ጊደ ሄመታናዳን ኦድ።

14 "ሽን ህንተ ታን ግያዋ ስሰናን እጾፐነ፥ ሀ አዛዞቱዋ ኡባካ ኦናን እጾፐ፥ 15 ታ ዎጋ ህንተ ካኦፐ፥ ቃይ ታ አዛዞቱዋ ኡባ ኦናን እጺደ ታ ጫቁዋ መንናዉ ህንተ ታ ህግያ ሻቶፐ፥ 16 ሄ ዎደ ታን ህንተ ቦላ ሀዋ ኦና: ህንተ አኬከናን ደእሽን ያሻ፥ ግልቃተ፥ ህንተ አይፍያ ጆልስያነ ህንተና ሎይ ሀርግስያ ምሹዋ ህንተ ቦላ አሀና። ህንተ ዘረ ዘራና፤ ሽን እ ሀዳ፤ አያዉ ጎፐ፥ ሄዋ ህንተ ሞርከቱ ማና። 17 ታን ታ ሶምኡዋ ህንተ ቦላ ቱካና፤ ህንተ ሞርከቱዋ ስንን ህንተ ኩንዳና፤ ህንተና እጺያዋንቱ ህንተና ሞዳና፤ ቃይ ኦንነ የደርሰናን ህንተ ባቃታና።

18 "ሀዋ ኡባ ኦናካ ህንተ ታና ስሰናን እጾፐ፥ ታን ህንተ ናጋራ ድራዉ ህንተ ሙራ ላፑን ዳኩዋ ጉጃና። 19 ህንተ ዎልቃ ኦቶሩዋ ታን መንና፤ ሳሉዋ ብራታ ማላ ኦና፤ ህንተ ቢታካ ናሃስያ ግያ ብራታ ማላ ኦና። 20 ህንተ ዎልቃይ ሀዳሳን ዉራና፤ አያዉ ጎፐ፥ ህንተ ቢታይ ካ ሞከና፤ ጋድያን ደእያ ምቱካ አይፍያ አይፍክኖ።

21 "ህንተ ታዉ እጼዶ ጎፐነ ታን ግያዋካ ስሰናን እጾፐ፥ ህንተ ናጋራ ኬሻ ላፑን ዳኩዋ ቦሻ ታን ህንተ ቦላን አሀና። 22 ታን ህንተ ቦላ ባዙዋ ዶአቱዋ የዳና፤ ኡንቱንቱ ህንተ ናናቱዋ ቦንቃና፤ ህንተ መሄቱዋ ይሳና፤ ህንተ ፓይዱዋካ ጉና፤ ሄዋ ጋሱዋን ህንተ ሀመትያ ኦጊ ባዙዋ ግዳናዋ።

23 "ሀ ኡባ ሙራንካ ህንተ ታኮ ስመናን እጻድ ጊደ ቦፐ፥ 24 ሄ ዎደ ታንካ ህንተንቶ እጻድ ጋና፤ ቃይ ህንተ ናጋራ ድራዉ ታን ታ ሁጲያዉ ህንተና ላፑን ዳኩዋ ሙራና። 25 ታ ጫቁዋ መንዳ ሀሉዋ ከስያ ማሻ ታን ህንተ ቦላ አሀና፤ ህንተ ህንተ ካታማቱዋን ሺቆፐካ፥ ታን ህንተ ቦላን ኢታ ሀርግያ የዳና። ቃይ ህንተካ ህንተ ሞርከቱዋ ኩሽያን አደ እመታና። 26 ህንተ ካ ታን ይስያ ዎደ፥ ታሙ ማጫ አሳቱ እት ባሽያን ኡክ ኡካና፤ ሄዋካ ሚዛናን ልኪደ ሻካና፤ ህንተ ሄዋ ማና፥ ሽን ካልክታ።

27 "ሀ ኡባንካ ህንተ ታን ግያዋ ስሰናን እጻድ ጊደ ቦፐ፥ 28 ሄ ዎደ ታንካ ህንተ ቦላ ሀንቁዋን ደንዳና፤ ህንተ ናጋራ ድራዉ ታን ታ ሁጲያዉ ህንተና ላፑን ዳኩዋ ሙራን። 29 ህንተ ህንተ አቱማ ናናቱዋነ ህንተ ማጫ ናናቱዋ አሹዋ ማና። 30 ህንተ ጎይንያ ቃ ሳኣ ታን ኮላና፤ ህንተ እጻና ያርሽያ ሳኣካ ይሳና። ታን ህንተ አሃ ህንተ ኤቃቱዋ አሃ ቦላን ኦላና፤ ታን ህንተና ሙለ ሻታና። 31 ታን ህንተ ካታማቱዋ መላ ኦና፤ ህንተ ጎይንያ ሳአቱዋካ ኮለሬና፤ ህንተ ሳዊያ ያርሹዋካ ስንግከ።

