1 እያርኮ ሄፍንና፥ ዮርዳኖሳ ሻፋ ማታን ደእያ ሞኣባ ደምባን፥ መና ጎዳይ ሙሳ ሀዋዳን ያጌዳ፤✝ 2 "እስራኤላቱ ባረንቱ ላታፐ ሌዋቱዋ ደአና ካታማቱዋነ ኡንቱንቱ ዩሹዋን ደእያ ሄን ጋደቱዋ እማና ማላ፥ ኔን ኡንቱንታ አዛዛ። 3 ሄ ካታማቱዋን ኡንቱንቱ ደእኖ፤ ሄን ጋደቱ ኡንቱንቱ ሚዛሳ፥ ኡንቱንቱ ዶርሳሳነ ኡንቱንቱ ሀራ መህያ ኡባሳ ግድኖ። 4 ህንተ ሌዋቶ እማና ካታማ ዩሹዋን ደእያ ሄን ጋደቱ ካታማ ግምቢያ ድርሳፐ ካረኮ እት ሻአ ዋ ግድኖ። 5 ካታማፐ ካረና፥ አዋይ ዶልያ ባጋና ላኡ ሻአ ዋ፥ ገድሳ ባጋና ላኡ ሻአ ዋ፥ አዋይ ዉልያ ባጋና ላኡ ሻአ ዋነ ሁጲሳ ባጋና ላኡ ሻአ ዋ ልክተ፤ ያቶፐ ካታማይ ግዶ ልክያን ደአና። ሌዋቱ ሄ ሄራ ባረንቱ ካታማዉ ሄን ጋደ ኦኖ።

6 "ሌዋቶ ህንተ እማና ካታማቱ፥ አሳ ዎዳ ኡራይ ባቃቲደ አትያ ኡሱፑን ካታማቱዋ፤ ሄዋንቱ ቦላ ጉጂደ፥ ኦይታማነ ላኡ ሀራ ካታማቱዋ ኡንቱንቶ እምተ። 7 ሌዋቶ ህንተ ኡባና ኦይታማነ ሆስፑን ካታማቱዋ ኡንቱንቱ ሄን ጋደቱዋና እትፐ እምተ። 8 እስራኤላቱዋ ላታፐ ሌዋቶ ህንተ እማና ካታማቱ እት እት ዛሪ ላቴዳዋ ኬሻ ግዳናዉ ኮሼ፤ ጮራ አሳይ ደእያ ዛርያፐ ጮራ ካታማቱዋ አኪተ፤ ሽን ፓይዱዋን ጉ አሳይ ደእያ ዛርያፐ ጉ ካታማቱዋ አኪተ" ያጌዳ።

9 ሄዋፐ ጉይያን፥ መና ጎዳይ ሙሳ ሀዋዳን ያጌዳ፤ 10 "ኔን እስራኤልያ አሳ ሀዋዳን ያጋ፤ ‘ዮርዳኖሳ ሻፋ ፕኒደ፥ ካናነ ቢታ ህንተ ገልያ ዎደ፥ 11 ኤረናን አሳ ዎዳ ኡራይ ባቃት ቢደ አታና ማላ፥ ካታማቱዋ ህንተንቶ ዶርተ። 12 ኤረናን አሳ ዎዳዌ ሺቁዋ ስን ሙራናዉ ኤቃና ጋካናዉ፥ ሱ አችያዌ አ ዎና ማላ፥ ሄ ካታማቱ ባቃት አትያሳ ግድኖ። 13 ሀ ህንተ እምያ ኡሱፑን ካታማቱ ህንተንቶ ባቃት አትያ ካታማቱዋ ግድኖ። 14 ዮርዳኖሳ ሻፋፐ ሀፍን ባጋና ሄዙ ካታማነ ካናነ ጋድያን ሄዙ ካታማቱዋ ህንተ ባቃት አታናዉ እምተ። 15 ሀ ኡሱፑን ካታማቱ ኤረናን አሳ ዎዳ እስራኤላቱ፥ ሀራ ጋደ አሳቱነ ኡንቱንቱ ግዶን ደእያ በተቱ ባቃቲደ አትያሳ ግድኖ።

16 " ‘እት አሳይ እት አሳ ብራታ ሚሻን ሾጭና፥ ሄ ኡራይ ሀይቆፐ፥ ሄዌ ሸምፑዋ ዎዳዋ፤ ሸምፑዋ ዎዳዌ ሀይቆ። 17 ቃይ ዎና ዳንዳይያ ሹቻ ባረ ኩሽያን ኦይቄዳ አሳይ እት አሳ ሄ ሹቻን ጫድና፥ ሄ ኡራይ ሀይቆፐ፥ ሄዌ ሸምፑዋ ዎዳዋ፤ ሸምፑዋ ዎዳዌ ሀይቆ። 18 ቃይካ ዎና ዳንዳይያ ም ባረ ኩሽያን ኦይቄዳ አሳይ እት አሳ ሄ ምን ሾጭና፥ ሄ ኡራይ ሀይቆፐ፥ ሄዌ ሸምፑዋ ዎዳዋ፤ ሸምፑዋ ዎዳዌ ሀይቆ። 19 ሱ አችያዌ ሄ ሸምፑዋ ዎዳዋ ደሞፐ ዎ።

