ኢስያሳ 60

የሩሳላመ ስን ቦንቾ ህዶታ

1 ጾሳይ ሀዋዳን ያጌ፡ "ደንዳ! ደንዳደ ፖእሳ፤ አያዉ ጎፐ፥ ነ ፖኡ ዬዳ። መና ጎዳ ቦንቹካ ነ ቦላን ፖኤዳ። 2 በአ፥ ማይ ሳኣ ካማና፤ ባራ ማይካ አሳ ቦላን ዎና። ሽን መና ጎዳይ ነ ቦላ ደንዳና፤ አ ቦንቹካ ነ ቦላ ፖአና። 3 ካዉተቱ ነ ፖኡዋኮ፥ ካተቱካ ነ ዎንታ ዋጃጃኮ ያና።

4 "ቁ ጋደ ነ ዩሹዋ ጼላ። ኡንቱንቱ ኡባይ እትፐ ሺቂደ፥ ኔኮ ያና። ነ አቱማ ናናይ ሃኩዋፐ ያና፤ ነ ማጫ ናናይካ ባኤቲደ፥ ኔኮ ያና። 5 ሄ ዎደ ኔን በኣደ ናሸታና፤ ነ ዎዛናይካ ሎይ ፖጩ ጋና። አያዉ ጎፐ፥ አባ ቦላን ደእያ ግዳይ ኔኮ ስማና፤ ካዉተቱዋ ዱረተይካ ኔኮ ያና። 6 ምድያማ ቢታፐነ ኤፋ ጋድያፐ ዬዳ ያላጋ ጋሎቱዋ ዉዲ ነ ቢታ ካማና። ቃይ ዎርቃነ እጻና ጫነቴዳ ጋሎቱ መና ጎዳ ጋላታ አዋዪደ፥ ሳባፐ ያና። 7 ቄዳረነ ናባዮታ ዶርሳ ዉደቱ ኡባይ ያርሾ ታ ያርሹዋ ሳኣ ኔኮ ሺቃና፤ ቃይ ታንካ ታ ቦንቾ ጌሻ ጎልያ ቦንቻና።

8 "ሀ ሻርያዳንነ ባረንቱ ጎልያኮ ፓልያ ሀራጰቱዋዳን ፓልያዋንቱ ኦኔ? 9 ሀዋንቱ ሃን ዶደቴዳ ቢታቱ ታናን ህዶታ ኦና። እስራኤልያ ጌሻይ መና ጎዳይ ህንተ ጾሳይ ህንተና ቦንቼዳ ድራዉ፥ ተርሴሰ ማርካባቱ ስንት ከሲደ ነ ናናቱዋ ሃኮ ቢታፐ ኡንቱንቱ ብራናነ ዎርቃና ጾሳ ቦንቾ አሀና።

10 "አላጋ ጋድያ አሳይ ነ ድርሳ ግምባና፤ ኡንቱንቱ ካተቱ ነዉ ኦና። ኔና ታን ታ ሀንቁዋን ካሰ ሾጬዳዋ ግዶፐካ፥ ሀእ ታ ቃረታን ታን ኔና ማራድ። 11 ነ ፐንገቱ ኡባ ገደ ዶያ ደአና።✝60:11 ሳፃ 21:25-26 ካዉተቱዋ ዱረተነ ኦሞደቴዳ ካተቱዋ ኔኮ አሀና ማላ፥ ጋላስካ ቃማካ ጎርደትክኖ። 12 ነዉ ኦና አሳይ ዎይ ካዉተይ ኡባይ ኡባና ያና። 13 ታ ጌሻ ጎልያ ሳኣ ሎይና ማላ፥ ሊባኖሳ ቦንቹ፥ ዝጋይ፥ ጺዳይነ ጻይይ ኔኮ ያና፤ ታን ታ ገድያ ዎያ ሳኣ ቦንቻና። 14 ኔና ኡቁኔዳዋንቱ አቱማ ናናይ ነዉ ሆኪደ፥ ኔኮ ያና፤✝60:14 ሳፃ 3:9 ኔና ካዳ ኡባቱ ነ ስንን ጎይናና። ኡንቱንቱ ኔና፥ ‘መና ጎዳ ካታማቴ ጽዮኔ፥ እስራኤልያ ጌሻ ካታማቴ’ ያጊደ ጼሳና።

15 "ኦንነ ነ ግዶና አናዋ ኬና ኔን ካሰ ኦለታዳነ እጸታዳ። ሽን ሀእ ታን ኔና መናዉ ዎልቃማ ኦና፤ ቃይ የለታ ኡባይ ናሸትያ ሳ ኦና። 16 ኔን ካዉተቱዋ ማ ኡሻና፤ ካተቱ ንካ ማና። ሄዋፐ ጉይያን፥ ታን መና ጎዳይ ኔና አሽያዋ፤ ዎዝያዋነ፥ ያቆባ ዎልቃማ ግድያዋ ኔን ኤራና። 17 ናሃስያ ድራዉ ዎርቃ፥ ብራታ ድራካ ብራ፥ ም ድራዉ ናሃስያ፥ ሹቻ ድራዉ ብራታ ታን ነዉ አሀና። ታን ኔና ሞድያዋንታ ሳሮ፥ ነ ካፖቱዋካ ጽሉዋ ኦና። 18 ሀዋፐ ጉይያን፥ ሱገ ኦሱ ነ ጋድያን ስሰተና፤ ነ ዛዋንካ ላለይነ ባሻይ ስሰተና። ኔን ነ ድርሳ ግምቢያ፥ ‘አቶተ’ ነ ፐንገቱዋካ፥ ‘ጋላታ’ ያጋደ ጼሳና።

19 "ሄዋፐ ጉይያን፥ ጋላስ ነዉ አዋ ፖኡዋ ኮሸና፤✝60:19 ሳፃ 21:23፤ 22:5 ቃማካ አግና ፖኡዋ ኮሸና። አያዉ ጎፐ፥ መና ጎዳይ ነዉ መና ፖኦ ግዳናዋ፤ ነ ጾሳይ ነዉ ቦንቾ ግዳናዋ። 20 ነ አዋይ ላኤን ዉለና፤ ነ አግናይካ ፖእያዋ አገና። አያዉ ጎፐ፥ መና ጎዳይ ነዉ መና ፖኦ ግዳናዋ፤ ኔን ዬኬዳ ጋላሳቱካ ዉራና። 21 ነ አሳይ ኡባይ ጽሉዋ ግዳናዋ፤ ኡንቱንቱ ቢታቶካ መናዉ ላታና። ኡንቱንቱ ታን ታ ቦንቹዋ ቆንጭሳናዉ ቶኬዳ ፑተቱዋ፤ ኡንቱንቱ ታ ኩሽያ ኦሶቱዋ። 22 ህንተ ግዶን እት ጎልያን ደእያ ፓይዱዋን ጉ አሳቱዋ ታን ሻእሳና፤ ኡባፐ ፓይዱዋን ጉጽያዋንታካ ዎልቃማ ካዉተ ኦና። ታን መና ጎዳ፤ ዎዲ ጋክያ ዎደ፥ ታን ሀዋ ኤለካ ፖላና" ያጌ።