32 "ታን ህንተ ቢታ ይሳና፤ ያቶፐ ሄ ህንተ ጋድያን ዪደ ኡትያ ሞርከቱካ ሄዋን ማላለታና። 33 ታን ህንተና ካዉተቱዋ ግዶን ላላና፤ ህንተ ቦላንካ ታ ማሻ ሾዳና። ህንተ ቢታይ ባያና፤ ህንተ ካታማቱካ መላ ግዳና። 34 ሄ ህንተ ህንተ ሞርከቱዋ ጋድያን ደእያ ዎደ፥ ባዪደ ጮ ደእያ ህንተ ቢታይ ባረ ሳምባታቱዋ ቦንቺደ ናሸታና። ሄ ዎደ ህንተ ቢታይ ሸምፓናነ ባረ ሳምባታቱዋ ቦንቺደ ናሸታና። 35 ህንተ ሄ ጋድያን ደኤዳ ዎድያን ኡባን ህንተ ሳምባታቱዋን ደምቤና ሸምፑዋ ሀእ ባዪደ ጮ ደእያ ዎድያን ደማና።

36 "ህንተ ህንተ ሞርከቱዋ ጋድያን ደእያ ዎደ፥ ህንተፐ ሻከቲደ ጉየ አቲደ ደእያዋንቱ ዎዛናን ታን ያሻ የዳና፤ ጫርኩ ቃያ ቦንጭያ ኮሻይ ኡንቱንታ ሻቢራና፤ ኡንቱንቱ ማሻፐ ባቃትያዋዳን ባቃታና፤ ቃይ ኡንቱንቱ ኦንነ የደርሰናን ኩንዳና። 37 ህንተና የደርስያዌ ባይናን ደእሽን፥ ህንተ ኦላፐ ባቃትያዋዳን እቱ እቱዋና በታና፤ ቃይ ህንተ ህንተ ሞርከቱዋ ስንን ኤቃናዉካ ህንተንቶ አያ ዎልቂነ ደኤና። 38 ህንተ ካዉተቱዋ ግዶን ባያና፤ ህንተ ሞርከቱዋ ቢታይካ ህንተና ምታና። 39 ህንተፐ ሻከቲደ ህንተ ሞርከቱዋ ጋድያን አቴዳዋንቱ ባረንቱ ናጋራ ጋሱዋንነ ባረንቱ አዎቱዋ ናጋራ ጋሱዋን ግልቃና።

40 "ሽን ኡንቱንቱ ታን ኡንቱንቶ እጼዳ ጋናዳንነ ኡንቱንቱ ሞርከቱዋ ቢታዉ ኡንቱንታ የዳናዳን ኦዳ ባረንቱ ናጋራ፥ ባረንቱ ማይዛ አዎቱዋ ናጋራ፥ ኡንቱንቱ ታና ጭሜዳ ጭሙዋነ ኡንቱንቱ ታዉ እጻድ ጌዳዋ ፓጾፐ፥ 41 ሄዋን ቃይ ኡንቱንቱ አዛዘተና ዎዛናይካ ዝቂ ጎፐነ ኡንቱንቱ ባረንቱ ናጋራ ሙራ አኮፐ፥ 42 ሄ ዎደ ታን ያቆባና ጫቀቴዳ ታ ጫቁዋ ሀሳያና፤ ቃይ ይሳቃናነ አብራሃመና ጫቀቴዳ ታ ጫቁዋ ሀሳያና፤ ቢታካ ሀሳያና።✝ 43 ኡንቱንቱ ይ ድግና፥ ኡንቱንቱ ቢታይ መላ አታና፤ ሄ ኡንቱንቱ ይና ባይያዋ ግዲደ ጮ ደእያ ዎድያን ቢታይ ባረ ሳምባታቱዋ ቦንቺደ ናሸታና። ኡንቱንቱ ታ አዛዙዋ ካዳ ድራዉነ ኡንቱንቱ ሸምፑካ ታ ዎጋ ሻቴዳ ድራዉ፥ ኡንቱንቱ ባረንቱ ናጋራ ሙራ አካና።

44 "ግዶፐነ ኡንቱንቱ ባረንቱ ሞርከቱዋ ጋድያን ደእያ ዎደ፥ ኡንቱንቱ ኡባና ያና ጋካናዉነ ኡንቱንቱና ደእያ ታ ጫቁዋካ መንና ጋካናዉ፥ ታን ኡንቱንታ ኦልከ፤ ቃይ ሻትከ። ታን፥ መና ጎዳይ፥ ኡንቱንቱ ጾሳ። 45 ታን ኡንቱንቱ ጾሳ ግዳናዉ፥ ካዉተቱ ጼልሽን፥ ግብጼ ጋድያፐ ከሴዳ ኡንቱንቱ ማይዛ አዎቱዋና ታን ጫቀቴዳ ጫቁዋ ኡንቱንቱ ድራዉ ሀሳያና። ታን መና ጎዳ።

46 "መና ጎዳይ ሲና ደርያ ቦላን ሙሴ ባጋና ባረፐነ እስራኤልያ አሳፐ ግዱዋን ዎዳ ዎጋቱ፥ አዛዞቱነ ህገቱ ሀዋንታ" ያጌዳ።