ኢስያሳ 3

የሩሳላመ ጋካና መቱዋ

1 በእተ፥ ጎዳይ፥ ኡባፐ ዎልቃማ መና ጎዳይ ምንጃነ ማዱዋ ላኡዋካ የሩሳላመፐነ ይሁዳፐ ድጋና ሀኔ። ካ ምንጃነ ሃ ምንጃ ኡባ፤ 2 ምኖቱዋነ ኦላንቻቱዋ፥ ዳናቱዋነ ትምቢትያ ኦድያዋንታ፥ ካይያዋንታነ ጭማቱዋ፥ 3 ኦላ ጋዳዋቱዋነ ጋድያ አይስያዋንታ፥ ዞርያዋንታ፥ ሂላትያዋንታነ ጭንጫ ብታንቻቱዋ ኡባ ድጋና ሀኔ።

4 ታን ያላጋ አቱማ ናናቱዋ ኡንቱንቱ ካፑዋ ከሳና፤ ጉ ናናይ ኡንቱንታ ሞዳና። 5 አሳይ አሳ ቦላ፥ ሾሩ ሾሩዋ ቦላ ደንዲደ፥ እቱ እቱዋ ሱጋና። ያላጋይ ጭማ ቦላ፥ ካቴዳዌ ቦንቼቴዳዋ ቦላ ደንዳና።

6 እት አሳይ ባረ አዉዋ ጎልያን ባረ እሻቱዋፐ እቱዋ ኦይቂደ፥ "ነዉ ማዩ ደኤ፤ ኔን ኑዉ ሱን ግዳ፤ ሀ ኮለቴዳ ሳኣ አዎተ አካ" ያጋና።

7 እ ሄ ጋላስ ባረ ቃላ ቂሲደ፥ "ታናን ሊ ባዋ፤ ታ ሶን ቁም ዎይ ማዩ ባዋ፤ ህንተ ቦላ ታና ሱንፕተ" ያጋና።

8 የሩሳላመ ጋንድጋሬ፤ ይሁዳይ ኩንዴ፤ አያዉ ጎፐ፥ ኡንቱንቱ ባረንቱ ኦዱዋንነ ባረንቱ ኦሱዋን መና ጎዳ ቦላ ደንዲደ፥ አ ቦንቹዋ ቶቺኖ። 9 ኡንቱንቱ ሶምኡዋ ማላይ ኡንቱንቱ ቦላ ማርካቴ፤ ኡንቱንቱ ባረንቱ ናጋራ ሶዶማ አሳዳን አዋዪኖ፤ ባረንቱ ናጋራ ቆስክኖ። ኡንቱንቶ አየ አና! አያዉ ጎፐ፥ ኡንቱንቱ ባረንቱ ቦላ ኢታባ አሄድኖ።

10 ጽሎቶ፥ "ህንተዉ ሎአ ግዳናዋ" ጋደ ኦዳ፤ አያዉ ጎፐ፥ ኡንቱንቱ ባረንቱ ኦሱዋ አይፍያ ማና። 11 ኢታቶ አየ አና! ኡንቱንቶ ኢታና፤ አያዉ ጎፐ፥ ኡንቱንቱ ባረንቱ ኩሽያ ኦሱዋ ጋትያ አካና። 12 ያላጋቱ ታ አሳ ኡንኤኖ፤ ማጫ አሳቱካ ኡንቱንታ ሞዲኖ። ታ አሳዉ፥ ህንተና ካለያዋንቱ ህንተና ዎራ ካለኖ፤ ህንተ ብያ ኦግያካ ባለኖ።

ጾሳይ ባረ አሳ ፕርዳና

13 መና ጎዳይ ዳናዳን፥ ችሎታን ኡቴ፤ አሳ ፕርዳናዉ ደንዴ። 14 አሳ ጭማቱዋነ ካለያዋንታ ፕርዳናዉ ሺሺደ፥ መና ጎዳይ፥ ኡባፐ ዎልቃማ መና ጎዳይ ሀዋዳን ያጌ፤ "ታ ዎይንያ ቱራ ቶኬዳሳ ባይዜዳዋንቱ ህንተና፤ ህዬሳቱዋፐ ቦንቄዳባይ ህንተ ጎልያን ደኤ። 15 ታ አሳ አያዉ ክንቼረቴ? ህዬሳቱዋ ሶምኡዋ አያዉ ጋጪቴ?" ያጌ ጎዳይ፥ ኡባፐ ዎልቃማ መና ጎዳይ።

ጾሳይ ጽዮነ ማጫ አሳቱዋ ሴሬዳ

16 መና ጎዳይ ቃይካ፥ "ጽዮነ ማጫ አሳቱ ኦቶረቴድኖ፤ ባረንቱ ዚዝያ ኤስ አኪደ፥ ባረንቱ አይፍያን ስምኤቲደ፥ ባረንቱ ሀመ ማክሲደ፥ ባረንቱ ገድያ አልቡዋ ጊርሲደ ሀመቲኖ። 17 ሄዋ ድራዉ፥ ታን ጎዳይ ጽዮነ ማጫ አሳቱዋ ሁጲያ ጭቱዋን ጎእሳና። ታን መና ጎዳይ ኡንቱንቱ ሁጲያ ቦአያና" ያጌ።

18 ሄ ጋላስ ጎዳይ ጽዮነ ማጫ አሳቱዋ አሌቆቱዋ፥ ሄዋንቱነ ኡንቱንቱ ገድያ አልቡዋ፥ ሻሽያ፥ ቆያ አሌቁዋ፥ 19 ሀይ ጉትቻ፥ ኩሽያ ሳጋዩዋ፥ ሶምኡዋ ካምያ ኩታ፥ 20 ሁጲያን ዎያ አሌቁዋ፥ ቀስያን ቃችያ ሳንሳላታ፥ ጼሳን ዳንጭያ ዳንጩዋ፥ ሽቱዋ ጻራሙስያ፥ ክታፋ፥ 21 ሲያ ምግዱዋ፥ ብራያነ 22 ምንጃ ማዩዋ፥ አዱሳ ማዩዋ፥ ጃኑዋ፥ ቦርሳ፥ 23 ሄረጋ፥ ሊኑዋ ግያ ቃጭናፐ ዳደቴዳ፥ ግዶና ማይያ ማዩዋ፥ ብናናን ዎያ አሌቁዋነ ሻርቢያ ኡባ ቦንቃ አካና።

24 ሽቱዋ ድራዉ ጽንቁዋ ግዳናዋ፤ ዳንጩዋ ድራዉ ዎዶሩዋ፥ ጎፋርያ ድራዉ ቦኣ፥ አዱሳ ማዩዋ ድራዉ ዋሩዋ፥ ፑላ ድራዉ ባቂያ ጻላላ ግዳናዋ።

25 ነ አሳቱ ማሻን፥ ነ ኦላንቻቱ ኦላን ሀይቃና። 26 ጽዮነ ፐንገቱዋን ደእያ አሳይ ዬካናነ ዝላላና፤ መላ አቴዳ፥ ጋድያን ኡታና።