20 " ‘እት አሳይ እት አሳ ሞርኪደ ጫድና፥ ዎይ ዙጊድ እትባ አ ቦላ ኦልና፥ ሄ ኡራይ ሀይቆፐ፥ 21 ዎይ ሞርኪደ ባረ ኩሽያን ቦክስና፥ ሄ ኡራይ ሀይቆፐ፥ እ ሸምፑዋ ዎዳዋ፤ ሸምፑዋ ዎዳዌ ሀይቆ። ሱ አችያዌ ሸምፑዋ ዎዳዋ ደሞፐ ዎ።

22 " ‘ሽን ሞርከተይ ባይናን፥ እት አሳይ እት አሳ አኬከናን ሱጎፐ፥ ዎይ ዙጊድ ናገናን እትባ አ ቦላ ኦሎፐ፥ 23 ዎይ አ ዎና ዳንዳይያ ሹቻ እ በኤናን አ ቦላ የጎፐነ ሄ ኡራይ ሀይቆፐ፥ ሄዌ አ ሞርከ ግደና ድራዉነ አ ቆሀናዉ ሀልችቤና ድራዉ፥ 24 ያአይ ኤረናን ዎዳዋፐነ ሱ አችያዋፐ ግዱዋን ሀ ዎጋቱዋዳን ፕርዶ። 25 ኤረናን ዎዳዋ ሱ አችያዋ ኩሽያፐ ያአይ አሺደ፥ እ ባቃቲደ አትያ ካታማ ዛሮ። ጌሻ ዛይትያን ኦከቲደ፥ ቄሲ ኡባቱ ካፑ ሀይቃና ጋካናዉ፥ እ ያን ደኦ።

26 " ‘ሽን ኤረናን ዎዳዌ ባቃቲደ አትያ ካታማ ዛዋፐ ካረ ከስያዋ ግዶፐነ፥ 27 ባቃት አትያ ካታማፐ ካረና ሱ አችያዌ አ ደሚደ ዎፐ፥ እ ዎዳዎ ኦሸተና። 28 አያዉ ጎፐ፥ ቄሲ ኡባቱ ካፑ ሀይቃና ጋካናዉ፥ ሄ ኤረናን ዎዳዌ ባረ ባቃቴዳ ካታማን ኡታናዋሽን አጌዳ። ሽን ቄሰ ኡባቱ ካፑ ሀይቄዳዋፐ ጉይያን፥ ኤረናን ዎዳዌ ባረ ላታ ጋደ ስማናዉ ዳንዳዬ።

29 " ‘ህንተዉነ ብሮ የለታና የለታዉ፥ ህንተ ደኢያሳ ኡባን ሀዌ ህገ ግዶ።

30 " ‘አሳ ዎዳ ኦንነ ሸምፑዋ እ ዎዳዋዳን ማርካቱ ማርካትና ሀይቆ፤ ሽን እት አሳ ጻላላይ ማርካትና፥ አይ አሳይነ ሀይቆፖ።✝ 31 ሸምፑዋ ዎዳ ድራዉ ሀይቃናዉ በስያ አሳ ፓጻ አሻናዉ አጫ አኮፕተ፤ እ ሀይቆ። 32 አትያ ካታማ ባቃቴዳ ኦፐነ ቄሰ ኡባቱ ካፑ ሀይቃናፐ ካሰ፥ እ ጉየ ስሚደ፥ ባረ ጋድያን ደአናዳን ኦናዉ አጫ አኮፕተ።

33 " ‘ሄዋዳን ኦደ፥ ህንተ ደእያ ቢታ ቱንሶፕተ። አያዉ ጎፐ፥ ሱ ጉስያዌ ቢታ ቱንሴ፤ ሱ ጉሴዳዋ ሱናፐ አትና፥ ቢታ አቶ ጊሳናዉ ሀራ ኦግያን ዳንዳየተና 34 ታን፥ መና ጎዳይ፥ እስራኤልያ አሳ ግዱዋን ደእያ ድራዉ፥ ህንተ ደእያ ቢታ፥ ታንካ ደእያ ቢታ ቱንሶፕተ’ ያጋደ ኦዳ" ያጌዳ።