ኢስያሳ 41

እስራኤልያዉ ጾሳ ማዱዋ

1 ጾሳይ ሀዋዳን ያጌ፤ "ህንተኖ አባ ዶናን ደእያ ቢታቶ፥ ጮኡ ጊደ፥ ታን ኦድያዋ ስስተ! አሳይ ባረንቱ ምኖተ ኦራጽስኖ፤ ኡንቱንቱ ሃ ሺቂደ ሃሳዪኖ። አነ ኑን ፕርደታናዉ እትፐ ሺቆይተ።

2 "ብያሳ ኡባን ጾንያ እቱዋ አዋይ ዶልያ ባጋፐ ደንዳዌ ኦኔ? እ ካዉተቱዋ አ ስንን አደ እሜ፤ ያትና፥ እ ካተቱዋ ገድያፐ ጋርሳና የ። እ ኡንቱንታ ባረ ማሻን ባናዳን ኦ፤ ቃይ ባረ ዎንዳፍያን ሱላዳን ኦ። 3 እ ኡንቱንታ የደርሲደ፥ አ ገዲ ካሰ የቤና ኦግያናካ ሳሮ አ። 4 ሀዋ ኦዳዌነ ፖሌዳዌ ቃይ የለታቱዋካ ኮይሮፐ ጼሴዳዌ ኦኔ? ታን መና ጎዳይ፥ ኮይሩ፥ ዉርሰዋንቱናካ ደእያዌ፥ ታን አ" ያጌ። 5 አባ ዶናን ደእያ ቢታቱ በኢደ ያዬድኖ፤ ሳኣ ጋጻቱካ ኮኮሬድኖ። ኡንቱንቱ እትፐ ሺቂደ፥ ታኮ ዬድኖ። 6 አሳ ኡባይ ባረ ሾሩዋ ሾሩዋ ማዴ፤ ቃይ ባረ እሻ፥ "ምና" ያጌ። 7 ኩሽያ ሂላንቻይ ዎርቃ ትግያዋ ምን፤ ማዶሻን ሌእስያዌ ባቻን ብራታ ሴርስያዋ፥ "ምና" ያጌ። እ ብራታ እትፐ ጋያዋ፥ "ሀዌ ሎአ" ያጌ፤ ቃይ ሄ ኤቃይ ቃጸናዳን፥ ኡንቱንቱ ምስማርያን ጊኖ።

8 ጾሳይ ሀዋዳን ያጌ፥ "ሽን ነኖ እስራኤልያዉ፥ ታ ቆማዉ፥✝41:8 2 ኦዱዋ 20:7፤ ያቆባ 2:23 ታን ዶሬዳ ያቆባ፥ ታ ዳቡዋ አብራሃማ ዛርያዉ፥ 9 ታን ኔና ቢታ ጋጻፐ አካደ፥ ቃይ ዉርሰ ሃኮ ሳፐ ጼሳደ፥ ‘ኔን ታ ቆማ’ ያጌዳዎ፥ ታን ኔና ዶራድ፤ ቃይ ታን ኔና ኦልከ። 10 ታን ኔናና ደእያ ድራዉ ያዮፓ፤ ታን ነ ጾሳ ግድያ ድራዉ ዳጋሞፓ። ታን ኔና ምንሳና፤ ቃይ ታን ኔና ማዳና። ታን ኔና ታ ጾንያ ኡሸቻ ኩሽያን ዘምፕሳደ ኦይቃና።

11 "በአ፥ ኔና ሀንቀትያ ኡባይ ዬላቲደ ካዉሻና፤ ኔናና ኤቀትያዋንቱ ካሰካ ባይናዋዳን ሀኒደ ያና። 12 ኔናና ዋላቀትያዋንታ ኔን ኮያና፤ ሽን ኔን ኡንቱንታ ደማካ። ኔናና ኦለትያዋንቱ ካሰካ ባይናባዳን፥ ሹፉሮ ግዲደ ያና። 13 አያዉ ጎፐ፥ ታን መና ጎዳይ፥ ነ ጾሳይ፥ ነ ኡሸቻ ኩሽያ ኦይቃና። ኔና፥ ‘ያዮፓ፥ ታን ኔና ማዳና። 14 ኔኖ ጉጹንያዉ፥ ያቆባ፥ ህንተኖ እስራኤልያ አሳዉ፥ ያዮፕተ፤ ታን ህንተና ማዳና። መና ጎዳይ፥ ህንተና ዎዝያዌ፥ እስራኤልያ ጌሻ’ ያጋይ። 15 በአ፥ ታን ኔና ኦራ፥ ቃራነ አቻና ደእያ፥ ቆጻናዉ ጎኤትያ ሚሻ ኦድ። ኔን ደረቱዋ ቆጻደ ሊቅሳና፤ ዞዘቱዋካ ሱላዳን ኦና። 16 ኔን ኡንቱንታ ፑናና፤ ጫርኩ ኡንቱንታ አፋና፤ ጎቲካ ኡንቱንታ ላላና። ሽን ኔን መና ጎዳን ናሸታና፤ ቃይ እስራኤልያ ጌሻን ቦንቼታና።

17 "ህዬሳቱነ መቶታንቻቱ ሃ ኮይና ኡንቱንቶ ይያ ዎደ፥ ቃይ ኡንቱንቱ ኮኪካ ሳሙዋን መልያ ዎደ፥ ታን መና ጎዳይ ኡንቱንታ ስሳና፤ ታን፥ እስራኤልያ ጾሳይ ኡንቱንታ አግከ። 18 ታን መላ ቃ ሳአቱዋን ሻፋ፥ ቃይ ዎምባቱዋ ግዶንካ ፑልቱዋ ሳና። መላ ቢታይ ሃይ ኤልያሳ፥ ቃይ መላ ቢታካ ሃይ ቂያሳ ኦና። 19 ባዙዋን ዝጋነ ጉጋን፥ ባርሴነትያነ ዛይትያ ዎጋራ ዶልሳና። ቃይካ ባዙዋን ጽድያ፥ ኦዶሩዋነ ዎጋራ እትፐ ዎና ያጌ። 20 እስራኤልያ ጌሻይ ሄዋ መዳዋ፥ ቃይ መና ጎዳ ኩሺ ሄዋ ኦዳዋ አሳይ በአናነ ኤራና ማላ፥ ቃይ ቆፓናነ እትፐካ አኬካና ማላ፥ ታን ሄዋ ኦድ።

ጾሳይ ዎርዶ ጾሳቱዋ እጼ

21 "መና ጎዳይ፥ ‘አነ ህንተ ሞቱዋ ሃ አተ’ ያጌ። ያቆባ ካቲ፥ ‘አነ ህንተ ጋሱዋካ ሃ አህተ’ ያጌ። 22 አነ ኡንቱንቱ ባረንቱ ምስለቱዋ ሃ አይና፥ አያይ ሀናናዉ ደእንቶ፥ ኡንቱንቱ ምስለቱ ኑዉ ኦድኖ። ኑን አኬካና ማላነ ኡንቱንቱ ዉርሰካ ኤራና ማላ፥ ካሰ የዎቱ አየንቶ ኑዉ ኦድተ፤ ዎይ ቃይ ስንፐ ትምቢትያ ኑዉ አዋይተ። 23 ህንተ ጾሳቱዋ ግድያዋ ኑን ኤራና ማላ፥ ስንፐ ያናዉ ደእያዋ ኑዉ ኦድተ። ኑን ዳጋማና ማላነ ያያና ማላ፥ ሎኦ ግድና ኢታ ግድና፥ አነ እትባ ኦተ። 24 በእተ፥ ህንተ ባይናዋ ማላ፤ ህንተ ኦሱካ ሀዳ። ህንተና ዶርያ አሳይካ ባረዉ ሸነይያዋ።

25 "ታን ሁጲሳ ባጋፐ እቱዋ ደንድ፤ እ ዬዳ። ቃይ ታ ሱን ጼስያ እቱ አዋይ ዶልያ ባጋፐ ያና። ኡርቃ መያዌ ኡርቃ የያዋዳን፥ እ ካለያዋንታ የና።

26 "ሀዋ ኑን ኤራና ማላ፥ ኮይሮ ኑዉ አዋዬዳዌ ኦኔ? ዎይ ኑን፥ ‘እ ልከ’ ጋና ማላ፥ ካሰቲደ ኑዉ ኦዴዳዌ ኦኔ? ኦንነ ሀዋ ኦዴዳዌ ባዋ፤ ኦንነ ትምቢትያ ኦድቤና። ቃይ ህንተ ቃላካ ስሴዳዌ ባዋ። 27 ታን ሀዋ ካሰታደ ጽዮንዉ አዋያድ፤ ቃይ ታን የሩሳላመዉካ ምሽራቹዋ ኦድያዋ እማድ። 28 ሽን ታን ጼሌዳ ዎደ እቱነ ባዋ፤ ታን ዞርያ ኦችያ ዎደ፥ ኡንቱንቱ ምስለቱዋ ግዶን ዛሩዋ እምያ እቱነ ባዋ። 29 በእተ፥ ኡንቱንቱ ኡባይካ ሀዳ፤ ኡንቱንቱ ኦሱካ መላ፤ ሲልሲደ መዳ ኡንቱንቱ ምስለቱ መላ ጫርኩዋ" ያጌ።